Warda Integridad i Biba!

“PLEGA Dios i muri!” E kaft di nos revista ta ilustrá representá e esposa di Job, kende a atacá Job cu e palabranan ei. Esei tabata rond di 3.600 aña pasá. Sin embargo, e atake verbal ei contra Dios su fiel sirbidor ta resaltá un cuestion cu ta enfrentá humanidad te n’e dia djawe. Fiel Job a sufri pérdidanan teribel​—⁠su crio di bestia, su cas, su dies yunan. Awor su curpa tabata ser torturá dor di un malesa crónico, poniendo Job na prueba te n’e límite di su awante. E motibu? E enemigu principal di Dios i di hende, Satanas e Diabel, tabata tratando di proba un desafio cu hende no por mantené integridad na Dios bou di prueba severo.​—⁠Job 1:​11, 12; 2:​4, 5, 9, 10.

Awe, mescos cu den tempu di Job, “henter e mundu ta drumi den poder di e malbado,” Satanas e Diabel. (1 Juan 5:19) En berdad, esei ta asta mas cierto awe, pasobra awor “esun yamá Diabel i Satanas, kende ta gañando henter e tera habitá,” a ser tirá abou for di cielu aki riba tera. (Revelacion 12:⁠9) Esaki ta splica e calamidadnan intenso cu ta afligí humanidad den nos tempu. E promé guera mundial, cu a cuminsá na 1914, a marca “un principio di dolor di afliccion” cu a sigui te leu den e siglo 20 aki.​—⁠Mateo 24:​7, 8.

Den e mundu cruel i degradá aki, bo sa sinti cu bo a alcansá e límite di awante humano? Bo sa puntra bo mes, ‘Bida tin un propósito?’ Job talbes a sinti asina, pero e nunca a perde fe den Dios, aunke el a haci ekibocacion. El a expresá su determinacion den e palabranan aki: “Te ora mi muri lo mi no kita mi integridad for di mi!” E tabatin confiansa cu Dios lo ‘yega na conocé su integridad.’​—⁠Job 27:5; 31:⁠6.

Jesucristo, Dios su mes Yu, tambe tabatin cu wanta pruebanan ora e tabata riba tera. Satanas a atacá Jesus den vários manera. El a probechá di Jesus su necesidadnan físico i a pone Su dependencia riba e Palabra di Dios na prueba, manera a sosodé riba e ceru unda Satanas a tenta Jesus. (Mateo 4:​1-11) El a tormentá Jesus dor di laga e escriba i fariseonan apóstata i nan compinchinan engañá persigui’é, acus’é di blasfemia i conspirá pa mat’é. (Lucas 5:21; Juan 5:​16-18; 10:​36-39; 11:57) Nan a trata Jesus hopi mas malu cu e tres consoladornan falsu a haci cu Job.​—⁠Job 16:2; 19:​1, 2.

Den e hofi di Getsémani, segun cu Jesus a acercá e culminacion di su prueba, el a bisa su disipelnan: “Mi alma ta profundamente afligí, asta te na morto.” Anto, “el a cai boca abou, resando i bisando: ‘Mi Tata, si ta posibel, laga e copa aki pasá mi forbij. Ma, no manera ami kier, sino manera abo kier.’ ” Finalmente, riba e staca di tormento, na cumplimentu dje palabranan profético di Salmo 22:​1, Jesus a sclama: “Mi Dios, mi Dios, pakico bo a bandoná mi?” Pero na final di cuenta Dios no a bandoná Jesus pasobra Jesus a mantené integridad perfecto na Dje, percurando un modelo pa tur cristian berdadero sigui. Jehova a recompensá Jesus su wardamentu di integridad dor di resucit’é i hals’é den e cielunan di mas haltu. (Mateo 26:​38, 39; 27:​46; Echo 2:​32-36; 5:30; 1 Pedro 2:21) Dios lo recompensá tur otro persona cu di manera similar ta warda integridad na dje.

Jesus su integridad no solamente a duna un contesta completo na Satanas su desafio, sino e sacrificio di su bida humano perfecto a proveé e rescate, riba e base di cua hende cu ta warda integridad por gana bida eterno. (Mateo 20:28) Promé, Jesus ta reuní un “trupa chikitu” ungí cu ta bira co-heredero cuné den e Reino di cielu. (Lucas 12:32) Despues di esaki, “un multitud grandi” ta ser reuní pa sobrebibí “e tribulacion grandi,” saliendo for di dje pa heredá bida eterno den e dominio dje Reino di Dios riba tera.​—⁠Revelacion 7:​9, 14-17.

E wardador di integridad Job lo ta entre e biyones di mortonan cu n’e tempu ei lo ser resucitá pa bira parti dje sociedad pacífico dje “tera nobo” ei. (2 Pedro 3:13; Juan 5:​28, 29) Manera ta ser ilustrá riba e kaft parti patras di nos revista, integridad tabatin su recompensa den tempu di Job ora Jehova a “bendicioná e fin di Job . . . mas cu su principio.” El a gana fortalesa spiritual como unu cu “no a peca cu su lipnan.” Dios a extendé su bida cu un 140 aña mas. Materialmente, el a duna Job dobel di tur loke e tabatin promé, i Job a “yega di tin siete yu homber i tres yu muher,” e yu muhernan siendo considerá esnan di mas bunita den henter e pais. (Job 2:10; 42:​12-17) Pero tur e prosperidad aki tabata solamente un proef adelantá dje bendicionnan cu wardadornan di integridad lo disfrutá di dje den e Paradijs dje “tera nobo.” Abo tambe por participá den e goso ei, manera e siguiente páginanan lo splica!

[Plachi na página 4]

Jesus a pone e ehempel perfecto como un wardador di integridad