Kico Libertad Religioso Ta Nificá pa Bo?

Aunke libertad di religion ta ser considerá un derecho básico na Merca, un ola di violencia di parti di multitudnan desordená contra Testigonan di Jehova a pasa dor dje pais den añanan ’40

MIYONES di hende a lucha p’e. Algun asta a muri p’e. E ta berdaderamente un dje posesionnan mas precioso di humanidad. Kico e ta? Libertad! The World Book Encyclopedia ta definí libertad como “e abilidad di scoge i hiba a cabo loke bo scoge p’e.” E ta sigui: “For di un punto di bista legal, hende ta liber basta sociedad no imponé límitenan inhustu, innecesario of irazonabel riba nan. Tambe sociedad tin cu protehá nan derechonan—esta, nan libertad, abilidad i privilegionan básico.”

E concepto ta zona simpel. Den práctica, sin embargo, ta parce prácticamente imposibel pa hende bai di acuerdo cu otro exactamente unda e límitenan di libertad mester ser fihá. Por ehempel, algun ta kere cu un gobiernu mester bini cu leynan pa protehá e libertad di su ciudadanonan. Pero otronan lo argumentá cu e leynan aki ta net e cadenanan for di cua ciudadanonan mester ser librá! Claramente, cada hende tin su propio concepto di libertad.

Kico di Libertad Religioso?

Tal bes e libertad mas altamente debatí ta libertad di religion, cu a ser definí como “e derecho pa un persona kere den i practicá e fe di su preferencia.” Segun Nacionnan Uní su Declaracion Universal di Derechonan Humano, “tur hende tin e derecho riba libertad di pensamentu, concenshi i religion.” Esaki ta incluí un persona su derecho “di cambia su religion of creencia,” huntu cu e libertad “p’e manifestá su religion of creencia den siñansa, práctica, adoracion i ceremonia religioso.”—Artículo 18.

Siguramente, nos lo spera di cualkier nacion cu tin berdadero interes den su súbditonan di ta otorgá nan un libertad asina. Lamentablemente, esaki no ta semper e caso. “Religion ta afectá e sintimentunan di mas profundo di hopi hende,” segun The World Book Encyclopedia. “Algun gobiernu tin lasonan estrecho cu un religion i ta considerá hende di otro religion un menasa pa autoridad político. Tambe un gobiernu por mira religion como políticamente peligroso pasobra religion kisas ta pone lealtad na Dios riba obedencia n’e estado.”

P’e motibunan aki algun gobiernu ta pone restriccion riba e práctica di religion. Algun ta desanimá e práctica di tur fe mes. Otro gobiernunan, aunke nan ta boga pa libertad di adoracion, ta tene un control estricto riba tur actividad religioso.

Tuma, por ehempel, e situacion cu a prevalecé pa hopi aña na México. Aunke e Constitucion a garantisá libertad religioso, el a stipulá: “Misanan cu ta ser usá pa adoracion público ta propiedad dje Nacion, representá dor di e Gobiernu Federal, cu lo determiná cua di nan por sigui ser usá como tal.” Na 1991 e Constitucion a ser modificá pa pone fin n’e restriccion aki. No obstante, e ehempel aki ta ilustrá cu diferente pais ta interpretá libertad religioso na diferente manera.

Un Otro Clase di Libertad Religioso

Libertad religioso ta existí den e pais caminda bo ta biba? Si ta asina, con e ta ser definí? Bo por adorá Dios den e manera cu abo ta scoge, of bo ta obligá pa bira miembro dje religion di Estado? Bo ta permití pa lesa i distribuí literatura religioso, of tal material imprimí ta ser prohibí dor di gobiernu? Bo por papia cu otronan tocante bo fe, of esaki ta ser considerá como un infraccion contra nan derechonan religioso?

Contesta riba e preguntanan aki ta dependé riba unda bo ta biba. Sin embargo, ta interesante pa tuma nota cu tin un clase di libertad religioso cu no ta dependé di ningun manera riba localidad. Tempu cu Jesus tabata den Jerusalem n’e aña 32 E.C., el a bisa su siguidornan: “Si boso permanecé den mi palabra, boso realmente ta mi disipelnan, i boso lo conocé e berdad, i e berdad lo haci boso liber.”—Juan 8:31, 32.

Kico Jesus tabata kier men cu e declaracion aki? Su oyentenan hudiu a anhelá liberacion for di dominacion romano. Pero Jesus no tabata papiando di libertad for di opresion político. Mas bien, e tabata primintiendo su disipelnan algu muchu mas mihó, manera nos lo mira den e siguiente artículo.