Hesus Su Último Sena

E hudiunan tabata selebrá Pasku Hudiu tur aña riba e di 14 dia di luna di nísan. Esei a laga nan kòrda ku Yehova a libra nan di sklabitut na Egipto i ku Yehova a hiba nan na e tera primintí. Na aña 33, Hesus i su apòstelnan a selebrá Pasku Hudiu den un kamber ariba na Herúsalèm. Ora nan a kaba ku e sena, Hesus a bisa: ‘Un di boso lo traishoná mi.’ E apòstelnan a spanta i puntra Hesus: ‘Ta ken e ta?’ Hesus a bisa: ‘Ta e hende ku mi duna e pida pan akí.’ E ora ei, Hesus a duna Húdas Iskariòt un pida pan. Mesora, Húdas a lanta i sali for di e kamber.

Despues, Hesus a hasi orashon, el a kibra e pan na pida i duna e apòstelnan ku a keda kuné. El a bisa: ‘Kome e pan akí. E ta representá mi kurpa, ku lo mi duna pa boso.’ Kaba, el a hasi orashon, kue e biña i duna su apòstelnan. El a bisa: ‘Bebe e biña akí. E ta representá mi sanger, ku lo mi duna pa pordon di piká. Mi ta primintí ku boso lo ta rei huntu ku mi den shelu. Sigui hasi esaki tur aña pa kòrda riba mi.’ Te awe, Hesus su disipelnan ta reuní tur aña riba e anochi ei. E reunion ei ta ser yamá e sena di Señor.

Despues di e sena, e apòstelnan a kuminsá diskutí tokante kua di nan tabata esun di mas importante. Pero Hesus a bisa nan: ‘E persona di mas grandi entre boso mester komportá su mes komo e persona di mas hóben, òf e persona ménos importante.’

‘Boso ta mi amigunan. Mi a bisa boso tur loke mi Tata tabata ke pa mi bisa boso. Un djis akí, lo mi bai serka mi Tata den shelu. Boso lo keda atras, i tur hende lo sa ku boso ta mi disipelnan pasobra boso ta stima otro. Boso mester stima otro meskos ku ami a stima boso.’

Na final, Hesus a hasi orashon na Yehova pa e protehá tur e disipelnan. I tambe, el a resa pa Yehova yuda nan traha uní i na pas ku otro. Ademas, el a pidi pa Yehova su nòmber ser santifiká. Despues, Hesus i su disipelnan a kanta kantika na Yehova i nan a bai pafó. Tabata falta poko tempu pa nan arestá Hesus.