Hóben—Sigui Krese Despues di Bo Boutismo

1. Kiko ta algun bon kos ku hopi hóben a logra hasi?

TUR aña míles di hóben ta batisá. Abo a batisá kaba? Si ta asina, tantu e rumannan den bo kongregashon komo Yehova ta hopi kontentu ku bo eskoho. (Pro. 27:11) Djis para pensa riba tur e kosnan ku bo a logra. Bo a hasi bo bèst pa studia Beibel, kisas durante vários aña. Debí na esei, bo ta konvensí ku Beibel ta e Palabra di Dios. Pero mas importante ainda, bo a siña konosé i stima e Outor di Beibel. Bo amor p’e a bira asina fuerte ku bo a disidí di dediká bo bida na dje i batisá. Esei tabata un bon desishon!

2. Kiko nos ta bai trata den e artíkulo akí?

² Promé ku bo a batisá, lo tabatin hopi kos ku a pone bo fe na prueba. Pero, segun ku añanan ta pasa lo bo haña bo ku mas prueba. Dikon? Pasobra Satanas ke pa bo stòp di stima Yehova. P’esei, lo e hasi tur manera pa stroba bo. (Efe. 4:14) No laga esei pasa ku bo! Kiko por yuda bo keda fiel na Yehova i kumpli ku bo dedikashon? Bo tin ku sigui hasi esfuerso “pa alkansá madures” kristian, esta, pa sigui krese den sentido spiritual. (Heb. 6:1) E artíkulo akí lo mustra bo kon pa logra esei.

KON PA KRESE DEN SENTIDO SPIRITUAL

3. Kiko tur kristian tin ku hasi despues di boutismo?

³ Despues di boutismo, nos tur tin ku sigui e konseho ku Apòstel Pablo a duna e kristiannan na Efeso. El a animá nan pa ta “kompletamente desaroyá.” (Efe. 4:13) Ku otro palabra, nan mester a sigui krese den sentido spiritual. Pablo a kompará kresementu spiritual ku kresementu di un mucha. Ora un bebi kaba di nase, su mayornan ta loko-loko kuné i masha orguyoso. Lo e no keda bebi pa semper. Ku tempu, lo e “pone kos di mucha un banda.” (1 Kor. 13:11) Meskos ta konta pa nos komo kristian. Despues di boutismo, nos tin ku sigui krese den sentido spiritual. Pero, kon bo por hasi esei? Laga nos wak algun manera.

4. Splika kiko por yuda bo krese den sentido spiritual. (Filipensenan 1:9)

⁴ Stima Yehova mas i mas. Ta bisto ku bo ta stima Yehova masha hopi mes. Pero, bo amor p’e por bira mas fuerte ainda. Kon? Apòstel Pablo ta menshoná un manera na Filipensenan 1:9. (Les’é.) Pablo a pidi Yehova pa e amor di e kristiannan di Filipo “krese mas i mas.” Pues, ta posibel pa stima Yehova mas ainda. Pa logra esei nos mester di “konosementu eksakto i pleno disernimentu.” Dikon? Pasó, mas mihó nos siña konosé Yehova, mas nos lo stim’é i mas nos lo gusta su personalidat i manera di hasi kosnan. Nos lo ke hasi tur loke nos por pa hasié felis i nunka nos lo no ke hasi nada pa kibra su kurason. Ademas, nos lo ke hasi nos esfuerso pa haña sa kiko ta su boluntat i buska manera pa kumpli ku esei.

5-6. Kiko nos por hasi pa stima Yehova mas ainda? Splika.

⁵ Hesus a imitá Yehova su personalidat perfektamente. P’esei, un otro kos ku nos por hasi pa stima Yehova mas ainda ta di siña konosé Hesus mihó. (Heb. 1:3) Anto e mihó manera pa siña konosé Hesus ta di studia e kuater Evangelionan. Si ainda bo no tin e kustumber di lesa Beibel tur dia, kuminsá ku e Evangelionan. Segun ku bo ta lesa e relatonan tokante Hesus, purba di mira su kualidatnan. E tabata aserkabel. Hende tabata sinti nan kómodo rònt di dje; asta mucha chikitu. (Mar. 10:13-16) Hesus tabata amigabel i su disipelnan no tabatin miedu di kont’é kon nan tabata sinti. (Mat. 16:22) Hesus tabata asina pasó su Tata tambe ta asina. Yehova tambe ta masha aserkabel. Nos por aserk’é libremente den orashon i deshogá nos kurason serka dje sin tin miedu ku e ta bai husga nos. E ta stima nos i ta interesá den nos.—1 Ped. 5:7.

⁶ Hesus a sinti kompashon pa hende. Apòstel Mateo a bisa: “Ora el a mira e multitut, el a haña duele di nan, pasobra nan tabata soyá i deskuidá, manera karné sin wardadó.” (Mat. 9:36) I kiko di Yehova? E tambe ta sinti asina? Hesus a bisa: “Mi Tata ku ta den shelu no ta deseá pa ni ún di e chikitunan akí bai pèrdí.” (Mat. 18:14) Ki dushi ta pa sa ku Yehova ta stima nos asina tantu. Mas mihó nos siña konosé Hesus, mas fuerte nos amor pa Yehova lo bira.

7. Dikon ta bon pa bo pasa tempu ku rumannan ku tin amistat será ku Yehova?

⁷ Un otro kos ku tambe por yuda bo stima Yehova mas ainda i sigui krese den sentido spiritual ta di siña konosé rumannan spiritualmente madurá, esta, esnan ku tin amistat será ku Yehova. Ripará kon alegre nan ta. Nan no tin niun tiki duele ku nan a disidí di sirbi Yehova. Pidi nan konta bo algun di nan eksperensianan. Bo por pidi nan konseho ora bo tin ku tuma un desishon importante. Kòrda ku “kaminda tin hopi konsehero tin viktoria.”—Pro. 11:14.

8. Kiko bo por hasi si bo sinti ku bo a kuminsá duda den loke Beibel ta bisa?

⁸ Kita bo dudanan. Manera paragraf 2 a mustra, Satanas lo purba di stroba bo di krese den sentido spiritual. Un manera ku e ta hasi esei ta ku duda. E ke pa bo kuminsá duda den loke Beibel ta bisa. Por ehèmpel, algun hende por purba di konvensé bo ku Dios no a krea nos sino ku nos ta eksistí debí na evolushon. Kisas ora bo tabata chikitu bo no tabatin ku wòri ku e teoria ei, pero awor ku bo ta mas grandi bo ta hañ’é den bo lèsnan di skol. Kisas e manera ku bo maestronan ta splika evolushon ta asina konvinsente ku e ta kuminsá zona lógiko. Pero, e maestronan ei kisas nunka no a hasi esfuerso pa haña sa si tin un Kreador. Ta bon pa kòrda loke Proverbionan 18:17 ta bisa: “Esun ku ta promé pa pleita su kaso ta parse hustu, te ora ku un otro bin interog’é.” Pues, na lugá di djis bai tras di tur kos ku nan ta siña bo na skol, tuma tempu i studia loke Beibel ta bisa. Hasi investigashon den nos publikashonnan. Papia ku rumannan ku ántes tabata kere den evolushon i puntra nan kiko a konvensé nan ku tin un Kreador ku ta stima nos. E tipo di kòmbersashonnan ei por yuda bo bira mas konvensí ku tin un Kreador.

9. Kiko bo a siña for di Melissa?

⁹ Un ruman ku yama Melissa a hasi investigashon tokante kreashon i esei a yud’é kita su dudanan.b El a bisa: “E manera ku nan tabata splika evolushon na skol tabata zona masha konvinsente. Na promé instante mi tabatin miedu pa hasi investigashon pa no resultá ku loke nan ta bisa ta bèrdat. Pero m’a kòrda ku Yehova ke pa nos sirbié pasobra nos ta konvensí di esei. Pues, m’a hasi investigashon tòg. M’a lesa e buki ¿Existe un Creador que se interese por nosotros? i e foyetonan Bida Ta Obra di un Kreador? i tambe El origen de la vida. Cinco cuestiones dignas de análisis. Esei tabata nèt loke mi tabatin mester. Mare m’a hasi esei mas promé.”

10-11. Kiko por yuda bo keda limpi den bista di Yehova? (1 Tesalonisensenan 4:3, 4)

¹⁰ Rechasá inmoralidat seksual. Ora bo ta hóben, e deseo pa hasi sèks por ta hopi fuerte. I tin biaha bo por haña bo ku hopi preshon pa kometé inmoralidat seksual. Anto ta nèt esei ta loke Satanas ke pa bo hasi. Kiko por yuda bo pa no kai den e trampa ei? (Lesa 1 Tesalonisensenan 4:3, 4.) Bisa Yehova loke bo ta sinti, habri bo kurason i bis’é tur kos. Pidié duna bo forsa. (Mat. 6:13) Kòrda ku e ke yuda bo. Lo e no rabia ku bo ni husga bo. (Sal. 103:13, 14) Lesamentu di Beibel tambe por yuda bo. Melissa, menshoná na paragraf 9, tabata lucha ku pensamentunan inmoral. El a bisa: “Lesamentu di Beibel tur dia a yuda mi pa mi no entregá. Esei a yuda mi kòrda ku mi ta pertenesé na Yehova i ku mi ke sirbié.”—Sal. 119:9.

¹¹ No purba di resolvé bo problemanan riba bo mes. Kòmbersá ku bo mayornan i konta nan kiko bo ta pasando aden. Ta bèrdat ku no ta fásil pa bo papia ku nan tokante algu asina personal, pero ta importante pa bo hasi esei. Melissa a bisa: “M’a pidi Yehova duna mi kurashi, anto djei m’a papia ku mi tata tokante mi problema. Despues di esei, m’a sinti un gran alivio. Mi tabata sa ku Yehova ta orguyoso di mi.”

12. Kiko por yuda bo tuma bon desishon?

¹² Sigui e prinsipionan di Beibel. Tiki-tiki bo mayornan lo duna bo mas libertat pa tuma bo mes desishonnan. Pero, ainda tin hopi kos ku bo tin ku siña den bida. Kon bo por evitá di hasi algu ku lo daña bo amistat ku Yehova? (Pro. 22:3) Un ruman ku yama Kari ta splika loke a yud’é tuma bon desishon. El a komprondé ku un kristian madurá no mester di regla pa delaster un kos den bida. El a bisa: “M’a siña ku na lugá di sigui regla, mi mester komprondé prinsipionan di Beibel, esta, kon Yehova ta mira i pensa tokante sierto kosnan.” Pues, ora bo ta lesa Beibel, puntra bo mes: ‘Kiko e relato akí ta siña mi tokante Yehova su manera di pensa? M’a mira un prinsipio ku por yuda mi tuma bon desishon? Si ta asina, dikon ta bon pa mi apliká e prinsipio ei?’ (Sal. 19:7; Isa. 48:17, 18) Ora bo lesa Beibel i tuma tempu pa komprondé bon loke bo a kaba di lesa, lo bo mira ku ta hopi mas fásil pa bo tuma desishonnan ku ta agradá Yehova. Segun ku bo ta sigui krese den sentido spiritual, lo bo ripará ku bo no mester di regla pa delaster un kos pasobra lo bo komprondé Yehova su manera di pensa.

13. Kon bon amigu por yuda bo? (Proverbionan 13:20)

¹³ Skohe amigu ku ta stima Yehova. E amigunan ku bo skohe lo tin un influensia hopi grandi riba bo kresementu spiritual. (Lesa Proverbionan 13:20.) Un ruman ku yama Sara a kuminsá sintié desanimá. Pero algu a pasa ku a yud’é haña su goso bèk. El a bisa: “M’a haña bon amigu nèt ora mi tabatin mester di esei. Tur siman un ruman muhé tabata prepará E Toren di Vigilansia huntu ku mi. Anto un otro amiga a yuda mi kuminsá duna komentario na reunion. Debí na e yudansa ku m’a haña di e amiganan ei, m’a kuminsá tuma orashon i mi estudio personal mas na serio. Mi amistat ku Yehova a bira mas fuerte i m’a kuminsá haña mi goso atrobe.”

14. Kon Julien a logra haña bon amigu?

¹⁴ Kiko bo por hasi pa haña bon amigu ku ta stima Yehova? Julien, ku aworakí ta un ansiano, a bisa: “Tempu mi tabata hóben mi tabata sera amistat ku e rumannan ku mi ta traha den sirbishi kuné. Nan tabata prediká ku hopi entusiasmo, i nan a yuda mi mira kon dushi sirbishi por ta. E ora ei m’a kuminsá pone meta pa traha komo pionero regular. Anto m’a bin komprondé tambe ku e motibu pakiko mi no tabatin hopi bon amigu ta pasobra mi tabata buska amistat di mi edat so. Mas despues ora m’a bai Bètel, tambe m’a haña bon amigu. Nan a yuda mi skohé mihó entretenimentu. Anto tur esei a yuda mi mehorá mi amistat ku Yehova.”

15. Ki spièrtamentu Pablo a duna Timoteo? (2 Timoteo 2:20-22)

¹⁵ Kiko si bo ripará ku un hende den bo kongregashon no ta un bon amistat pa bo? Pablo tabata sa ku tabatin un par di hende den kongregashon ku no tabata hasi manera un kristian mester hasi, anto el a spièrta Timoteo pa keda leu for di nan. (Lesa 2 Timoteo 2:20-22.) Nos amistat ku Yehova ta hopi presioso pa nos i nos a hasi hopi esfuerso pa kultiv’é. P’esei, nos no mester permití nada ni niun hende daña e amistat ei.—Sal. 26:4.

KON BO METANAN POR YUDA BO KRESE DEN SENTIDO SPIRITUAL?

16. Ki meta bo mester pone?

¹⁶ Pone meta ku ta bale la pena. Skohe meta ku lo yuda bo fortalesé bo fe i yuda bo bira un kristian madurá. (Efe. 3:16) Por ehèmpel, kisas bo por mehorá bo estudio personal i lesamentu di Beibel. (Sal. 1:2, 3) Òf por ta bo por hasi mas orashon i laga bo orashon ta di kurason. Òf kisas bo mester sigui wak bon ki entretenimentu bo ta skohe i kon bo ta usa bo tempu. (Efe. 5:15, 16) Ora Yehova mira kuantu esfuerso bo ta hasi pa krese den sentido spiritual, sigur lo e ta hopi felis.

17. Dikon ta bon pa bo yuda otro hende?

¹⁷ Pa bo krese den sentido spiritual ta importante tambe pa bo yuda otro hende. Hesus a bisa: “Tin mas felisidat den duna ku den risibí.” (Echo. 20:35) Lo bo benefisiá si bo usa parti di bo tempu i energia pa yuda otro hende. Por ehèmpel, bo por pone meta pa yuda e rumannan di edat òf esnan ku ta malu den bo kongregashon ku nan kompra òf ku nan tablet i telefòn. Anto si bo ta un ruman hòmber, bo por pone meta pa bira sirbidó ministerial ya asina bo por yuda bo rumannan mas. (Flp. 2:4) Bo ta mustra ku bo ta stima hende tambe ora bo ta prediká. (Mat. 9:36, 37) P’esei, si bo por, purba di pone meta pa traha pionero regular, traha na Bètel òf riba proyekto di konstrukshon.

18. Kon sirbishi di tempu kompleto por yuda bo krese den sentido spiritual?

¹⁸ Sirbishi di tempu kompleto ta duna bo hopi oportunidat pa hala mas serka Yehova. Si bo ta pionero regular, bo por bai Bètel, traha riba proyektonan di konstrukshon òf asta bai Skol pa Predikadó di Reino (SKE). Un pionero hóben ku yama Kaitlyn a bisa: “Loke a yuda mi krese masha hopi mes den sentido spiritual despues di mi boutismo tabata di traha den sirbishi ku rumannan ku tabata spiritualmente madurá. Nan ehèmpel a animá mi pa mi studia mi Beibel mas i pa mehorá mi abilidat pa siña hende.”

19. Ki bendishonnan lo bo haña ora bo sigui krese den sentido spiritual?

¹⁹ Si bo sigui krese den sentido spiritual, lo bo haña masha hopi bendishon. Por ehèmpel, lo bo no gasta bo tempu i energia hasiendo kosnan ku no ta bale la pena. (1 Huan 2:17) Lo bo skapa e doló di kurason di a tuma mal desishon. En bes di esei lo bo tin éksito i lo bo ta felis. (Pro. 16:3) Bo bon ehèmpel lo animá otro ruman, tantu esnan yòn komo esnan di edat. (1 Tim. 4:12) I mas importante ainda, lo bo disfrutá di e pas i e felisidat ku bo ta haña ora bo sa ku bo ta hasiendo Yehova su kurason kontentu i ku bo ta su amigu.—Pro. 23:15, 16.