Bo Realmente Por Stima Dios?

“NINGUN hende por mirá mi i tog biba,” Dios ta bisa. (Exodo 33:20) Ademas, despues cu e cánon bíblico a ser completá no tabatin ningun evidencia cu un hende tabatin comunicacion directo cuné. No ta parce difícil—asta imposibel—pa desaroyá afecto profundo pa un persona cu bo nunca a mira ni tende directamente? Ta realmente posibel pa tin un relacion amoroso cu e Creador dje universo?

No mester tin ningun duda cu ta posibel pa desaroyá un relacion personal i caluroso cu Dios. Na Deuteronomio 6:5, nos ta lesa cu e nacion di Israel a ser mandá: “Bo mester stima Jehova bo Dios cu tur bo curason i cu tur bo alma i cu tur bo forsa vital.” Mas despues Jesucristo a reafirmá e ley aki na su siguidornan i a agregá: “Esaki ta e mandamentu di mas grandi i esun primario.” (Mateo 22:37, 38) Bijbel lo exhortá nos pa stima Dios si un relacion asina ta inalcansabel?

Pero Jehova ta spera pa nos stim’é simplemente pasobra e ta exigí esei? No. Dios a crea e promé pareha humano cu e capacidad pa stim’é. Adam i Eva no a ser forsá pa drenta den un relacion amoroso cu nan Creador. Mas bien, Dios a pone nan den circunstancianan ideal den cua nan por a desaroyá afecto profundo p’e. Nan tabata por a scoge—hala mas cerca Dios of alehá for di dje.

Adam i Eva a scoge pa rebelá. (Génesis 2:16, 17; 3:6, 7) Sin embargo, nan desendientenan lo tabatin e potencial pa desaroyá un relacion amoroso cu e Creador.

Canando cu e Dios Berdadero

Por ehempel, Bijbel ta bisa di Abraham cu e tabata “amigu” di Dios. (Santiago 2:23) Tog Abraham siguramente no tabata e único cu a disfrutá di un relacion íntimo cu Dios. Bijbel ta papia di hopi otro hende imperfecto cu a manifestá berdadero afecto pa Jehova i a “cana cu e Dios berdadero.”—Génesis 5:24; 6:9; Job 29:4; Salmo 25:14; Proverbionan 3:32.

E sirbidornan di Dios di tempu antiguo no a nace cu amor i afecto pa Dios. Nan tabatin cu desaroy’é. Den ki manera? Dor di yega na conoc’é pa su nomber personal, Jehova. (Exodo 3:13-15; 6:2, 3) Dor di ta conciente di su existencia i Divinidad. (Hebreonan 11:6) Dor di meditá frecuentemente riba su obranan amoroso. (Salmo 63:6) Dor di expresá den oracion na Dios nan pensamentunan di mas profundo. (Salmo 39:12) Dor di siña di su bondad. (Zacarías 9:17) Dor di desaroyá un temor saludabel di ofend’é.—Proverbionan 16:6.

Bo por bira amigu di Dios i cana cuné? Ta cierto cu bo no por mira Dios ni tende su bos. No obstante, Jehova ta invitá bo pa bira ‘un huésped den su tent,’ su amigu. (Salmo 15:1-5) Pues, ta posibel pa bo stima Dios. Pero con bo por desaroyá un relacion íntimo i afectuoso cuné?