Un Kaha Chikitu Ku Ta Yuda Distribuí Kuminda Spiritual

Awor Testigunan di Yehova ta risibí mas kuminda spiritual den forma digital ku nunka promé. Pero na hopi parti di mundu, nos rumannan no por afòrt Internet. Otro ruman ta biba na lugá kaminda Internet hopi bes ta stòp di traha, kaminda Internet ta hopi slo òf kaminda no tin Internet mes.

Apesar di esei, awor hopi di nos rumannan por download publikashon digital asta si nan no tin Internet. Kon esei ta posibel?

JW Box ta un kaha chikitu ku ta ser mandá pa kongregashonnan ku no tin bon akseso na Internet. E tin un router ku a ser kumprá na un empresa, un programa ku e Departamento di Kòmpiuter na Bètel a diseñá i publikashon i vidio digital ku ya ta disponibel riba jw.org. Kada JW Box ta kosta mas o ménos 75 dòler.

Na Salòn di Reino, rumannan ta konektá nan telefòn òf tablèt na e JW Box via wifi i ta download publikashon i vidio. Asta esnan ku tin telefòn òf tablèt mas bieu i ménos karu por konektá. Pero si un kongregashon no tin bon akseso na Internet, kon e JW Box por keda al dia ku e publikashonnan mas nobo? Sukursal ta manda USB stick regularmente ku kontenido nobo ku por download riba e JW Box. Kada USB stick ta kosta 4 dòler.

Kon JW Box a yuda nos rumannan? Nathan Adruandra, un tata ku ta biba na Repúblika Demokrátiko di Congo, a bisa: “Pa basta tempu mi a keda purba di download e dramanan ‘O Yehova, den Bo Mi Ta Konfia’ i Kòrda e Kasá di Lòt. Pero mi no a logra, i esei a desanimá mi. Awor mi por download e vidionan ei riba mi telefòn, i esei ta yuda nos komo mayor pa eduká nos yunan mihó.”

Un ruman hòmber ku ta yuda kongregashon na Nigeria pa instalá nan JW Box a bisa: “E rumannan ta mira JW Box komo un regalo spesial di Yehova. Nan ta masha kontentu ku awor ta fásil pa download publikashon i vidio for di e Kaha di Hèrmènt pa Siña Hende e Bèrdat.”

Mas ku 1.700 JW Box a ser mandá pa nos rumannan na Afrika, Oseania i Suramérika. Ademas, tin plan kaba pa manda JW Box pa hopi kongregashon mas. Kon nos ta kubri e gastunan akí? E donashonnan ku rumannan ta hasi na e obra mundial ta hasi esei posibel. Mayoria di e donashonnan ei ta ser hasí via donate.jw.org. Danki pa boso donashonnan generoso.