“Mi Ta Hasi Tur Loke Mi Por”

Irma tin kasi 90 aña di edat i ta biba na Alemania. Despues di dos aksidente grave i vários operashon, e no por prediká mas di kas pa kas manera e tabata hasi promé. Awor, Irma ta skirbi karta pa papia ku su famia i konosínan tokante su fe. E hendenan ku risibí un karta di animashon òf di kondolensia ta apresiá esei mashá i p’esei nan ta yam’é pa puntr’é ki dia nan lo haña e siguiente karta. Irma ta haña hopi karta di gradisimentu tambe den kua nan ta pidié pa e bolbe skirbi nan un karta. Irma ta bisa: “Esei ta hasi mi masha kontentu i ta yuda mi keda spiritualmente aktivo.”

Irma ta manda karta pa hende den kas di kuido tambe. E ta konta: “Un señora di edat avansá a yama mi i a bisa mi ku e karta ku mi a mand’é despues ku su kasá a muri tabata un konsuelo p’e. E señora ta warda e karta den su Beibel i, hopi biaha, e ta bolbe les’é anochi. Un otro señora, kende su kasá tambe a muri resientemente, a bisa ku e karta a yud’é mas ku e sermon di e pastor. E tabatin hopi pregunta, p’esei el a pidi mi si e por a bishitá mi.”

Un konosí di Irma ku no ta testigu a muda bai biba leu i a pidi Irma pa skirbié karta. Irma a bisa: “E señora a warda tur e kartanan ku mi a skirbié. Despues ku e señora a muri, su yu muhé a yama mi. El a bisa mi ku el a lesa tur e kartanan ku mi a skirbi su mama i a pidi mi pa skirbi karta tokante Beibel pa e tambe.”

Irma ta gusta prediká pa medio di karta. El a bisa: “Mi ta roga Yehova pa sigui duna mi forsa pa sirbié. Aunke mi no por bai di kas pa kas mas, mi ta hasi tur loke mi por.”