Ora un Doño di Kas Ta Papia un Otro Idioma
1 Ku mas i mas frekuensia, publikadónan di Reino rònt mundu ta haña hende interesá ku no ta papia e idioma di nan kongregashon. Pa yuda e hendenan ei spiritualmente, hopi sukursal ta mira e nesesidat pa forma grupo- i kongregashonnan di otro idioma. Por tin área kaminda diferente idioma ta ser papiá i p’esei, kisas, vários kongregashon di diferente idioma ta haña nan ta prediká den e mesun teritorio. Kon e kongregashonnan por koperá ku otro pa hasi sigur ku e trabou di prediká ta bai na un manera organisá?—1 Kor. 14:33.
2 Bon Koperashon: Ora un publikadó ta prediká den kaya òf duna testimonio informal, e por aserká kualke hende, inkluso hende ku ta papia un otro idioma, i ofresé literatura den e idioma ku e persona ta preferá. Sin embargo, ora e publikadó bai di kas pa kas den áreanan kaminda un grupo òf kongregashon di otro idioma tambe ta traha, e mester enfoká generalmente riba kas di e hendenan ku ta papia e idioma di su kongregashon. Ora diferente kongregashon ta prediká den e mesun área, ta masha importante pa mantené un bon registro. E superintendentenan di sirbishi mester komuniká ku otro i organisá kos na un manera ku tur esnan enbolbí ta benefisiá. (Pro. 11:14) Sin embargo, si un publikadó topa un hende ku ta papia un otro idioma ora e ta prediká di kas pa kas i no tin kongregashon di e idioma ei den serkania, e mester hasi esfuerso pa duna e hende ei testimonio i sigui yud’é.
3 Hasiendo e Mesun Trabou: Kiko nos mester hasi ora publikadónan di diferente kongregashon ta predikando den e mesun área riba e mesun dia? Klaru ku amor kristian lo surpasá e barera di idioma i tur esnan enbolbí lo ta preokupá prinsipalmente tokante e nesesidat di e hendenan den e teritorio. (Juan 13:34, 35) P’esei, e rumannan ku ta hiba delantera lo ta rasonabel i lo desplegá amor ora nan tin ku disidí si un grupo temporalmente lo bai un otro teritorio.—Sant. 3:17, 18.
4 Beibel a profetisá ku hende di diferente idioma lo tende e bon nobo. (Rev. 14:6, 7) Si tur esnan enbolbí koperá bon ku otro, nos lo evitá di bai innesesariamente na e mesun kas i nos lo yega serka hopi otro hende ku e bon nobo, inkluyendo esnan ku ta papia un otro idioma.—Efe. 4:16.
[Study Questions]
1. Dikon tin mas nesesidat pa koperá ku otro ora di traha den teritorio?
2. Ora di prediká di kas pa kas, kon nos por koperá ku un grupo òf kongregashon di otro idioma den nos área?
3. Kiko nos tin ku hasi ora nos topa publikadónan di un grupo òf kongregashon di otro idioma ta traha den e mesun teritorio ku nos ta trahando?
4. Kua profesia ta kumpliendo awe?