Sea “Dispuesto pa Hasi Tur Bon Obra”
1 Ora Hesus a kuminsá ku un kampaña nobo di prediká, el a tuma tempu pa prepará su disipelnan. (Mat. 10:5-14) Apesar ku nos tur tin hopi kos di hasi, nos por logra bon resultado si nos tuma un par di minüt pa prepará promé ku nos partisipá den e ministerio di kas pa kas.—2 Kor. 9:6.
2 Kon pa Prepará: Bon preparashon ta kuminsá ku familiarisá nos mes ku e publikashon ku nos tin pensá di ofresé. Tambe nos mester pensa riba e hendenan den nos teritorio. Kiko ta preokupá nan? Kua kreensia religioso probablemente nos lo topa kuné? Nos por wak e presentashonnan sugerí den Nos Ministerio di Reino i e buki Rasonamentu for di e Skritura pa haña mas idea.
3 Loke tambe por yuda nos ta skucha ku atenshon ora tin demostrashon durante e Reunion di Sirbishi. Mas nos usa nos presentashon, ménos tempu nos lo tin ku dediká na preparashon. Sin embargo, nos presentashon lo ta mas efisiente, si kada bes ku nos ta bai sali den sirbishi nos pensa un ratu riba loke nos lo bisa i sigui refin’é. Tambe nos mester tuma un tiki tempu pa wak si nos tin tur loke nos mester den nos tas di sirbishi.
4 Kiko lo yuda nos kòrda nos presentashon? Loke por yuda nos keda kòrda nos presentashon ta si nos train e na bos haltu. Tin famia ta usa un parti di nan estudio di famia pa train nan presentashon. Otro publikadónan ta haña ku ta útil pa skirbi un resúmen kòrtiku di nan presentashon riba un pida papel òf karchi i nan ta tira un bista riba dje promé ku nan yega na un kas.
5 Dikon Preparashon Ta Benefisioso: Ora nos ta bon prepará, nos lo ta mas efisiente den e ministerio i nos lo tin mas goso. E ta yuda nos sinti nos mas kómodo i tambe nos lo ta ménos nèrvioso na porta. Nos lo ta den un mihó posishon pa duna mas atenshon na e doño di kas en bes di preokupá solamente ku loke nos ta bai bisa. Ademas, si nos a familiarisá nos mes ku e publikashon, nos lo ta mas entusiasmá ora ku nos ta ofres’é.
6 E Skritura ta animá nos pa ta “dispuesto pa hasi tur bon obra.” (Tito 3:1) Tin un mihó obra ku prediká e bon nobo? Ora nos hasi bon preparashon, nos ta mustrando rèspèt pa e doño di kas ku aseptá pa skucha nos, i pa Yehova, e Dios ku nos ta representá.—Isa. 43:10.