Un Bishita na Kazakstan

DEN pasado e nativonan di Kazakstan tabata nomado, i p’esei te awe tin di nan ta wardadó di tou ku ta hiba nan bestianan diferente kaminda (dependiendo di e temporada) pa kome yerba. Durante zomer nan ta laga nan kome yerba den e serunan ya ku no ta dje friu ei, anto ora wenter ta aserká, nan ta baha for di seru pa nan bestianan kome yerba kaminda e temperatura ta nèt bon.

Aunke algun nativo di Kazakstan ta biba den statnan moderno, hopi di nan tradishonnan, platonan krioyo i obranan di man ta un refleho di e estilo di bida nomado di nan antepasadonan. Ademas, nan tin un herensia kultural di poesia, kantika i piesanan musikal interpretá pa instrumentonan musikal lokal.

E yùrt, un kas portátil di e nomadonan, a bira e símbolo di hende ku ta respetá i kuida naturalesa. Te awe wardadónan di bestia gusta yùrt, i hende ku ta biba den stat hopi biaha ta usa nan pa eventonan spesial. Turista tambe por pasa fakansi den yùrt. Na e obranan di man ku tin parti paden di e yùrt bo por mira ku e hende muhénan ta hopi bon den bòrda, weef i traha tapeit.

Famianan ku ta biba den kunuku ta konsiderá nan kabainan hopi balioso. Tin por lo ménos 21 palabra na e idioma kazak pa kabai; kada un di nan tin un nifikashon un tiki diferente, i tin mas ku 30 palabra i ekspreshon pa deskribí e koló di lana di kabai. Un bon kabai te ainda ta un regalo kostoso ku nan ta apresiá mashá. E hende hòmbernan ku a lanta den kunuku ta siña kore kabai fo’i chikí.

E kuminda krioyo di Kazak semper ta konsistí di karni i no ta pika. I kumis i shubat ta entre nan ko’i bebenan faborito. Kumis ta trahá di lechi di yewa i nan ta bisa ku e ta hopi bon pa salú. Anto shubat ta trahá di lechi di kamel; e ta diki i un poko zür.

E sukursal di Testigunan di Yehova ta na Almaty, i tur bishitante ta bonbiní.