Spera Riba Yehova
1 Isaias a skirbi: “SEÑOR ta un Dios di huisio; bendishoná ta tur esnan ku ta spera riba dje.” (Isa. 30:18b) Tin hopi relato bíbliko ku ta konta kon Dios a ehekutá huisio riba su enemigunan i libra su fiel sirbidónan. Ki lès e relatonan ei ta siña adoradónan di Yehova awe? Kiko nos por hasi awor pa prepará nos mes pa “e dia grandi i temibel di” Yehova? (Joel 2:31, 32) Nos binidero Kongreso di Distrito “Liberashon Ta Serka!” lo motivá nos pa meditá riba e preguntanan aki i analisá nos mes. Lo e yuda nos spera riba Yehova.
2 Bo a hasi bo areglonan di manera ku bo por asistí i asina benefisiá di tur e tres dianan di e kongreso? Por ehèmpel, bo a papia ku bo doño di trabou pa bo por haña dia liber pa bo por asistí? No asumí ku kos lo bai di mes. Hasi orashon tokante e asuntu i despues hasi bo petishon. (Neh. 2:4, 5) Meskos tambe, nos no mester posponé areglonan definitivo pa transporte, alohamentu i otro asuntunan nesesario. Un bon planiamentu asina ta mustra ku nos tin apresio profundo pa Yehova su mesa spiritual. Ansianonan mester ta pendiente di rumannan ku tin mester di yudansa ku nan areglonan pa kongreso, spesialmente esnan di mas edat den e kongregashon.—Gal. 6:10.
3 Bon Kondukta Ta Onra Dios: Ora nos ta reuní komo un grupo grandi na nos kongresonan, nos bon kondukta ta sirbi komo un testimonio pa e komunidat. Kiko esaki ta rekerí di nos? Pa motibu di nos kualidatnan kristian manera pasenshi, suavedat, dominio propio i rasonabilidat, hende mester sinti ku ta un plaser pa trata ku nos ora nos ta den hotèl, restorant i otro negoshinan den e área di kongreso. (Gal. 5:22, 23; Fil. 4:5, NW) Nos tur mester manifestá e klase di amor ku ‘no ta komportá su mes indesente, no ta buska su propio interes ni no ta wòrdu provoká.’ Asta ora difikultat òf inkumbiniensianan surgi, nos ke ‘hasi tur kos pa e gloria di Dios.’—1 Kor. 10:31; 13:5.
4 Despues di un kongreso, un gerente di hotèl a keda asina impreshoná ku e aparensia di nos hóbennan ku el a bisa ku e ta deseá pa “semper tin Testigunan di Yehova komo huéspet den su hotèl.” Ki un motibu di satisfakshon! Tur esaki ta danki na e entrenamentu i supervishon di parti di boso, mayornan. No ta sabí pa mayornan laga nan yunan keda den kamber di hotèl sin supervishon. Semper mester tin supervishon apropiá pa mucha. (Pro. 29:15) Laga nan bon kondukta trese alabansa na Yehova i hasi su kurason kontentu!—Pro. 27:11.
5 Bistí i Areglo Personal Modesto: Nos kada un por kontribuí na e impreshon general ku ta ser duná na e kongreso dor di evitá estilo di bistí i kabei ku ta slòns, ekstremo, inmodesto i demasiado kasual. Esaki ta konta pa ora nos ta bai i bini for di kongreso, ora nos ta yuda prepará e sitio di kongreso i ora nos ta asistí na e seshonnan. Komo sirbidónan di Dios, nos promé preokupashon ta e nòmber i reputashon di Yehova i no nos komodidat òf preferensianan personal. Kabesnan di famia tin e responsabilidat di hasi sigur ku aparensia di nan famia ta reflehá modestia i sano huisio tur ora.—1 Tim. 2:9.
6 Ta importante tambe pa nos keda ku un aparensia digno den nos tempu liber na hotèl, den pakus i restorant. Ta bon pa nos bisti nos paña ku nos a bai kongreso kuné si nos ta bai kome afó despues di e programa. Ora nos bisti nos badge, nos ta krea oportunidat pa duna testimonio informal.—2 Kor. 6:3, 4.
7 Isaias a predisí: “SEÑOR ta anhelá di ta miserikòrdioso ku boso, i p’esei e lo wòrdu halsá pa tene kompashon ku boso.” (Isa. 30:18a) Gratitut pa Yehova su kompashon òf miserikòrdia i su bondat inmeresí mester motivá nos pa onr’é ku nos kondukta i aparensia ora nos ta reuní huntu na nos kongresonan. Nos deseo ta pa e Kongreso di Distrito “Liberashon Ta Serka!” duna gloria na Dios i yuda nos keda spera riba dje!
[Study Questions]
1. Kiko ta e tema di e binidero kongreso, i dikon e ta oportuno?
2. Kon nos por mustra apresio pa nos kongreso di distrito?
3. Ki kualidatnan mester ta bisto entre e pueblo di Yehova den e área di e kongreso?
4. Kon mayornan por yuda nan yunan komportá nan mes na un manera ku ta trese alabansa na Yehova?
5. Kon nos por onra Yehova ku nos bistí i areglo personal?
6. Dikon durante nos tempu liber nos tin ku keda ku e mesun aparensia digno ku nos tabatin na e kongreso?
7. Kon nos por kontribuí pa e kongreso por ta un goso i pa tur kos bai na òrdu? (Wak “Rekordatorionan pa Kongreso di Distrito.”)
[Box on page 5]
Rekordatorionan pa Kongreso di Distrito
◼ Orario di Programa: E programa lo kuminsá 9:30 a.m. tur e tres dianan. Lo habri porta 8:00 a.m. Un par di minüt promé ku e seshon kuminsá, e presidente lo ta sintá riba plataforma miéntras ku ta toka e músika di Reino di introdukshon. E ora ei nos tur mester tuma asiento pa asina e programa por kuminsá na un manera digno. Djabièrnè i djasabra e programa lo kaba 5:05 p.m. i djadumingu lo e kaba 4:10 p.m.
◼ Parkermentu: Lugánan di parker lo ta grátis i lo ser okupá segun e órden di yegada. Siendo ku e lugánan di parker ta limitá, ta bon pa nos bai mas tantu posibel huntu den un outo en bes di un òf dos hende den un outo.
◼ Wardamentu di Asiento: Bo por warda asiento solamente pa esnan ku ta bin ku bo den e mesun vehíkulo òf ku ta biba den e mesun kas ku bo.
◼ Kuminda di Mèrdia: En bes di bandoná e sitio di kongreso pa bai buska kuminda durante e pousa di mèrdia, por fabor, bini ku bo almuerso. Bo por bin ku un djùk chikí ku por bai bou di bo stul. No ta permití pa bin ku djùk grandi di piknik, artefaktonan di glas, ni bebida alkohóliko den e fasilidatnan di kongreso.
◼ Donashon: Organisashon di un kongreso di distrito ta trese hopi gastu kuné. Nos por mustra nos apresio dor di hasi donashon boluntario pa e obra mundial na nos Salòn di Reino òf na e kongreso. Si nos ta hasi un donashon den forma di chèk na un kongreso, mester skirbí e chèk na nòmber di “Watch Tower.”
◼ Aksidente i Emergensia: Si surgi un emergensia médiko na e sitio di kongreso, por fabor, avisá un ùsher den bisindario i e lo notifiká e Departamento di EHBO. Asina nos personal kualifiká di promé ousilio ku ta na e sitio por evaluá e seriedat di e situashon i duna asistensia.
◼ Grabamentu: No tin mag di konektá ningun tipo di aparato di graba riba e sistema di koriente òf sistema di zonidu. I por usa e aparatonan aki solamente den un manera ku nan no ta molestiá otro hende.
◼ Sakamentu di Potrèt: Si bo ta saka potrèt durante e seshonnan, no usa flèsh.
◼ Pager i Telefòn Selular: Nan mester ta programá di tal forma ku nan no ta distraí otro hende.
◼ Fragansia: Awendia mayoria kongreso ta tuma lugá den lugánan será kaminda nos ta dependé di èrko. P’esei, lo ta bondadoso di nos parti pa limitá uso di fragansia, kolonia i perfume fuerte ku lo por kousa reakshon serka esnan ku tin problemanan respiratorio òf otro problema relashoná ku esaki.—1 Kor. 10:24.
◼ Formulario Por Fabor Atendé: Mester usa un formulario Por Fabor Atendé (S-43) pa duna informashon relashoná ku kualke persona ku mustra interes komo resultado di testimonio informal durante e kongreso. Publikadónan mester bin kongreso ku un òf dos formulario huntu ku nan. Lo tin formulario tambe na e Departamento di Literatura. Mester entregá formularionan yená na e Departamento di Literatura òf na e sekretario di bo kongregashon.—Wak Nos Ministerio di Reino di febrüari 2005, página 6.
◼ Restorant: Den hopi pais ta un kustumber pa duna tep pa e servisio risibí.