Bo Ta Komprondé e Nifikashon i Importansia di Boutismo?

1. Kon nos por sa ku boutismo ta un siñansa importante di Beibel?

KON bo ta sinti ora bo mira hende nobo boutisá? Sigur masha kontentu! E promé kristiannan tambe a sinti asina ora ku nan a mira kuantu hende a boutisá na Pentekòste di aña 33. Na e okashon ei, Apòstel Pedro a splika den un diskurso kon importante boutismo ta. (Echo. 2:​38, 40, 41) Mas despues, Apòstel Pablo a skirbi ku loke nos ta siña tokante boutismo ta parti di “e siñansanan básiko tokante Kristu.” (Heb. 6:​1, 2) Pues, boutismo ta un di e siñansanan importante di Beibel, i nos mester komprondé bon kiko e ta enserá. Pero dikon?

2. Dikon ta importante pa komprondé e siñansa tokante boutismo?

² Pa un kas ta fuerte, e mester di un bon fundeshi. Asina tambe, pa nos fe ta fuerte, nos mester komprondé e siñansanan ku ta forma e fundeshi pa nos fe, entre otro, e siñansa tokante boutismo. Nos mester komprondé e siñansa ei, sea nos ta bai boutisá òf nos tin hopi tempu boutisá kaba. Den e artíkulo akí, nos lo haña kontesta pa e siguiente preguntanan: Kiko bo boutismo ta nifiká? Kiko ta tuma lugá na un boutismo? I dikon nos ta boutisá den nòmber di e Tata, di e Yu i di spiritu santu?

KIKO BO BOUTISMO TA NIFIKÁ?

3. Ora bo boutisá, kiko bo ta mustra tur hende?

³ Ora ku bo boutisá, bo ta mustra tur hende (1) ku bo ta aseptá loke Beibel ta bisa tokante Yehova i Hesus, (2) ku bo a arepentí di bo pikánan, (3) ku bo a hasi kambio den bo bida pa sirbi Yehova, (4) ku bo ta rekonosé ku Dios a usa Hesus pa salba nos di piká i morto i (5) ku bo a bisa Yehova den orashon ku bo ke hasi su boluntat huntu ku su organisashon. Ora bo hasi e promesa òf dedikashon ei i boutisá, bo ta kuminsá kana riba e kaminda ku ta hiba na bida eterno.

4. Kiko e proseso di bai kompletamente bou di awa i bini bèk ariba ta nifiká? (Wak e plachi.)

⁴ Ora bo boutisá, bo ta bai kompletamente bou di awa i despues bo ta bini bèk ariba.a Bo por kompará e proseso ei ku un persona ku a ser derá i ku despues ta ser resusitá. (Kompará ku Kolosensenan 2:12.) Dikon esei ta un bon komparashon? Pasobra ora bo bai bou di awa, bo ta mustra ku bo a stòp di biba manera bo tabata biba ántes. I ora bo sali bèk for di awa, bo ta kuminsá un bida nobo ku e meta pa hasi loke Dios ke.

5. Ku kiko nos por kompará e esfuerso ku nos ta hasi pa prepará pa boutismo, i dikon? (1 Pedro 3:​18-21)

⁵ Lesa 1 Pedro 3:​18-21. Nos por kompará e esfuersonan ku bo ta hasi pa prepará pa boutismo ku e trabou ku Noe a hasi pa konstruí e arka. Kisas ta awor bo a kuminsá siña tokante Yehova. Pero ora bo pensa riba tur e esfuersonan ku bo mester hasi pa yega na boutismo, e por parse algu difísil pa logra. Kisas bo ta pensa ku e ta mes difísil ku traha e arka di Noe. Pero dikon ta bale la pena pa kuminsá hasi e esfuersonan ei? Pensa un ratu riba Noe. Dios a bisa Noe presis kon e mester a traha e arka, i Noe mester a kumpli ku e instrukshonnan ei fielmente pa e por sobrebibí e Diluvio. Anto Noe a “hasi tur loke Dios a mand’é hasi.” (Gén. 6:22) Kon Noe a logra hasi esei? Danki na su fe i yudansa di Dios, el a logra traha e arka. Meskos ku Noe, nos tambe por logra kumpli ku tur loke Dios ta pidi di nos pa yega na boutismo.

6. Kiko Pedro tabata ke men ora el a bisa ku nos ta ‘ser salbá pa medio di boutismo’?

⁶ Na versíkulo 21, Apòstel Pedro a skirbi ku nos ta “ser salbá pa medio di [nos] boutismo.” Pero esei no ta nifiká ku boutismo riba su mes ta kita nos pikánan. Ta solamente e sakrifisio di Hesus por kita nos pikánan. (1 Huan 1:7) Apesar di esei, tòg boutismo ta importante pasobra e ta un di e kosnan ku Yehova Dios a manda nos pa hasi. I ora nos boutisá, ta manera nos ta hasi un “petishon na Dios pa un konsenshi limpi.” Bo por tin sigur ku Yehova lo kumpli ku bo petishon i pordoná bo pikánan. Di e manera ei, boutismo ta salba bo i ta habri kaminda pa bo por biba pa semper.

KIKO TA TUMA LUGÁ NA UN BOUTISMO?

7. Kon un boutismo mester tuma lugá?

⁷ Aunke Beibel ta bisa ku un persona mester bai kompletamente bou di awa ora e boutisá, Beibel no ta duna nos mas detaye tokante kon un boutismo tin ku bai. Pero Beibel ta yuda nos komprondé sí kiko ta apropiá pa hasi na un boutismo. Por ehèmpel, prinsipio di Beibel ta yuda un persona ku ta bai boutisá komprondé kon e mester bisti. Ademas, prinsipio di Beibel ta yuda esnan ku a bin wak e boutismo sa kon nan mester komportá nan mes. (1 Kor. 14:40; 1 Tim. 2:9) Normalmente, ta un ansiano ta hasi e boutismo. Pero nos no mester halsa e rumannan ku ta hasi esaki. (1 Kor. 1:​14, 15) Anto no ta importante kuantu hende ta presente pa mira e boutismo.—Echo. 8:36.

8. Ki pregunta ta hasi e kandidatonan di boutismo, i dikon? (Echonan 2:​38-42) (Wak e plachi.)

⁸ Beibel ta mustra ku nos mester “deklará [nos] fe públikamente pa [nos] haña salbashon.” (Rom. 10:​9, 10) Nos ta hasi e deklarashon akí di nos fe, no solamente ora nos ta prediká na hende, pero spesialmente riba e dia di nos boutismo. P’esei, ta hasi e kandidatonan di boutismo dos pregunta. E promé pregunta ta: “Bo[so] a arepentí di bo[so] pikánan, a dediká bo[so] mes na Yehova i aseptá ku Dios ta duna salbashon solamente mediante Hesukristu?” E pregunta akí ta enfoká riba loke un persona a hasi kaba pa yega na boutismo. Pedro a bisa e hendenan na Pentekòste algu similar ora el a bisa nan pa arepentí i boutisá. Anto e di dos pregunta ta: “Bo[so] ta komprondé ku ora bo[so] boutisá bo[so] ta demostrá públikamente ku bo[so] ta Testigu di Yehova i ku bo[so] ta forma parti di Yehova su organisashon?” E pregunta akí ta enfoká riba kiko un persona ta bai hasi awor: E ta primintí ku lo e sigui e guia di Yehova su organisashon i ku lo e sirbi Yehova huntu ku su rumannan. Despues ku e hendenan na Pentekòste a boutisá, nan tambe a hasi esei. (Lesa Echonan 2:​38-42.) Un persona ku kontestá “sí” riba e preguntanan ei por boutisá.

9. Kiko kada un di nos mester hasi pa haña Dios su aprobashon?

⁹ Kisas promé ku bo a siña e bèrdat, bo no a hiba un mal bida ni bo no a kometé niun piká grave. Òf kisas bo a lanta den e bèrdat, ku mayornan Testigu ku a siña bo stima Yehova. Esei ta nifiká ku bo no mester arepentí i boutisá pa haña Yehova su aprobashon? Nò! Nos tin ku kòrda ku nos tur a nase komo pekadó. I esei ta stroba nos di ta amigu di Dios. (Sal. 51:5) Segun ku nos ta siña mas tokante Yehova, nos lo ripará ku tòg nos a hasi algun kos ku no tabata bon den bista di Yehova. Ora nos realisá esei, nos mester arepentí, hasi kambio i kuminsá hasi loke ta agrad’é, esta, hasi su boluntat. E ora ei, nos por boutisá.—Echo. 3:19.

10. Si bo a boutisá kaba den un otro religion, kiko bo mester hasi?

¹⁰ Si bo a yega di boutisá kaba den un otro religion, bo mester boutisá atrobe komo Testigu di Yehova? Sí, pasobra e tempu ei ku bo a boutisá, bo no tabatin konosementu eksakto di e bèrdat tokante Yehova i Hesus. Anto asta si bo a dediká bo mes na Dios den orashon, e promesa ku bo a hasi no tabata basá riba un komprondementu eksakto di su boluntat. Ora Apòstel Pablo a topa algun hende na Efeso ku a boutisá sin tin konosementu tokante Hesus, el a mustra nan ku nan mester a boutisá di nobo.b (Echo. 19:​1-5) Awe tambe, pa Yehova por aprobá un persona su boutismo, un persona mester tin konosementu eksakto tokante Yehova su boluntat.

“DEN NÒMBER DI E TATA, DEN NÒMBER DI E YU I DEN NÒMBER DI SPIRITU SANTU”

11. Ora nos boutisá “den nòmber di e Tata, den nòmber di e Yu i den nòmber di spiritu santu,” kiko esei ta nifiká? (Mateo 28:​18-20)

¹¹ Hesus a bisa ku hende ku kier bira su disipel mester boutisá “den nòmber di e Tata, den nòmber di e Yu i den nòmber di spiritu santu.” (Lesa Mateo 28:​18-20.) Kiko e tabata ke men ku esei? Den Beibel, hopi biaha, e palabra “nòmber” ta referí na un persona su reputashon. Pero e por referí tambe na e posishon òf outoridat ku un persona tin. Pues, ora nos boutisá den nòmber di Yehova i di Hesus, esei ta mustra ku nos ta rekonosé ku nan tin e outoridat i derecho pa bisa nos kiko pa hasi. Anto ora nos boutisá den nòmber di spiritu santu, esei ta nifiká ku nos ta sigui su guia. Laga nos ban wak kon nos por rekonosé e ròl di kada un di nan den nos bida.

12. Pa nos boutisá den nòmber di e Tata, kiko nos mester rekonosé? (Revelashon 4:11) (Wak e plachi.)

¹² Den nòmber di e Tata. Pa boutisá den nòmber di e Tata, nos mester rekonosé algun di su ròlnan. Por ehèmpel, Yehova ta nos Tata den shelu, i e ta e persona ku a duna nos bida. Ademas, e ta Dios Todopoderoso, i e ta Kreador di tur kos. (Lesa Revelashon 4:11.) Tambe e ta e Skuchadó di orashon. Nos ta usa su nòmber ora nos ta hasi orashon i ora nos ta papia ku otro hende tokante dje. (Sal. 65:2) Pero tin algu mas ku nos tin ku rekonosé tokante Yehova. Kòrda ku e hendenan ku tabata skucha Pedro na Pentekòste tabata konosé Yehova kaba. Pero nan mester a rekonosé ku ta pa medio di Hesukristu so Yehova ta duna hende bida eterno.—Rom. 5:8.

13. Pa nos boutisá den nòmber di e Yu, kiko nos mester rekonosé? (Wak e plachi.)

¹³ Den nòmber di e Yu. Hesus tambe tin algun ròl ku nos tin ku rekonosé. Por ehèmpel, Hesus ta Yu di Dios. Ademas, Hesus ta “e kaminda,” pasobra ta pa medio di dje so nos por tin un bon amistat ku Yehova. (Huan 14:6) Tambe nos ta rekonosé ku ta pa medio di Hesus su morto, nos por haña bida eterno. P’esei, semper bai nos ke imit’é, i no djis riba dia di nos boutismo. (1 Huan 2:6) Pues, imitando Hesus, nos no ta laga nada stroba nos di prediká. (Lúk. 4:43) Anto nos ta sigui sirbi Yehova fielmente asta ora nos ta ser persiguí. (2 Tim. 3:12) Ademas, nos ta respetá Hesus komo “kabes di e kongregashon.” P’esei, nos ta sigui guia di esnan ku el a enkargá pa dirigí i kuida su siguidónan.—Efe. 4:​8, 11, 12; 5:​23, nota.

14. (a) Pa nos boutisá den nòmber di spiritu santu, kiko nos mester rekonosé? (Wak e plachi.) (b) Den ki manera mas e ungínan ta ser boutisá? (Wak e kuadro “Mas Manera Ku e Ungínan Ta Ser Boutisá.”)

¹⁴ Den nòmber di spiritu santu. Pa boutisá den nòmber di spiritu santu, nos mester aseptá loke Beibel ta bisa tokante spiritu santu. Beibel ta mustra ku spiritu santu no ta un persona ni e no ta parti di un trinidat, pero e ta Dios su forsa aktivo. Nos ta rekonosé ku Yehova a usa su spiritu santu pa guia su profetanan i pa yuda e eskritornan di Beibel sa kiko pa skirbi den su Palabra. P’esei, nos ta lesa Beibel regularmente, i nos ta apliká loke nos ta siña. (2 Ped. 1:​20, 21) Ademas, nos ta hasi nos máksimo esfuerso pa evitá kualke piká grave, pasobra nos no ke stroba Yehova di duna nos òf e kongregashon spiritu santu.—Efe. 4:30.

15. Kiko ta importante pa bo sigui hasi?

¹⁵ Si bo ta boutisá kaba, ta importante pa tempu tempu bo pensa bèk riba bo boutismoc i dikon e ta asina importante. Ademas, bo ke hasi tur loke bo por pa kumpli ku e promesa ku bo a hasi ora bo a dediká bo mes na Yehova i boutisá. Pero kisas bo no a boutisá ainda. Tin algu ta stroba bo di hasi esei? Den e siguiente artíkulo, nos lo trata kiko por yuda bo pa yega na bo meta di boutismo.