Bo Ta Corda?

Bo a haña cu e edicionnan recien di E Toren di Vigilancia tabatin balor práctico pa bo? Anto pakico no test bo memoria cu e siguiente preguntanan?

◻ Kico ta e diferencia entre “e dia di Señor” i “e dia di Jehova”? (Revelacion 1:10; Joël 2:11)

“E dia di Señor” ta incluí e cumplimentu dje 16 visionnan describí den Revelacion capítulo 1 pa 22 i e sucesonan básico cu Jesus a predicí como contesta riba e pregunta di su disipelnan tocante e señal di su presencia. Como e culminacion dje dia di Señor, e dia inspirador di temor di Jehova ta dal aden ora e ehecutá huicio riba e mundu corupto di Satanas. (Mateo 24:3-14; Lucas 21:11)—15/12, página 11.

◻ Kico ta algun rasgo sobresaliente dje Bijbel di Makarios?

E nomber Jehova ta aparecé mas cu 3.500 biaha den e Bijbel di Makarios. Un erudito di literatura religioso ruso a bisa: “[E] traduccion ta pega fiel n’e texto hebreo, i e idioma dje traduccion ta puru i ta pas cu e tópico.”—15/12, página 27.

◻ Kico ta “e berdad” cu Jesus a bisa lo haci nos liber? (Juan 8:32)

Cu “e berdad,” Jesus tabata kier men e informacion inspirá dor di Dios—specialmente informacion relacioná cu e boluntad di Dios—cu ta conserbá den Bijbel.—1/1, página 3.

◻ Ken ta e Jehú i Jehónadab di tempu moderno?

Jehú ta prefigurá Jesucristo, kende ta ser representá riba tera pa “e Israel di Dios,” cristiannan ungí. (Galationan 6:16; Revelacion 12:17) Mescos cu Jehónadab a sali pa topa Jehú, un “multitud grandi” for dje nacionnan a sali pa apoyá Jesus su representantenan terenal. (Revelacion 7:9, 10; 2 Reynan 10:15)—1/1, página 13.

◻ Kico ta nificá ‘cana cu Dios’? (Génesis 5:24; 6:9)

Esaki ta nificá cu esnan cu a haci esei, manera Enoc i Noe, a comportá nan mes den un manera cu a duna evidencia di fe fuerte den Dios. Nan a haci loke Jehova a manda nan i a regulá nan bida na armonia cu loke nan tabata sa tocante dje for di su trato cu humanidad.—15/1, página 13.

◻ Pakico un persona mester planea delantá p’e posibilidad cu e por muri?

Den un sentido, regla asuntunnan asina ta un regalo pa bo famia. E ta un muestra di amor. E ta duna prueba cu bo ta deseá di ‘percurá pa esnan cu ta miembro di bo famia di cas’ asta ora bo no ta huntu cu nan mas. (1 Timoteo 5:8)—15/1, página 22.

◻ Kico “e pacto bieu” a logra? (2 Corintionan 3:14)

El a prefigurá e pacto nobo i, cu su frecuente sacrificionan, el a demostrá cu hende tin un necesidad urgente pa ser librá for di picá i morto. E tabata un ‘maestro cu a hiba nos na Cristo.’ (Galationan 3:24)—1/2, página 14.

◻ Den ki maneranan e pacto nobo ta eterno? (Hebreonan 13:20)

Na promé lugá, distinto dje pacto di Ley, hamas lo e ser reemplasá. Na di dos lugá, e resultadonan di su funcionamentu ta permanente. I di tres, súbditonan terenal dje Reino di Dios lo sigui beneficiá dje areglo dje pacto nobo atrabes dje Mil Aña.—1/2, página 22.

◻ Kico ta e beneficionan di ser gradicidu?

E calor cu un persona ta experenciá dor cu e ta gradicidu di curason ta contribuí na su felicidad i pas. (Compará cu Proverbionan 15:13, 15.) Siendo cu e ta un cualidad positivo, gratitud ta protehá bo for di sintimentunan negativo manera rabia, yalurs i rencor.—15/2, página 4.

◻ Den ki pactonan esnan engendrá pa spiritu a ser incluí?

E pacto nobo, cu Jehova ta cera cu miembronan di Israel spiritual, i e pacto p’e Reino, cu Jesus ta cera cu su siguidónan ungí. (Lucas 22:20, 28-30)—15/2, página 16.

◻ Cua tres fiesta grandi Dios a manda e israelitanan asistí na dje?

E Fiesta di Pan Sin Zuurdeeg, cu a sigui direct despues dje Pascu Hudiu di 14 di nísan; e Fiesta di Simannan, riba e di 50 dia contando for di 16 di nísan; i e Fiesta di Recogementu, of Fiesta di Cabaña, den e di shete luna. (Deuteronomio 16:1-15)—1/3, página 8, 9.

◻ Pakico ta un privilegio pa asistí na reunionnan cristian?

Jesus a bisa “Caminda tin dos of tres reuní den mi nomber, ei mi ta meimei di nan.” (Mateo 18:20; 28:20) Tambe, un manera importante cu alimentacion spiritual ta tuma lugá ta mediante reunionnan di congregacion i reunionnan mas grandi. (Mateo 24:45)—1/3, página 14.

◻ Kico ta e orígen dje nomber Nimrod?

Vários erudito ta compartí e opinion cu Nimrod no a haña e nomber ei ora el a nace. Mas bien, nan ta considerá cu esei ta un nomber cu nan a dun’é despues pa cuadra cu su caracter rebelde, despues cu esei a keda manifestá.—15/3, página 25.

◻ Ki importante famia ta pa sociedad humano?

Famia ta un necesidad humano. Historia ta mustra cu segun cu e areglo di famia ta deteriorá, e fortalesa di comunidad i nacionnan ta debilitá. Pues famia tin un efecto directo riba e stabilidad di sociedad i e bienestar di yu i futuro generacionnan.—1/4, página 6.

◻ Kico ta tres prueba cu Bijbel ta e Palabra di Dios?

(1) E ta científicamente exacto; (2) e ta contené principionan cu ta independiente di tempu i cu ta práctico p’e bida djawe; (3) e ta contené profecianan specífico cu a cumpli, manera echonan histórico ta proba.—1/4, página 15.