Mas Oportunidat pa Duna Gradisimentu na Yehova

1. Ki areglo nobo lo yuda nos “duna masha hopi gradisimentu na SEÑOR”?

¹ For di mart di e aña akí tin un areglo nobo pa ku e trabou di pionero ousiliar. Publikadónan awor tin oportunidat pa traha pionero ku un rekisito di 30 ora tantu den mart komo aprel i tambe e lunanan ku e superintendente di sirkuito ta bishitá e kongregashon. Si e fecha di e bishita ta pasa di un luna pa otro, e publikadónan ku apliká pa traha pionero a base di 30 ora por skohe un di e dos lunanan ei. Tur pionero ousiliar por asistí i disfrutá di henter e reunion ku e superintendente di sirkuito lo tene ku e pioneronan regular i spesial. Esaki ta nifiká ku si debí na sirkunstansia nos no por traha pionero a base di 50 ora, tòg nos por, te ku kuater biaha pa aña, “duna masha hopi gradisimentu na SEÑOR” trahando pionero ousiliar a base di 30 ora!—Sal. 109:30; 119:171.

2. Di kiko esnan ku traha pionero ousiliar durante bishita di e superintendente di sirkuito lo disfrutá?

² Durante Bishita di e Superintendente di Sirkuito: Awor mas tantu publikadó por traha pionero ousiliar durante bishita di e superintendente di sirkuito i disfrutá di e interkambio di estímulo segun ku nan ta traha huntu kuné den sirbishi. (Rom. 1:11, 12) Tin chèns ku hopi pionero ta tuma un dia liber den siman pa traha ku e superintendente di sirkuito. Pero esnan ku no por haña dia liber por pidié pa traha ku nan sea djasabra òf djadumingu. Ademas, lo ta hopi animante pa e pioneronan ousiliar asistí n’e reunion di pionero huntu ku e pioneronan regular i spesial!

3. Dikon ta bon pa traha pionero ousiliar den e temporada di Memorial?

³ Den Mart i Aprel: Publikadónan ku anteriormente a yega di traha pionero ousiliar pa un luna a base di 30 ora den e temporada di Memorial awor por dupliká nan “sakrifisio di alabansa”! (Heb. 13:15) Nos tin bon motibu pa oumentá nos sirbishi trahando pionero ousiliar den mart i aprel. Pasobra tur aña den e lunanan ei, nos ta disfrutá di e kampaña pa invitá hende na Memorial. I komo ku hopi publikadó ta ekspandé nan sirbishi, nos lo por traha ku diferente di nan. Ademas, despues di Memorial nos ta rebishitá esnan ku a asistí na Memorial pa kultivá nan interes i animá tur hende pa asistí na e diskurso spesial. P’esei, laga bo kurason motivá bo pa probechá di e èkstra oportunidat akí pa traha pionero ousiliar.—Luk. 6:45.