Bo Por Tin un Bon Relashon ku Bo Famianan Ku No Ta Testigu!

1-2. Dikon algun di nos kisas no tin un bon relashon ku nos famianan ku no ta Testigu?

HESUS a bisa un hòmber ku kier a bira su siguidó lo siguiente: “Bai kas serka bo famianan, i konta nan tur loke Yehova a hasi pa bo.” (Mar. 5:19) Hesus a bisa esei pasobra e tabata sa ku mayoria di hende gusta kompartí bon notisia ku nan famianan.

² Bo ta kòrda kon bo a sinti bo ora bo a kuminsá studia Beibel pa promé biaha? Kasi sigur bo tabatin gana di konta tur bo famianan tokante e kosnan nobo ku bo tabata siñando. Pero kisas nan no kier a tende. Òf bo no tabatin muchu takto ora bo a purba di prediká na nan, i esei a ofendé nan. Si ta asina, e artíkulo akí por yuda bo! Lo bo mira kiko bo por hasi pa keda fiel na Yehova i tòg tin un bon relashon ku bo famianan.

3. Kiko nos lo trata den e artíkulo akí?

³ Den e artíkulo akí, nos lo trata kuater kos ku por yuda nos tin un bon relashon ku nos famianan: (1) si nos purba di komprondé pa nos famianan, esei lo motivá nos pa mustra amor na nan, asta ora nan no ke siña tokante Yehova; (2) kiko nos por hasi ora nos famianan ta hasi òf bisa kos ku ta hùrt nos; (3) kon nos por tin un efekto positivo riba nos famianan si nos sigui tene pasenshi i karga speransa ku un dia nan lo sirbi Yehova i (4) kon nos por mustra nos famianan ku nos ta stima nan.

PURBA DI KOMPRONDÉ PA BO FAMIANAN I YUDA NAN

4. Kon Hesus tabata trata hende ku no tabata interesá den su mensahe?

⁴ Hesus no a stòp di purba di yuda hende ku no tabata interesá den su mensahe. El a kompará su mes ku un hòmber ku a hasi tur loke ku e tabata por pa yuda un palu pari fruta. (Lúk. 13:​6-9) Ora Hesus a duna e ilustrashon ei, ya kaba e tabatin mas ku tres aña ta purba di yuda e hudiunan pone fe den dje i bira su disipel. Hesus no kier a stòp di yuda nan pasobra e tabata stima nan, i e tabata komprondé kon nan tabata pensa i sinti. P’esei, e tabatin asina tantu pasenshi ku nan.

5. Dikon Hesus tabatin duele di e hudiunan?

⁵ Hesus tabatin duele di e hudiunan pasobra e lidernan religioso no a yuda e pueblo tin fe den Yehova. Hesus a mira ku e pueblo tabata “manera karné sin wardadó.” (Mar. 6:34) Poko promé ku Hesus a muri, el a asta yora ora el a pensa riba Herúsalèm. E tabata sa ku hopi di e habitantenan lo a muri debí ku nan no tabatin fe den dje ni den Yehova. (Lúk. 19:​41-44) Nos mester pensa i sinti meskos ku Hesus. Si nos sinti duele di nos famianan, esei lo duna nos mas gana di prediká na nan.

6. Dikon nos mester tene pasenshi ku nos famianan ku no ta Testigu? (Galationan 6:9)

⁶ Lesa Galationan 6:9. Si ainda nos famianan no ta interesá den e bèrdat, nos mester tene pasenshi ku nan i “no stòp di hasi loke ta bon,” esta, di yuda nan. Nos sa ku no ta di un dia pa otro un persona ta kambia su manera di pensa i ta haña fe den Yehova. Kisas un tempu bo tambe tabata den nan situashon; ‘bo no tabatin speransa, i bo tabata biba den mundu sin konosé Dios.’ (Efe. 2:12) Pero un hende tabatin pasenshi ku bo i a yuda bo siña konosé Yehova i hasi kambio. Ora bo pensa riba esei, bo no ta haña gana di yuda bo famianan pa siña konosé Yehova?

PURBA DI KOMPRONDÉ DIKON BO FAMIA TA HASI KOS KU TA HÙRT BO

7. Kiko kisas a stroba e rumannan di Hesus di bira su disipel?

⁷ Hesus su rumannan probablemente tabata sa di e milagernan ku Hesus a hasi na Galilea. (Lúk. 4:​14, 22-24) Apesar di esei, nan no a bira su disipelnan mesora. (Huan 7:5) Dikon? Beibel no ta bisa esei. Beibel ta mustra sí kiko a stroba algun hudiu di bira disipel di Hesus. Algun di nan tabatin miedu pa nan bisiñanan bira kontra nan. (Huan 9:​18-22) Algun otro hudiu tabata konosé Hesus for di chikitu i nan tabata haña difísil pa kere ku Hesus por tabata e Mesías. (Mar. 6:​1-4) Kisas Hesus su rumannan tambe tabata pensa e kosnan ei. E kosnan ku a stroba nan por ta strobando bo famianan tambe di konosé e bèrdat?

8. Dikon tin biaha nos famianan por bisa òf hasi algu ku ta hùrt nos?

⁸ Purba di saka afó dikon bo famianan ta hasi kos ku ta hùrt bo. Kisas e rumannan di Hesus tambe tabata entre e famianan di Hesus ku a bisa ku el “a bira loko.” (Mar. 3:21) Dikon nan a bisa algu asina? E relato di Beibel ta mustra ku Hesus tabata asina drùk ta prediká i kura hende ku e no tabatin ni chèns di kome algu. (Mar. 3:20) Pues, kisas su famianan a pensa ku e tabata un fanátiko. Nos famianan tambe kisas ta pensa ku nos ta fanátiko i ku nos ta dediká muchu tempu na nos religion. Si ta asina, lo ta bon pa nos mustra den loke nos ta hasi i bisa ku nos ta rasonabel.

9. Kiko lo por yuda nos famianan kambia nan manera di pensa tokante Testigunan di Yehova? (1 Pedro 3:​1, 2) (Wak e plachinan.)

⁹ Sigui hasi bo bèst pa ta amabel i rasonabel. Si nos papia na un manera amabel ku nos famianan i trata nan bon, esei lo por kambia nan manera di pensa tokante Testigunan di Yehova. (Lesa 1 Pedro 3:​1, 2.) Por ehèmpel, kisas un ruman muhé su kasá no ta den e bèrdat. E kasá por sintié malu ora e ruman muhé bai lag’é su so ora e bai reunion òf sirbishi. Komo ku e ruman muhé no ke pa e kasá sintié asina, kisas lo e por hasi algun kambio den su skèdjel di kosnan spiritual pa e por pasa mas tempu ku su kasá. Por ehèmpel, lo e por bai sirbishi ora e kasá tin ko’i hasi òf ora e kasá no ta na kas. Ora un ruman muhé ta dispuesto pa hasi kambio pa hasi su kasá kontentu, esei lo por pone e kasá kambia su manera di pensa tokante Testigunan di Yehova.

10. Ora hende papia malu di nos, kon nos por imitá Hesus?

¹⁰ No ta semper bo mester defendé bo mes. Ora hende tabata bisa ku Hesus tabata kome i bebe di mas, e no a rabia ni sinti ku e mester a defendé su mes. Na lugá di esei, e tabata ke pa hende wak kon e ta hiba su bida i asina yega na e konklushon korekto. (Mat. 11:19) Ademas, semper el a mustra ku e ta un persona rasonabel i felis. (Kompará ku Huan 2:​2, 6-10.) Meskos ku Hesus, no ta semper nos mester defendé nos mes ora hende ta papia malu di nos. En bes di esei, mustra bo famianan ku bo ta un persona rasonabel i felis i laga nan mes saka nan konklushon. Ora nos famianan opservá nos bida, kisas nan mes lo ripará ku e kosnan malu ku hende ta papia di nos no ta bèrdat.

TENE PASENSHI I NO PÈRDÈ SPERANSA

11. Kon Hesus a trata su rumannan?

¹¹ Beibel ta mustra ku Hesus a tene pasenshi ku su rumannan. Maske Hesus su rumannan a mir’é hasi su promé milager na Kana, esei no a pone nan kere ku e ta e Mesías. (Huan 2:​11, 12) Pero Hesus no a stòp di wòri ku nan pasobra nan no a kere den dje. Beibel ta mustra ku mas o ménos tres aña despues di Hesus su milager na Kana, ainda Hesus tabata papia nèchi ku su rumannan.—Huan 7:​5-8.

12. Kiko por yuda nos no pèrdè speransa ku un dia algun di nos famianan lo kuminsá sirbi Yehova?

¹² Nos a siña hopi tokante Yehova su miserikòrdia últimamente. Ora nos pensa riba esei, e por yuda nos pa no pèrdè speransa ku un dia nos famia por bin den e bèrdat. Ora religion falsu ser destruí, nos famianan por kòrda ku nos a bisa nan ku esei lo pasa.a (Rev. 17:16) Kisas esei lo por motivá nan pa kuminsá sirbi Yehova despues ku tribulashon grandi kuminsá. Pero nos no mester warda te tribulashon grandi pa yuda nos famianan. For di awor, nos por yuda nos famianan ora nan pasa den situashon difísil. Ora nan mira kuantu nos ta stima nan, kisas nan lo haña gana di siña mas tokante Beibel.

MUSTRA BO FAMIANAN KU BO TA STIMA NAN

13. Maske nos ta drùk komo sirbidó di Yehova, kiko nos mester tene kuenta kuné?

¹³ Ta bèrdat ku komo sirbidó di Yehova nos tin hopi kos di hasi. Pero nos no ke laga nos famianan kere ku nos no ke pasa tempu ku nan òf ku nos no stima nan mas. (Mat. 7:12) Kon nos por mustra nan ku nos ta stima nan? Ban wak algun kos ku nos por hasi.

14-15. Kon ta un manera ku nos por mustra nos famianan ku nos ta stima nan? Duna un ehèmpel.

¹⁴ Papia ku nan regularmente i mustra nan ku bo ta stima nan. Nos ta mustra nos famianan ku nos ta stima nan dor di komuniká ku nan regularmente. Por ehèmpel, nos por manda nan un mensahe i potrèt di kosnan leuk ku nos a hasi. Ademas, nos por duna nan un regalo chikitu òf nos por skirbi un karta pa nan ku ta mustra ku nos ta apresiá nan. Esei por yuda mehorá boso relashon. Ora nos purba di hasi e kosnan ei, nos ta mustra nos famianan ku nos ta stima nan.

¹⁵ Wak e ehèmpel di Anna, un ruman muhé na Armenia. Anna su famia ta pasa hopi tempu huntu. Nan ta selebrá hasimentu di aña huntu i otro dia di fiesta. Ora Anna a bira un Testigu di Yehova, su famianan a kuminsá preokupá ku Anna lo a stòp di pasa tempu ku nan. Tambe nan a pensa ku awor su bida lo a bira mas difísil. Kiko Anna ta hasi pa laga su famianan sinti nan mas trankil? El a bisa: “Ora mi bishitá mi famianan, mi ta konta nan kiko ta pasando den mi bida i konta nan di algun kos ku mi ta bezig kuné. Tambe mi ta invitá nan na mi kas i laga nan sera konosí ku algun di mi amigunan. Dor di esei, mayoria di mi famianan konosé mi amigunan bon i nan ta sinti nan kómodo pa papia ku nan. Hopi di mi famianan a bisa ku mi ta mustra felis i ku nan no ta sinti nan preokupá mas.”

16. Kon Hesus a mustra Santiago ku e ta stim’é? (Wak nota.)

¹⁶ Mustra bo famianan ku nan ta importante pa bo. Despues ku Hesus a resusitá, el a mustra su ruman Santiago ku e tabata stim’é dor di aparesé na dje i papia kuné. (1 Kor. 15:7) Sin duda, Santiago lo a keda hopi kontentu ora el a ripará ku Hesus ainda tabata stim’é. Probablemente, ta na e okashon ei, Santiago a bira konvensí ku Hesus ta e Mesías. Despues ku Hesus a aparesé na Santiago, Santiago kisas lo a bai papia ku su famianan i yuda nan komprondé ku Hesus ta e Mesías.b—Echo. 1:14.

17. Kon nos por apliká e prinsipio na Romanonan 12:15? (Wak e plachi.)

¹⁷ Lesa Romanonan 12:15. Nos famianan lo eksperensiá momentonan bon i momentonan malu den nan bida. Si semper nos t’ei pa nan, nan lo sinti ku nos ta stima nan. Esei lo por pone nan kambia nan manera di pensa di Testigunan di Yehova.c Por ehèmpel, ora un famia di nos haña yu, nos por mustra nan ku nos ta masha kontentu i nos por asta duna nan un regalo. Si un famia di nos pèrdè un ser kerí, nos por konsolá nan dor di manda nan un karchi òf nos por yuda nan di otro manera. Semper nos por yama nan, manda nan mensahe òf bishitá nan, spesialmente ora nan ta pasa den momentonan difísil.

18. Kon nos por imitá Andres?

¹⁸ Laga nan sera konosí ku otro ruman. Ora Disipel Andres a haña sa ku Hesus ta e Mesías, el a kore bai bisa su ruman Pedro pa e bin sera konosí ku Hesus. (Huan 1:​40-42) Nos por hasi algu similar ku nos famianan? Por ehèmpel, nos por invitá un famia di nos na reunion òf nos por invitá nan pa bin kome algu ku nos rumannan. Ora nos famianan konosé nos rumannan, nan lo realisá ku nos ta hende masha normal i ku nos ta amabel.

19. Asta si nos famianan no ta komprondé dikon nos tin sierto kreensia, kon nos mester trata nan? (1 Pedro 3:15)

¹⁹ Lesa 1 Pedro 3:15. No ta semper nos famianan lo komprondé dikon nos ta keda sin hasi sierto kos. Pero nan lo keda kòrda ku semper nos a trata nan bon i ku nos a mustra nan rèspèt. Maske nos no por partisipá ku nan den sierto selebrashonnan òf kustumbernan ku ta bai kontra Beibel, nan lo apresiá ku bo ta buska otro oportunidat pa pasa tempu ku nan. Por ehèmpel, nos por bishitá nan, kome algu ku nan òf duna nan regalo.

SIGUI PURBA DI YUDA BO FAMIANAN

20. Dikon Santiago su ehèmpel ta yuda nos pa no pèrdè speransa ku nos famianan lo por kuminsá sirbi Yehova?

²⁰ Santiago no a haña chèns pa kompañá Hesus durante su sirbishi. Pero mas despues el a bira un disipel di Hesus sí, i el a mustra ku el a balorá Hesus su siñansanan. (Gal. 1:​18, 19; 2:9) Nos sa esei pasobra den e karta ku Santiago a skirbi pa e kristiannan, el a menshoná vários lès ku tabata similar na loke Hesus a bisa den su Diskurso Riba Seru.d

21. Dikon nos mester sigui hasi esfuerso pa purba di yuda nos famianan?

²¹ Apesar di tur nos esfuersonan, tin famia ku lo no kambia e manera ku nan ta trata nos òf lo no mustra interes den e bèrdat. Dikon nos no mester stòp di purba di yuda nan? Pasobra kada biaha ku nos mustra amor pa nos famianan, nos ta imitando nos miserikòrdioso Dios Yehova i su Yu Hesus. (Lúk. 6:​33, 36) Si nos sigui hasi esei, ku tempu, nan lo por kambia nan manera di pensa tokante Testigunan di Yehova. Ademas, maske na promé instante no ta parse asina, probablemente, nan lo kòrda hopi di e kosnan ku nos a konta nan tokante Yehova. Si nos sigui hasi esfuerso pa yuda nos famianan i mustra nan amor, kisas na dado momento, nan lo disidí di sirbi Yehova huntu ku nos i esei lo hasi nos masha kontentu!