Trabou di Ousilio den 2022: Nos Ta Mustra Amor na Nos Rumannan

Beibel a profetisá ku den nos tempu lo tin guera, temblor, pèst i otro esena spantoso. (Lúkas 21:10, 11) E profesianan ei a sigui kumpli den e aña di sirbishi 2022.a Por ehèmpel, e konflikto na Ukrania ta sigui ketu bai, afektando bida di miónes di hende. Gran parti di mundu tabata rekuperando ainda di e pandemia di COVID-19. Ademas, hopi hende a ser asotá pa desaster natural, manera temblor na Haiti i tormenta destruktivo na Sentroamérika, Filipinas i e parti zùitost na Afrika. Kon Testigunan di Yehova a yuda e víktimanan akí?

Durante e aña di sirbishi 2022, nos organisashon a duna yudansa na víktima di mas o ménos 200 desaster! En total, kasi 12 mion dòler a bai pa trabou di ousilio.b Laga nos wak kon a usa e donashonnan pa yuda e víktimanan di dos desaster.

Temblor na Haiti

Dia 14 di ougùstùs 2021, un temblor di magnitut 7.2 a sagudí parti zùit di Haiti. Lamentablemente, tres Testigu di Yehova a fayesé; dos ruman muhé i un ruman hòmber. E sobrebibientenan mester a trata ku daño físiko i emoshonal ku e temblor a kousa. Un ruman hòmber ku yama Stephane a konta: “Tabatin asina tantu morto den henter e stat ku pa mas ku dos luna vários entiero a tuma lugá tur siman.” Éliézer, un otro ruman, a bisa: “Hopi Testigu di Yehova a pèrdè nan kas. Anto nan no tabatin paña, sapatu ni otro kos básiko. Hopi ruman a biba pa vários luna ku miedu debí na e temblornan leve ku a sigui despues.”

Mesora nos organisashon a ofresé yudansa. E sukursal di Haiti a sòru pa mas ku 53 tòn di kuminda. Ademas, nan a perkurá pa tènt, tapol, matras i bateria solar pa selular. Fuera di eseinan, durante e aña di sirbishi 2022 a rekonstruí òf drecha mas ku 100 kas. Mas ku un mion dòler a bai na tur e trabounan di ousilio.

Nos rumannan a keda masha gradisidu mes. Lorette a bisa: “E temblor a destruí nos kas i nos negoshi kompletamente. Nos no tabatin nada di kome. Pero, Yehova su organisashon a yuda nos. Nos a haña tur loke nos tabatin mester.” Micheline a bisa: “E temblor a daña e kasita kaminda ami ku mi dos yu hòmbernan tabata biba. Mi a hasi orashon, pasobra mi no tabata sa kiko mas pa hasi. Yehova a kontestá mi mediante su organisashon. Awor, nos ta biba den un bon kas. Mi ta determiná pa hasi tur loke mi por pa mustra Yehova mi gratitut.”

E outoridatnan lokal a tuma nota di nos trabounan di ousilio. E direktor di e stathùis na L’Asile a bisa: “Mi ta felisitá boso pasobra boso a bin yuda mesora. Ademas, mi ta elogiá boso pa e gran rèspèt ku boso ta mustra na e funshonarionan di gobièrnu. Mi ta kontentu di mira ku boso no ta interesá den plaka. Mas bien, boso ke yuda hende. Amor ta loke ta motivá boso.”

Tormenta Tropikal Ana Ta Asotá Malawi i Mozambique

Dia 24 di yanüari 2022, tormenta tropikal Ana a asotá Mozambique i despues el a sigui bai den direkshon di Malawi. E tormenta akí a trese áwaseru pisá i bientu fuerte di mas ku 100 kilometer pa ora. El a destruí kabel di koriente, vários brùg i kousa hopi inundashon.

E tormenta a afektá mas ku 30.000 Testigu di Yehova na Malawi i Mozambique. Charles, un ruman ku a yuda ku trabou di ousilio, a bisa: “Ora mi a mira kuantu mi rumannan tabata sufri i kuantu kos nan a pèrdè, mi a sinti mi hopi tristu.” Riba dje, e tormenta a bai ku e tiki kuminda i kosecha ku nan tabatin. Hopi ruman a pèrdè nan kas. Lamentablemente, un ruman hòmber su kasá i su dos yu muhénan a hoga ora nan boto di reskate a bòltu.

E tormenta tabata teribel. Banda di 1 or di mardugá, famia Sengeredo ku ta biba na Nchalo, Malawi, a tende e zonido spantoso di hopi awa biniendo den nan direkshon. Dos riu a yena te basha over! Ruman Sengeredo a bisa su famia pa nan kore sali for di kas. Esei tabata un bon desishon, pasobra djis despues e inundashon a basha e kas abou. Pues, nan propiedatnan a sufri daño òf lastra bai ku e awa. E famia a disidí di bai Salòn di Reino. Normalmente, lo a tuma 30 minüt pa nan kana yega. Pero awor, esei a dura dos ora. Nan a yega papa muhá i morto kansá, pero sano i salvo.

Mesora, e sukursalnan di Malawi i Mozambique a organisá e trabounan di ousilio. Nan a instruí e superintendentenan di sirkuito i e ansianonan pa wak ki nesesidat e rumannan afektá tin i pa nan duna nan yudansa spiritual i emoshonal. A asigná vários Komité di Ousilio pa dirigí e trabounan. Mesora e komiténan akí a kuminsá yuda e rumannan ku kuminda i otro nesesidat. A usa mas ku 33.000 dòler pa yuda hende i mas ku 300.000 dòler pa drecha i rekonstruí kas di e rumannan.

E Komiténan di Ousilio a usa e fondonan na un manera sabí. Esei tabata masha importante pasobra e preisnan a subi hopi. Por ehèmpel, den e promé shete lunanan di e trabounan di ousilio, preis di hariña di maishi—un kuminda básiko na Malawi—a subi ku kasi 70 porshento. Preis di gasolin tambe a subi. Pa spar plaka, e rumannan a kumpra un gran kantidat di kuminda i material di konstrukshon lokalmente. Asina nan a logra haña deskuento i evitá gastu haltu di transporte.

E trabounan di ousilio a hasi e pueblo di Yehova hopi kontentu. Felisberto, un ruman di Mozambique, ta bisa: “Nunka mi a mira un organisashon duna asina tantu. Nos a haña material, trahadó di konstrukshon, transporte, kuminda i guia amoroso. E trabounan di ousilio akí tabata un ekselente ehèmpel di e amor entre nos rumannan ku Hesus a deskribí na Huan 13:34, 35.” Èster, un biuda na Malawi kende su kas a basha abou, a bisa: “Mi a sinti mi desesperá, pasobra mi no tabatin moda pa traha un otro kas. Pues, ora e rumannan a bin traha un kas pa mi, mi a sinti manera mi tabata den Paradeis kaba.”

Segun ku nos ta yega mas serka di e mundu nobo primintí, nos por ferwagt ku lo tin mas desaster natural. (Mateo 24:7, 8) Sinembargo, danki na boso donashonnan generoso, nos tin sigur ku e pueblo di Yehova lo risibí e yudansa nesesario. Pa haña sa mas tokante e diferente maneranan pa hasi donashon, bai na donate.jw.org. Danki pa boso generosidat.