Pregunta di Lector

E informenan pa algun aña ta mustra cu e cantidad di esnan cu ta tuma dje emblemanan di Memorial a aumentá levemente. Esaki ta un indicacion cu hopi persona nobo ta ser ungí cu spiritu santu?

Tin bon motibu pa kere cu e cantidad di 144.000 cristian ungí a ser completá décadanan pasá.

Na Echonan 2:1-4, nos ta lesa tocante e proménan den e grupo limitá ei: “Awor miéntras cu e dia dje fiesta di Pentecoste tabata den progreso, nan tur tabata huntu na e mésun lugá, i di ripiente a sosodé for di shelu un zonido mescos cu suplamentu di un bientu fuerte, i el a yena henter e cas den cua nan tabata sintá. I lenganan manera di candela a bira visibel pa nan i tabata partí tur rond, i un a sinta riba cada un di nan, i nan tur a yena cu spiritu santu i a cuminsá papia den diferente idioma, net manera e spiritu tabata duna nan di expresá nan mes.”

Despues di esei, Jehova a selectá otronan, i el a ungi nan cu su spiritu santu. Miles di persona a ser agregá den e promé-promé añanan di cristianismo. N’e celebracion di Memorial den nos tempu, e orador hopi biaha ta hala atencion n’e palabranan di apostel Pablo na Romanonan 8:15-17, cu ta mencioná cu e ungínan ‘ta ricibí un spiritu di adopcion como yunan.’ Pablo a agregá cu e spiritu santu cu nan ta ricibí ‘ta duna testimonio cu nan spiritu, cu nan ta yunan di Dios, co-herederonan cu Cristo.’ Esnan cu berdaderamente tin e ungimentu cu spiritu aki sa esei cu siguransa. E no ta djis un deseo of un refleho di un punto di bista emocional i irealístico di nan mes.

Nos ta comprendé cu e yamada celestial aki a sigui atrabes dje siglonan, aunke cu durante e asina yamá Epoca di Scuridad, por tabatin tempu cu e cantidad di ungínan tabata masha poco.a Cu e reestablecimentu di berdadero cristianismo cerca e fin di siglo pasá, mas a ser yamá i scogí. Pero ta parce cu meimei di añanan ’30, e cantidad completo dje 144.000 básicamente a ser completá. Pues a cuminsá aparecé un grupo di cristiannan leal cu e speransa terenal. Jesus a yama esakinan e “otro carnénan,” cu ta uni den adoracion cu e ungínan como un solo tou aprobá.—Juan 10:14-16.

E echonan durante e último décadanan ta mustra cu e yamamentu dje ungínan a ser completá i tambe cu Jehova a bendicioná e “multitud grandi” creciente, cu ta spera di sobrebibí “e tribulacion grandi.” (Revelacion 7:9, 14) Por ehempel, n’e celebracion di Memorial na 1935, na cua 63.146 persona a asistí, esnan cu a tuma dje emblemanan como evidencia dje echo cu nan a profesá cu nan ta ungí, tabata 52.465 na cantidad. Trinta aña despues, of na 1965, e asistencia tabata 1.933.089, miéntras cu esnan cu a participá dje emblemanan a mengua te na 11.550. Moviendo 30 aña mas cerca, na 1995 e asistencia a bula yega te 13.147.201, pero solamente 8.645 persona a tuma dje pan i dje biña. (1 Corintionan 11:23-26) Claramente, segun cu e décadanan a pasa, e cantidad di esnan cu a profesá di ta dje resto a baha drásticamente—rond di 52,400 na 1935; 11.500 na 1965; 8.600 na 1995. Sin embargo, esnan cu tin speransa terenal a ser bendicioná, i nan cantidad a aumentá abundantemente.

E informe publicá mas recien ta p’e aña 1995, i e ta mustra 28 participante mas cu den e aña anterior aunke e proporcion di participante pa esnan cu a asistí en realidad a baha. Despues di considerá tur cos, e echo cu un par di persona mas a scoge pa tuma dje emblemanan no mester molestiá nos. Durante e añanan, asta algun recien bautisá, di ripiente a cuminsá tuma dje pan i biña. Den un cantidad di caso, despues di un tempu nan a reconocé cu esaki tabata un eror. Algun a reconocé cu nan a tuma dje pan i dje biña como un reaccion emocional riba tal bes tension físico of mental. Pero cu tempu nan a bin mira cu nan realmente no tabata yamá pa bida celestial. Nan a pidi Dios pa su comprension misericordioso. I nan ta sigui sirbié como excelente cristiannan leal cu tin e speransa di bida eterno riba tera.

No ta necesario pa ningun di nos preocupá si un persona cuminsá tuma dje emblemanan of stop di haci esei. Realmente no ta na nos pa determiná si un persona en realidad a ser ungí cu spiritu santu i yamá pa bida celestial of no. Corda e siguransa sólido di Jesus: “Ami ta e wardador excelente, i mi conocé mi carnénan.” Cu mésun siguridad, Jehova conocé esnan cu el a scoge como yunan spiritual. Tin tur motibu pa kere cu e cantidad di ungínan lo sigui baha segun cu edad avansá i sucesonan imprevisto ta terminá nan bida terenal. Sin embargo, mescos cu esnan berdaderamente ungí aki ta resultá di ta fiel te na morto, sperando cu anhelo pa ricibí e corona di bida, e otro carnénan, cu a laba nan paña largu blancu den e sanger dje Lamchi, por spera cu anhelo di sobrebibí e binidero tribulacion grandi.—2 Timoteo 4:6-8; Revelacion 2:10.

[Nota]