Kon Mi Por Kaba ku Mi Hùiswèrk?

“No ta niun tiki dushi pa keda lantá te un or di mardugá ta hasi hùiswèrk. Tur loke bo ke hasi na e momento ei ta bai drumi.”—David.

“Tin biaha mi tabata keda lanta te mitar di sinku di mainta ta siña, i djis despues, seis or di mainta mi tabatin ku lanta pa bai skol. Esei tabata masha frustrante!”—Theresa.

Bo ta sinti ku bo tin demasiado hùiswèrk? Si ta asina, e artíkulo akí lo yuda bo haña sa kon bo por kaba ku tur bo hùiswèrk.

• Dikon e dosentenan ta duna hùiswèrk?

• Algun tep

• Loke otro hóben ta bisa

Dikon e dosentenan ta duna hùiswèrk?

Entre otro, hùiswèrk ta . . .

• amplia bo konosementu

• siña bo pa ta responsabel

• yuda bo plania i hasi bon uso di bo tempu

• yuda bo komprondé mas mihó loke bo a siña den klasa

“E maestronan ta duna hùiswèrk pa hasi sigur ku nan alumnonan ta praktiká loke ku nan a siña, i pa e informashon no drenta di un orea i sali di e otro.”—Marie.

Por lo general, e vaknan di matemátika i siensia ta yuda bo mehorá bo kapasidat di resolvé problema. Segun algun eksperto, esei por krea i fortalesé konekshon neurológiko nobo den bo selebro. Pues, hùiswèrk ta manera un ehersisio pa bo selebro!

P’esei, sea ku bo ta mira e benefisionan òf nò, hùiswèrk ta un parti real di bo bida ku bo mester trata kuné. E bon notisia ta esaki: Aunke bo no tin kontrol riba e kantidat di hùiswèrk ku bo ta haña, bo por siña sí kon pa kaba ku nan mas lihé. Laga nos wak kon.

Algun tep

Si bo tin problema pa kaba ku bo hùiswèrk, e solushon kisas no ta pa traha mas duru, sino pa traha mas sabí. Purba lo siguiente:

• Tep 1: Plania adelantá. Beibel ta bisa: “Plan bon pensá ta duna bon resultado.” (Proverbionan 21:5, BPK) Pone tur material ku bo tin mester pa traha bo hùiswèrk na bo alkanse, pa bo no tin ku lanta despues ku bo kuminsá.

  Skohe un lugá kaminda ta fásil pa bo konsentrá. Algun hóben ta haña ku un kamber ketu ku bon klaridat na kas ta ideal. Otro hóben ta haña ku otro kaminda lo ta mihó, kisas un biblioteka.

  “Si bo hasi uso di un agènda òf kalènder, esei por yuda bo plania bo tempu mas mihó. Si bo traha tur dia un tiki riba bo tareanan i tene kuenta pa ki dia nan mester ta kla, nan lo no duna bo muchu strès.”—Richard.

• Tep 2: Ordená bo tareanan. Beibel ta bisa: “Laga tur kos tuma lugá . . . na un manera ordená.” (1 Korintionan 14:40) Ku esei na mente, disidí den ki órden lo bo hasi bo tareanan.

  Algun hóben gusta kuminsá ku e tareanan mas difísil promé. Otro hóben ta preferá e motivashon i satisfakshon ku bo ta haña ora bo kaba ku esnan mas fásil promé. Skohe e manera ku ta funshoná mihó pa bo.

  “Si bo traha un lista pa bo mira kiko bo tin ku traha ariba i den ki sekuensia bo tin ku traha riba nan, esei ta yuda bo sigur. Asina bo tin mas kontrol riba bo hùiswèrk i lo bo no sinti ku e ta un peso.”—Heidi.

• Tep 3: Pone man na obra. Beibel ta bisa: “Sea ferviente i no floho.” (Romanonan 12:11). No laga otro aktividat stroba bo di traha riba bo hùiswèrk, pa kon dushi ku nan por parse.

  Hende ku tin e kustumber di posponé kos, hopi biaha ta kai lat òf tin ku hasi purá-purá pa kaba ku nan trabou, i esei ta baha kalidat di nan trabou. Bo por spar bo mes di strès i lamento innesesario si bo kuminsá traha riba bo hùiswèrk mas lihé ku ta posibel.

  “Ora mi kuminsá traha riba mi hùiswèrk mesora despues di skol òf kuminsá ku un proyekto asina ku mi hañ’é, mi no tin ku preokupá kuné mas i e no ta stroba mi di hasi otro aktividat.”—Serina.

  SUGERENSIA: Traha riba bo hùiswèrk tur dia na e mesun orario. Esei lo fortalesé bo disiplina propio i lo yuda bo keda konsistente.

• Tep 4: Keda konsentrá. Beibel ta bisa: “Laga bo wowo wak règt bo dilanti.” (Proverbionan 4:25) Pa bo por sigui e konseho akí segun ku bo ta studia, bo mester evitá distraishon—foral distraishon den forma digital.

  

  Si bo ta sùrf riba Internet òf ta keda manda mensahe, esei ta pone ku lo tuma bo mas tempu pa kaba ku bo hùiswèrk. Pero si bo keda konsentrá riba bo tarea, lo bo ripará ku no solamente bo tin ménos strès, sino ku bo tin mas tempu liber tambe.

  “Ku telefòn selular, kòmpiuter, wega di vidio i televishon ta bira difísil pa bo konsentrá riba bo hùiswèrk. Loke ta yuda ami ta pa paga mi telefòn òf kualke otro aparato ku por distraí mi.”—Joel.

• Tep 5: Keda balansá. Beibel ta bisa: “Laga tur hende mira ki rasonabel boso ta.” (Filipensenan 4:5) Ora ta nesesario, tuma pousa pa baha e strès un poko. Bai kana òf kore un ratu, òf bai kore baiskel.

  Si ainda bo ta sinti ku bo tin hopi hùiswèrk, papia ku bo maestronan tokante esei. Ora nan mira ku di bèrdat bo ta hasi tur bo esfuerso, nan lo por hasi algun ahuste.

  “No bira demasiado anshá pa motibu di e kantidat di hùiswèrk ku bo tin. Hasi bo máksimo esfuerso pa traha nan. Hùiswèrk ta un di e kosnan ku lo no ta bale la pena pa pone bo salú na peliger p’e.”—Julia.

Puntra bo mes:

• Kiko ta e kosnan ku mi tin mester pa traha mi hùiswèrk?

• Ki ora ta e mihó momento pa mi traha riba mi hùiswèrk?

• Na unda mi por konsentrá mas mihó pa traha riba mi hùiswèrk?

• Kon mi por evitá di posponé mi hùiswèrk?

• Ki distraishon por stroba mi di kaba lihé ku mi hùiswèrk?

• Kon mi por evitá distraishon digital òf di kualke otro forma?

• Kon mi por logra kaba ku mi hùiswèrk sin laga esaki duna mi strès?

REKORDATORIO IMPORTANTE: Hasi sigur ku bo a komprondé kiko bo hùiswèrk ta enserá. Si bo tin pregunta, puntra bo maestro promé ku bo sali for di klas.