Pregunta di Lektor

Kiko apòstel Pablo tabata ke men ora ku el a deklará ku hende muhé mester “keda ketu den e iglesianan”?

Pablo a skirbi na e kongregashon kristian na Korinto: “Manera den tur e iglesianan di e santunan, laga e muhénan keda ketu den e iglesianan; pasobra no ta permití pa nan papia.” (1 Korintionan 14:33, 34) Pa nos por komprondé esaki korektamente, ta bon pa nos konsiderá e konteksto di Pablo su konseho.

Na 1 Korintionan kapítulo 14, Pablo a trata asuntunan relashoná ku reunionnan di e kongregashon kristian. El a deskribí kiko mester konsiderá na e reunionnan ei i a rekomendá kon mester kondusí nan. (1 Korintionan 14:1-6, 26-34) Ademas, el a enfatisá e propósito di reunionnan kristian, esta, “pa e iglesia por risibí edifikashon.”—1 Korintionan 14:4, 5, 12, 26.

Pablo su instrukshon pa “keda ketu” ta aparesé tres biaha den kapítulo 14 di 1 Korintionan. Kada un biaha e instrukshon tabata dirigí na un otro grupo den e kongregashon, pero tur e biahanan el a ser duná pa e mesun motibu: pa “tur kos sosodé korektamente i na un manera ordená.”—1 Korintionan 14:40.

E promé biaha, Pablo a bisa: “Si tin hende ta papia den lenga, laga esei sosodé pa dos òf di mas tantu tres, i kada un na su turno, i laga ún duna interpretashon; ma si no tin intérprete, lag’é keda ketu den iglesia; i lag’é papia ku su mes i ku Dios.” (1 Korintionan 14:27, 28) Esaki no tabata ke men ku un persona asina nunka no tabatin mag di papia na reunion, sino mas bien ku tabatin biaha ku e mester a keda ketu. No mester lubidá ku lo no a kumpli ku e propósito di e reunion, esta, di edifiká otro, si el a papia na un idioma ku ningun hende no a komprondé.

E di dos biaha, Pablo a deklará: “Laga dos òf tres profeta papia, i laga e otronan husga [òf, “diserní e nifikashon,” NW]. Ma si un revelashon wòrdu duná na un otro ku ta sintá einan, laga esun promé keda ketu.” Esaki no a nifiká ku e promé profeta mester a keda sin papia na reunion, sino mas bien ku tabatin biaha ku e mester a keda ketu. E ora ei e persona ku a haña e revelashon milagroso por a papia ku e kongregashon, i e propósito di e reunion—pa “tur por wòrdu eksortá”—lo ser lográ.—1 Korintionan 14:26, 29-31.

E di tres biaha, Pablo a papia solamente ku hende muhé kristian, i a bisa: “Laga e muhénan keda ketu den e iglesianan; pasobra no ta permití pa nan papia, ma laga nan someté nan mes.” (1 Korintionan 14:34) Dikon Pablo a duna e mandamentu aki na rumannan muhé? Pa mantené òrdu den e kongregashon. El a bisa: “I si nan ta deseá di siña algu, laga nan puntra nan mes esposonan na kas; pasobra ta para mahos pa un muhé papia den iglesia.”—1 Korintionan 14:35.

Podisé tabatin algun ruman muhé ku a kuestioná loke tabata ser bisá den e kongregashon. Pablo su konseho a yuda rumannan muhé evitá tal aktitut desordená i humildemente aseptá nan posishon denter di Yehova su areglo di hefatura, partikularmente relashoná ku nan esposo. (1 Korintionan 11:3) Ademas, dor di keda ketu, rumannan muhé lo a mustra ku nan no tabata aspirá pa ta maestro den e kongregashon. Ora Pablo a skirbi Timoteo, el a mustra ku lo ta inapropiá pa un hende muhé asumí e papel di maestro den e kongregashon. El a bisa: “Mi no ta permití hende muhé siña hende hòmber ni ehersé outoridat riba hende hòmber, ma pa keda ketu.”—1 Timoteo 2:12.

Akaso esaki ke men ku un hende muhé kristian nunka no tin mag di papia durante un reunion di kongregashon? Nò, no ta esaki e ke men. Den tempu di Pablo tabatin okashon ku muhénan kristian, kisas motivá pa spiritu santu, a hasi orashon òf profetisá den e kongregashon. Na okashonnan asina, nan a rekonosé nan posishon dor di bisti algu pa tapa nan kabes.a (1 Korintionan 11:5) Ademas, tantu den tempu di Pablo komo awe, rumannan muhé huntu ku rumannan hòmber ta ser urgí pa hasi deklarashon públiko di nan speransa. (Hebreonan 10:23-25) Fuera di hasi esaki den e ministerio di vèlt, rumannan muhé ta deklará nan speransa i ta animá otro rumannan durante reunionnan di kongregashon. Nan ta hasi asina dor di duna komentarionan bon pensá ora invitá nan pa hasi esei i dor di aseptá asignashonnan pa partisipá den demostrashon òf den e partinan di studiante den e Skol di Ministerio Teokrátiko.

Pues anto, muhénan kristian ta “keda ketu” dor di no purba asumí e papel di un hende hòmber i instruí e kongregashon. Nan no ta hasi preguntanan pa provoká diskushon ku lo por kuestioná e outoridat di e rumannan ku ta instruí den e kongregashon. Dor di kumpli ku nan debido papel den e kongregashon, rumannan muhé kristian ta kontribuí masha hopi na un ambiente di pas den kua “tur kos [na reunionnan di kongregashon ta] wòrdu hasí pa edifikashon.”—1 Korintionan 14:26, 33.

[Nota]