Hasi Bon Uso di Dje

1. Ku kiko e tratado Sa e Bèrdat ta yuda nos?

¹ A prepará e tratado Bo Ke Haña Sa e Bèrdat? spesialmente pa yuda nos kuminsá estudio di Beibel. Pero e ta un medio efisiente tambe pa sembra simia di e bèrdat. (Ekl. 11:⁠6) At’akí algun sugerensia ku por yuda nos hasi bon uso di dje.

2. Kon nos por usa e tratado pa kuminsá un kòmbersashon?

² Pa Kuminsá Kòmbersashon: Bo por duna e doño di kas e tratado, mustr’é e seis preguntanan ku tin parti dilanti i puntr’é: “Kua di e preguntanan akí abo a yega di hasi bo mes?” Lag’é bisa bo kua, bai den e tratado i papia riba e kontesta bíbliko pa ún di su preguntanan i lesa ún di e tekstonan menshoná. Lesa òf resumí e informashon ku tin parti patras di e tratado, i ofresé e buki Beibel Ta Siña. Si e no tuma e buki, a lo ménos e tin e tratado ku lo por laga e bèrdat yega na su kurason.​—⁠Mat. 13:⁠23.

3. Kiko nos por hasi si un doño di kas ta okupá?

³ Si e Doño di Kas Ta Okupá: Lo bo por bis’é: “Ya ku nos a bini na un momento inoportuno, mi kier a laga e tratado akí pa bo. E tin seis pregunta básiko ku mayoria di nos a yega di hasi nos mes i e ta kontestá kada un di e preguntanan ei for di Beibel na un manera bon kla. E siguiente biaha ku nos topa, laga mi sa kiko bo ta pensa di e informashon.”

4. Ora nos prediká riba kaya, kiko nos por bisa un hende ku nos ofresé e tratado?

⁴ Ora Nos Ta Prediká Riba Kaya: Lo bo por bisa: “Kon ta bai? Bo a yega di hasi bo mes ún di e preguntanan akí? [Permití e persona kontestá.] Den e tratado akí bo ta haña kontestanan komprendibel i satisfaktorio di Beibel.” Si e persona no tin purá, kisas lo bo por papia riba un di e kontestanan ku tin den e tratado i asta ofresé e buki Beibel Ta Siña.

5. Kon nos lo por usa e tratado de bes en kuando ora no tin hende na kas?

⁵ Ora No Tin Hende na Kas: Den algun teritorio, publikadónan tin kustumber di laga literatura na un manera diskreto ora no tin hende na kas. Si esei ta un kustumber di bo kongregashon, pakiko no laga de bes en kuando e tratado Sa e Bèrdat. Ora bo bai bèk lo bo por bisa: “E último biaha ku nos a pasa akinan, bo no tabata na kas, p’esei nos a laga e tratado akí. Pa kua di e preguntanan akí lo bo ke haña un kontesta?”

6. Dikon e tratado Sa e Bèrdat ta práktiko?

⁶ E tratado Sa e Bèrdat ta presentá e bèrdat na un manera simpel i fásil. E ta atraé hende di tur religion i kultura. E ta fásil pa ofresé; asta hóbennan i publikadónan nobo por hasi esei. Bo ta hasi bon uso di dje na kada momento apropiá?