Pakiko Biba Segun Prinsipionan Bíbliko?

BEIBEL su normanan enkuanto sèks ta antikuá i strèn? Nò. Al kontrario, si nos apliká nan, nos por evitá:

▪ Malesanan transmití seksualmente

▪ Embaraso pafó di matrimonio

▪ E konsekuensianan doloroso di un matrimonio kibrá

▪ Un konsenshi ku ta molestiá nos

▪ Di haña e sintimentu ku nos no ta bal nada

Nos Kreador, Yehova Dios,a ke pa nos disfrutá i benefisiá di su regalonan. Dios ta Esun ku “ta siña bo, pa bo prosperá.” (Isaías 48:17) Hende ku ta biba segun prinsipionan bíbliko relashoná ku sèks lo tin:

▪ Dios su aprobashon

▪ Pas mental

▪ Famia fuerte

▪ Un bon reputashon

▪ Rèspèt propio

Awor, kiko si bo no ta bibando segun e normanan moral di Beibel? Ta posibel pa bo kambia bo bida? Dios lo usa bo kondukta di pasado kontra bo?

Konsiderá e echo akí: Algun hende ku tabata forma parti di e kongregashon kristian di promé siglo tabata fornikadó, adúltero i homoseksual, pero nan a kambia nan bida i a kosechá benefisio. (1 Korintionan 6:9-11) Awe tambe, míles di hende rònt mundu a hasi meskos. Nan a bandoná nan bida inmoral i ta disfrutá di e benefisionan di un bida na armonia ku prinsipionan bíbliko. Tuma por ehèmpel Sarah ku nos a menshoná den e artíkulo di introdukshon.

“Mesora Mi A Sinti un Alivio”

Sarah a realisá ku su bida inmoral no a dun’é e libertat ni e satisfakshon ku el a deseá. El a bisa: “Mi a sinti ku mi konsenshi a kria kayo. Mi tabatin bèrgwensa i miedu di sali na estado òf pega ku un malesa teribel. Pero nunka mi a stòp di kere den Dios, i mi tabata sa ku mi moda di biba tabata hasié tristu. Mi a sinti mi sushi, i esei tabata kaba ku mi.”

Ku tempu, Sarah a haña e forsa nesesario pa kambia su bida. El a buska yudansa serka su mayornan, kendenan ta Testigu di Yehova, i tambe serka e ansianonan di kongregashon. El a bisa: “E manera kariñoso i amoroso ku mi mayornan i e ansianonan di kongregashon a trata mi tabata un grato sorpresa pa mi. Mesora mi a sinti un alivio.”

Aworakí Sarah tin dos yu. El a bisa: “Mi ta papia ku mi yunan abiertamente tokante tur e mal desishonnan ku mi a tuma. Mi ke pa nan sa kuantu mi a sufri debí ku mi no a hasi kaso di Dios su normanan moral. Mi ke pa nan komprondé ku si nan biba na armonia ku e normanan moral ku Dios a pone enkuanto sèks, nan lo benefisiá físikamente, moralmente i mentalmente. Mi ta konvensí ku Dios no ke mira nos sufri; p’esei el a duna nos su normanan moral.”

Abo tambe por eksperensiá e benefisionan di sigui Dios su guia amoroso. Beibel ta primintí nos: “E preseptonan di SEÑOR ta korekto, nan ta alegrá kurason; e mandamentunan di SEÑOR ta puru, nan ta iluminá wowo. . . . Obedensia na nan ta trese gran rekompensa kuné.”—Salmo 19:8, 11.b

[Nota]

[Komentario na página 8]

Hende ku no ta hasi kaso di normanan bíbliko, mayoria di biaha, ta sufri konsekuensianan amargo

[Komentario na página 9]

Hende ku sí ta hasi kaso di Beibel su normanan moral tin un konsenshi limpi i un famia fuerte