Reda den Tempu di Beibel

Lesando Beibel nos ta haña sa ku Hesus tabatin vários disipel ku tabata piskadó. (Mar. 1:​16-20) Nan tabata usa reda pa piska na Laman di Galilea.

Pa traha e redanan akí, nan tabata mara kabuya di mata di linasa na otro pa asina traha algu ku tabata parse un nèt. E grandura di e burakunan di e nèt tabata dependé di e tipo di piská ku nan tabata ke kue. Na un reda chikitu, tabata mara peso di chumbu òf di piedra pa lag’é senk. Anto na un reda grandi, tabatin un peso parti abou i un palu òf kòrki parti ariba ku tabata drif riba awa.

Reda tabata karu i tabata rekerí hopi esfuerso pa mantené nan den bon estado. E redanan por a sker na baranka den fondo di laman òf nan por a sker pa motibu di e kantidat grandi di piská ku nan a kue. (Lúk. 5:6) Beibel ta bisa ku Santiago i Huan tabata “drecha nan redanan,” probablemente usando un angua i hilu trahá di mata di linasa. (Mat. 4:21) Piskadó probablemente tabata hasi esaki despues di kada uso. Lúkas ta papia di piskadó ku “tabata labando nan redanan” pa kita sushi. (Lúk. 5:2) Despues, e piskadónan lo a kologá nan redanan pa seka pa asina evitá ku nan ta putri.—Eze. 47:10.

Hesus a puntra algun hòmber ku tabatin kustumber di usa reda pa bira “piskadó di hende.”