Bou di e gobièrnu di Dios, henter kreashon tabata uní i na pas ku otro

Dikon Nos Tin Mester di e Reino di Dios?

Na komienso di historia humano, nos Kreador, kende su nòmber ta Yehova, tabata e úniko Gobernante. Tur loke ku el a hasi pa hende ta pasobra e ta stima nan. El a traha un bunita hòfi den Eden pa nan biba den dje. I el a sòru tambe pa nan tin kuminda na abundansia. Ademas, el a duna hende trabou agradabel pa hasi. (Génesis 1:28, 29; 2:8, 15) Si hende no a rebeldiá kontra e gobièrnu amoroso di Dios, henter kreashon lo a keda uní i na pas ku otro.

Adam tin e fruta prohibí ku Eva a dun’é den su man. — E promé hendenan a rechasá Dios komo nan Gobernante

Beibel ta konta kon un angel rebelde, ku despues a haña e nòmber Satanas e Diabel, a kuestioná Dios su derecho di goberná. El a insinuá ku hende lo ta mas felis sin Dios su guia i gobernashon. Lamentablemente, nos promé mayornan, Adam ku Eva, a sigui Satanas su mal ehèmpel i a rebeldiá kontra Dios.—Génesis 3:1-6; Revelashon 12:9.

Komo ku Adam ku Eva a rechasá Dios komo nan Gobernante, nan a pèrdè e oportunidat di biba pa semper i di tin salú perfekto. (Génesis 3:17-19) Ademas, nan desishon a afektá e yunan ku nan a haña despues. Beibel ta bisa ku debí ku Adam a peka, “piká a drenta mundu, i morto pa medio di piká.” (Romanonan 5:12) Piká a hiba na un otro konsekuensia teribel: “Hende a ehersé outoridat riba . . . otro hende pa su daño.” (Eklesiástes 8:9) Ku otro palabra, ora hende goberná otro hende, semper lo tin problema.

KON GOBERNASHON HUMANO A KUMINSÁ?

Nimròd pará na un manera arogante. Den background, hende ta konstruyendo un edifisio. — Nimròd a rebeldiá kontra Yehova

E promé gobernante humano ku Beibel ta menshoná ta Nimròd. Nimròd a rebeldiá i a mustra ku e no tabata ke pa Yehova goberná riba hende. Desde e tempu ei padilanti, vários hòmber poderoso a usa nan poder pa kousa daño na otro hende. Un 3.000 aña pasá, e rei sabí Sálomon a skirbi: “Mi a wak e lágrimanan di esnan oprimí, i ku nan no tabatin ni un hende pa konsolá nan; i pa banda di nan opresornan tabatin poder.”—Eklesiástes 4:1.

E situashon no a kambia. Na 2009, un publikashon di Nashonnan Uní a bisa ku mas i mas hende ta mira mal gobernashon komo “un di e kousanan prinsipal ku kos malu ta sosodé na mundu awe.”

KAMBIO TA NA KAMINDA!

Mundu tin mester di mihó gobernante i un mihó forma di gobernashon. I esei ta eksaktamente loke nos Kreador a primintí.

Kolekshon di plachi: E resultado di gobernashon humano. 1. Un señora di Asia ta sinta den un kaya sushi i ta tene un bebi ku ta yora den su brasa. 2. Un hende di edat ku ta malu riba kama den hospital. 3. Sòldá ta tira ku nan armanan den kampo di bataya. 4. Hende ku ta protestá ta grita i tin spandoek tené den nan man. 5. Un señora i su yu muhé ta para pafó di nan kas, i a haña bentana di nan porta di kas kibrá. 6. Un stat tur na huma tin skorsten di fábrika i waya di koriente. — Asta e mihó gobièrnunan humano no a logra solushoná e problemanan grandi di humanidat

Dios a establesé un Reino, òf un gobièrnu, ku lo remplasá tur gobièrnu humano, i e gobièrnu ei “lo dura pa semper.” (Daniel 2:44) Esaki ta e Reino ku miónes di hende ta pidi p’e den orashon. (Mateo 6:9, 10) Pero Dios mes lo no goberná; el a nombra un persona ku a yega di biba riba tera pa bira Gobernante. Ken Dios a skohe? Ban wak.