Mubambi wa Bologo Wajiya Giamatshidia

Guakhalele nu muhiga mumoshi wa mukhetu mu dimbo dia Filiphi, wakhalele nu demo. Demo diene diakhalele mukuatesa mukhetu muene ha guphonga. Mudimo wenji wa guphonga wakhalele mukuatesa mafumu enji ha guheta makuta avula. Tangua Phaula nu Silase ahetele mu dimbo dia Filiphi, mona mukhetu muene wakhalele muya nu gualandula; wakhalele mutshita ngenyi masugu avula. Demo diakhalele gumutuma ha gukaluluga egi: “Athu awa adi ahiga a Nzambi wa Gudinyinyiga.” Gungima Phaula wawambelele demo diene egi: ‘Ngudi guguwambela mu jina dia Yesu ha guzoga mukatshi dia mon’a mukhetu yowu!’ Demo diene diazogele mu tangua diene.

Tangua mafumu a mon’a mukhetu muene amonele egi ashigo luko nu luholo lua guheta makuta, avile khabu jiavula. Akuatele Phaula nu Silase, ayile nu guanana uu nu ha zando gutuama dia manzuji, azuelele egi: ‘Athu wawa adi mushiya mukhuala nu adi muzola matululu avula mu dimbo dietu!’ Manzuji awambelele athu ha guakhuphula fimbo nu guamba mu bologo. Mubambi wa bologo waambile mu bologo dia ha katshi na katshi, fundo diene diakhalele diabuita diago. Gungima waanginyishile malu mu milulu.

Phaula nu Silase asendesele guyimba ngimbo ha gutumbuisa Yehowa, enya bologo ako akhalele guategelela. Mu tangua diene, mavu adigitshile mangololo, fondasio jia inzo ya bologo jiadinyigishile, yakhalele mukatshi dia phipha. Mifulo yagasue ya bologo yakangulugile, malenge a enya bologo agasue akatugile. Tangua mubambi wa bologo wanginyile mu bologo dia hakatshi na katshi, wamonele egi mifulo yakhalele ya gukangula. Watangijile egi enya bologo agasue alengi gale, wazudile phogo ha gudishiya.

Mu tangua diene, Phaula wakalulugile egi: ‘Udishiyigo, handaga mukut’etu agasue tudi haha!’ Mubambi wa bologo wabuile mu malu a Phaula nu Silase. Waahudile egi: “Itshi ngudi naye gutshita hagula nguhuluishiwe?” Amuwambelele egi: ‘Aye nu enya inzo yaye yagasue mudi naye gusha gutshigina gudi Yesu.’ Phaula nu Silase a alongesele ndaga jia Yehowa. Gungima mubambi wa bologo nu athu agasue a mu inzo yenji abatijiwe.