Pregunta di Lektor

Akaso Satanas a introdusí e idea di inmortalidat di alma ku ta komun awendia ora el a bisa Eva ku lo e no muri si e kome di e palu di konosementu di bon i malu?

Ta parse ku nò. Diabel no a bisa Eva ku si e kome di e fruta ku Dios a prohibí su kurpa so lo muri i su spiritu (loke algun hende awe ta konsiderá alma inmortal) lo keda biba un otro kaminda. Satanas, kende a papia ku Eva mediante e kolebra, a sigurá Eva ku ‘lo e no muri’ si e kome e fruta dje palu. El a insinuá ku Eva lo sigui biba i lo disfrutá di un mihó bida riba tera, independiente di Dios.—Gén. 2:17; 3:3-5.

Pero, si e siñansa falsu di inmortalidat di alma no a originá den Eden, ta na ki momento el a originá anto? Nos no tin sigur. Loke sí ta sigur ta ku tur adorashon falsu a ser destruí durante Diluvio den tempu di Noe. Komo ku ta Noe i su famia, kendenan tabata sirbi Dios, so a sobrebibí, ningun idea religioso falsu no a sobrebibí Diluvio.

Pues, e siñansa di inmortalidat di alma mester a originá despues di Diluvio. Pero, kon el a plama? Wèl, ora Dios a konfundí idioma na Babel i a plama hende “riba superfisie di henter tera,” nan a bai ku e idea ei. (Gén. 11:8, 9) Pero, sin importá na ki momento e siñansa falsu di inmortalidat di alma a originá, nos tin sigur ku “e tata di mentira,” Satanas e Diabel, tabata tras di e asuntu ei, i el a keda kontentu di mira e mentira ei plama rònt mundu.—Huan 8:44.