Kon pa Keda Leal na Yehova ora Nos Haña Nos ku Prueba

1-2. Kiko a pasa un biaha ku Hesus tabata papia ku un multitut di hende na Kapernaum?

UN BIAHA ku Hesus tabata na Kapernaum, el a bisa un multitut di hende: “Si boso no kome karni di e Yu di hende i bebe su sanger, boso lo no haña bida. Tur hende ku kome mi karni i bebe mi sanger lo haña bida eterno, i riba e último dia, lo mi resusitá nan.” (Huan 6:​53, 54) Kon e hendenan a reakshoná? Hopi di su disipelnan a bisa: “E kosnan akí ku e ta papia ta zona ofensivo. Ken por para skucha nan?”—Huan 6:60.

² Debí na esei, hopi di nan a stòp di sigui Hesus. Pero dikon? Ta fe den Hesus nan no tabatin? Wèl, nan tabatin fe den Hesus sí, pasobra un dia promé, ora nan a mira un milager di Hesus, nan a bisa: “E hòmber akí sigur ta e Profeta ku mester a bini na mundu.” (Huan 6:14) Pero ora nan fe a ser di tèst, nan no a keda leal na dje.

3. Kon e apòstelnan a reakshoná na loke Hesus a bisa, i dikon? (Wak e plachi.)

³ Pero awor, kiko di e apòstelnan? Wèl, ora Hesus a puntra nan si nan tambe ke bai, Pedro a kontest’é: “Señor, serka ken nos lo bai? Ta abo ta siña nos kon pa haña bida eterno. Nos ta kere, i nos a haña sa ku abo ta e hòmber santu ku Dios a manda.” (Huan 6:​68, 69) Kisas Pedro i e otro apòstelnan tampoko no a komprondé kompletamente kiko Hesus tabata ke men ora el a bisa pa kome su karni i bebe su sanger. Pero tòg, nan a skohe pa keda leal na Hesus, pasobra nan tabatin sigur ku e tabata “Kristu, e persona ku Dios a skohe.”—Lúk. 9:​20, 35.

4. Kiko ta algun situashon ku por tèst nos lealtat na Yehova awe?

⁴ Awe tambe tin vários situashon ku por tèst nos lealtat na Yehova. Un di nan ta ora e organisashon bini ku kambio den e manera ku nos ta komprondé un teksto di Beibel òf den e manera ku nos ta prediká. Un otro ta ora nos pasa den un situashon doloroso i nos no por komprondé dikon Yehova a permití esei. Algu otro ku por tèst nos lealtat na Yehova ta ora un ruman ku nos ta será kuné hùrt nos òf ora nos sinti ku un persona ku nos ta respetá a trata nos malu.

5. Dikon nos mester fortalesé nos fe? Duna un ehèmpel. (Efesionan 3:17)

⁵ Kiko nos mester hasi pa nos keda leal na Yehova den tipo di situashon difísil asina? Wèl, pensa riba un edifisio ku ta trahá den un área ku tin hopi temblor. Pa e edifisio ei no kai den otro durante temblor, e mester tin un bon fundeshi. Asina tambe, pa nos keda leal na Yehova den situashon difísil, nos mester tin un fe fuerte. P’esei, ta hopi importante pa nos sigui fortalesé nos fe pa asina nos por sigui sirbi Yehova sin importá kiko pasa.—1 Kor. 15:58; lesa Efesionan 3:17.

6. Kiko a yuda e apòstelnan keda leal na Hesus?

⁶ Loke a yuda e apòstelnan keda leal na Hesus tabata ku nan tabatin sigur di e siguiente kosnan: ku nan mester a sirbi Yehova pasobra e ta Kreador di tur kos; ku Hesus ta Yu di Dios, i ku pa medio di dje nan por haña bida eterno i ku Hesus tin Yehova su sosten. Awe nos tambe tin ku hasi sigur di sierto bèrdatnan ku por yuda nos keda leal. Nan ta: (1) Yehova ta Kreador di tur kos. (2) Yehova ta Outor di Beibel. (3) Yehova ta sostené su pueblo awe. Si nos tambe ta konvensí di e tres bèrdatnan akí nos por keda leal na Yehova apesar di kualke situashon difísil.

YEHOVA TA KREADOR DI TUR KOS

7. Di kiko Revelashon 4:11 ta kòrda nos, i kon esei ta yuda nos ora nos pasa den situashon difísil?

⁷ Lesa Revelashon 4:11. E teksto akí ta kòrda nos ku Yehova a krea tur kos. Ta p’esei mes Yehova meresé nos adorashon. Ora nos meditá riba kuantu poder e tin, nos lo tin sigur ku lo e por yuda nos trata ku kualke situashon difísil. Pero, Satanas ta plama mentira pa laga hende duda ku Dios ta eksistí. Tin sientífikonan ta asta bisa ku bida a bini di su mes. P’esei ta importante pa nos konvensé nos mes ku ta Yehova a krea tur kos i ku e ta stima nos. Esei ta pone ku ora nos pasa den situashon difísil, nos no ta bai kuminsá duda ku e ta eksistí i ku lo e yuda nos.—Heb. 11:6.

8-9. Kiko bo mester hasi si bo kuminsá duda ku Yehova ta e Kreador? (Wak e plachi.)

⁸ Si bo kuminsá duda ku tin un Kreador, no sinta man krusá. Hasi investigashon mesora den nos publikashonnan pa kita e duda ei. Den e foyeto Bida Ta Obra di un Kreador? bo por haña hopi informashon ku por fortalesé bo fe ku tin un Kreador. Anto bo por haña mas prueba ainda den e seri “Un Persona A Diseñ’é?” i den e sekshon “Punto di Bista Tokante e Orígen di Bida” ku tin riba jw.org. Jessica, un ruman muhé yòn di Merka, a bisa: “Despues ku m’a lesa algun informashon den nos publikashonnan, tabata bisto ku tin hopi prueba ku tin un Kreador. Aunke ku mi tabata sa esaki kaba, e informashonnan akí a duna mi asta mas siguransa.” Loke ku tambe a yuda hopi ruman ta lès 6 i 7 di e buki Bo Por Disfrutá di Bida pa Semper! i e Spièrta! Num. 3 2021 “Bo Tin Ku Kere den un Kreador? Disidí pa Bo Mes.” Si bo a yega di lesa òf wak un di e publikashonnan akí, dikon no hasié atrobe?

⁹ Durante bo estudio personal, kisas bo por buska informashon ku ta mustra ku di bèrdat Dios ta eksistí. Ora bo hasi esei, bo fe den Yehova lo bira mas fuerte i lo bo siña konos’é mihó. (Rom. 1:20) Ademas, bo por yuda otro hende ku ta duda ku Dios ta eksistí. No tin duda, pa medio di tur e kosnan ku Yehova a krea, e ta proba bon kla ku e ta eksistí.

Nebula: IAC/RGO/David Malin Images; piská i outo: Mercedes-Benz USA; avion: Kristen Bartlett/University of Florida

YEHOVA TA OUTOR DI BEIBEL

10. Dikon Beibel ta importante pa nos? (2 Timoteo 3:​16, 17)

¹⁰ Lesa 2 Timoteo 3:​16, 17. Den Beibel nos ta haña e mensahe ku Yehova tin pa hende. Beibel ta kontestá pregunta importante di bida. Ademas, e ta bisa nos kiko ta Yehova su boluntat i loke e ta ferwagt di nos. Komo ku Yehova ta Outor di Beibel, e ta e buki di mas importante den nos bida. P’esei, nos ke hasi sigur ku nos ta komprondé loke Beibel ta bisa i ku nos ta apliká su konsehonan.

11. Dikon nos tin sigur ku Yehova ta Outor di Beibel?

¹¹ Pero dikon nos tin asina tantu sigur ku Yehova ta Outor di Beibel? Laga nos wak algun motibu. Por ehèmpel, loke Beibel ta bisa tokante kosnan ku a pasa den pasado ta bèrdat. (Lúk. 3:​1, 2) Anto tur loke e ta papia tokante naturalesa ta kuadra. (Yòb 26:7) I algu ku ta hasi Beibel úniko ta ku, aunke ku Satanas a purba di deshasí di dje, te dia djawe e ta eksistí i e ta e buki ku mas tantu hende tin. Ademas, Beibel a ser skirbí dor di 40 hòmber durante un periodo di mas o ménos 1.600 aña. Apesar di esei, tur loke nan a skirbi ta kuadra ku otro. I aunke Beibel a ser skirbí hopi tempu pasá, su konsehonan ta yuda miónes di hende awe. (Pro. 13:20; 15:21; Mat. 7:12) Un otro motibu ku nos por konfia loke Beibel ta bisa ta e echo ku vários di e profesianan ku tin den Beibel a kumpli. (Hos. 23:14) Pues, no tin duda ku ta Yehova ta Outor di Beibel!

12. Kiko nos mester hasi si nos ta kuminsá duda ku Yehova ta Outor di Beibel?

¹² Pero kiko si bo a kuminsá duda ku Yehova ta Outor di Beibel? Lo ta bon pa bo hasi orashon tokante esei i despues hasi investigashon. Jordan, un ruman hòmber yòn ku a lanta den e bèrdat, a bisa: “Mi no ta kere algu djis pasobra mi mayornan òf otro hende a bisa mi esei. Mi mes ke hasi sigur ku loke nan ta bisa mi ta bèrdat. P’esei, ora mi tin kualke duda tokante algu ku nos ta kere aden, mi ta hasi mi bèst pa hasi investigashon den nos publikashonnan pa kita e duda ei.” Pues, mas nos sigui konvensé nos mes ku Yehova ta Outor di Beibel, mas fuerte nos fe lo bira.—1 Kor. 3:​12, 13.

YEHOVA TA SOSTENÉ SU PUEBLO AWE

13. Kiko nos mester hasi si nos kuminsá duda ken awe ta e pueblo di Dios?

¹³ Awor, kiko si bo ta duda ku Testigunan di Yehova ta e pueblo di Dios awe? Bo mester tuma akshon mesora. Por ehèmpel, hasi bo mes e siguiente preguntanan: ‘Ken awe ta biba segun e normanan di Beibel? Ken awe ta basa tur nan kreensianan riba loke Beibel ta bisa?’ (2 Tim. 4:​3, 4) ‘Ken awe ta hasi e boluntat di Yehova?’—Mat. 7:​20, 21.

14. Kon Testigunan di Yehova ta kumpliendo ku e profesia na Mateo 24:14?

¹⁴ Pa haña sa ken awe ta hasi e boluntat di Dios, puntra bo mes: ‘Ken ta esnan ku ta kumpli ku e trabou di prediká ku Hesus a profetisá tokante dje?’ (Mat. 24:14) Ta bisto ku ta Testigunan di Yehova. Sí, Yehova ta usa su pueblo pa kumpli ku e trabou ei. Ta Testigunan di Yehova so ta predikando bon notisia tokante e Reino di Dios den mas ku 240 pais. Anto nos tin mas ku 100 aña ta hasi e trabou akí. Sí, e trabou di prediká semper tabata e trabou di mas importante pa nos.—Mat. 28:​19, 20.

15. Kon Testigunan di Yehova ta duna onor na e nòmber di Dios awe? (Mateo 6:9; Isaías 43:10)

¹⁵ Lesa Mateo 6:9 i Isaías 43:10. Nos ta masha kontentu ku nos tin e privilegio di ser yamá Testigunan di Yehova. Awe, mayoria di hende no sa ku Dios yama Yehova. Pero nos a hasi tur nos esfuerso pa pone su nòmber bèk kaminda e tabata aparesé originalmente den e Skritura. P’esei su nòmber ta aparesé mas ku 7.000 biaha den e Tradukshon di Mundu Nobo.

16. Kiko ta mustra ku Testigunan di Yehova ta kumpli ku e mandamentu ku tin na Huan 13:34 i 35? (Wak e plachi.)

¹⁶ Lesa Huan 13:​34, 35. Awe hende ta mas dividí i agresivo ku nunka. Pero nos komo pueblo di Yehova sí ta uní i ta stima otro, apesar ku nos ta bini di diferente pais i background. Bo a yega di bishitá un otro kongregashon na un otro lugá? Si esei ta e kaso, lo bo a ripará ku bo rumannan, sin importá na kua pais, ta stima otro i ta uní. Esei ta mustra bon kla ku Yehova ta usa su Testigunan pa kumpli ku su boluntat awe. Si nos sigui kòrda ku Yehova ta sostené su pueblo awe, esaki lo yuda nos pa keda leal ora nos pasa den tempunan difísil.

NUNKA BANDONÁ YEHOVA

17-18. Ki tipo di situashon difísil nos por haña nos kuné, pero kiko nos por bisa ku tur konfiansa?

¹⁷ Den e último dianan nos lo haña nos ku situashonnan ku lo ta krítiko, difísil pa trata kuné. (2 Tim. 3:​1, 13) Anto nos por haña nos ku otro prueba tambe. Por ehèmpel, kisas e organisashon por bini ku desishonnan ku nos no ta komprondé kompletamente. Òf kisas un ruman por hasi algu ku ta hùrt nos. Podisé nos no ta mira un solushon pa nos problema òf nos no ta komprondé dikon algu ta pasando.

¹⁸ Apesar ku e tipo di situashonnan ei por laga nos sinti nos tristu i anshá, tòg nos por keda leal na Yehova. Nos por logra esei si nos ta konvensí ku Yehova ta e Kreador, ku e ta Outor di Beibel i ku Testigunan di Yehova ta Su pueblo. Anto meskos ku Pedro a bisa Hesus, nos tambe por bisa Yehova: “Serka ken nos lo bai? Ta abo ta siña nos kon pa haña bida eterno.”