Nos Ta Duna Gran Balor na Nos Privilegionan!
1 Atraves di henter historia humano, Yehova a ekstendé un variedat di privilegio na su sirbidónan. El a duna nan privilegio sin importá nan sekso, edat òf posishon sosial. (Luk. 1:41, 42; Echo. 7:46, NW; Fil. 1:29, NW) Ki privilegionan e ta ofresé nos awe?
2 Algun di Nos Privilegionan: Nos tin e privilegio di ser siñá dor di Yehova. (Mat. 13:11, 15) Un otro privilegio ku nos ta apresiá ta e echo ku nos por alabá Yehova mediante nos komentarionan durante e reunionnan di kongregashon. (Sal. 35:18) Ora nos tin oportunidat pa duna komentario, nos ta hasié ku entusiasmo. Asina tambe, si nos ta konsiderá kada asignashon den e kongregashon komo un privilegio, nos lo kumpli ku nan lo mihó ku nos por. Nos ta partisipá regularmente den e privilegio ku nos tin di mantené e Salòn di Reino limpi i den bon kondishon?
3 Miónes di hende ta puntra nan mes si Dios ta skucha nan orashonnan; pero nos tin e privilegio ku e Personahe di mas importante di universo ta skucha nos orashonnan. (Pro. 15:29) Yehova mes personalmente ta skucha orashon di su sirbidónan. (1 Ped. 3:12) E no a pone un límite na e kantidat di biaha ku nos por aserk’é. Nos a haña un regalo masha balioso: nos por hasi orashon “tur ora bai”!—Efe. 6:18.
4 “Dios Su Kolaboradónan”: Un di e privilegionan di mas grandi ku nos tin ta esun di proklamá e bon nobo di e Reino di Dios komo “Dios su kolaboradónan.” (1 Kor. 3:9) Esaki ta un trabou ku ta duna nos satisfakshon i refreskamentu. (Juan 4:34) Ounke Yehova no tabatin nodi usa hende pa kumpli ku e trabou aki, el a duna nos e asignashon aki komo un muestra di su amor. (Luk. 19:39, 40) Pero no ta ken ku ta Yehova ta duna e privilegio aki. Esnan ku ta partisipá den e ministerio públiko mester ta hende ku a kultivá sierto kualidatnan spiritual i ta sigui manifestá nan. (Isa. 52:11) E ministerio ta un parti importante di nos programa semanal? No ta asina nos ta mustra ku nos ta duna gran balor na e privilegio aki?
5 Privilegionan ku ta bini di Yehova ta enrikesé nos bida. (Pro. 10:22) No mira nan nunka komo kosnan insignifikante! Ora nos realmente ta duna gran balor na nos privilegionan di sirbishi, nos ta agradá nos Tata selestial, e Dunadó di “tur bon regalo i tur don perfekto.”—Sant. 1:17.