Hesus A Skohe e 12 Apòstelnan

Despues di mas o ménos un aña i mei ku Hesus tabata prediká, e mester a tuma un desishon importante. Ken Hesus lo a skohe pa traha huntu kuné? I ken lo el a entrená pa guia e kongregashon kristian? Hesus kier a tuma bon desishon. P’esei, el a buska Yehova su guia. Pues, Hesus a bai den seru, kaminda e por tabata su so, i el a hasi orashon henter anochi. Mainta, Hesus a yama algun di su disipelnan bini serka dje, i el a skohe 12 di nan pa bira su apòstel. Bo ta kòrda nan nòmber? Nan nòmbernan tabata: Pedro, Andres, Santiago, Huan, Felipe, Bartolomeo, Tomas, Mateo, Santiago, ku tabata yu di Alfeo, Tadeo, Simon i Húdas Iskariòt.

E 12 apòstelnan akí a biaha tur kaminda ku Hesus. Despues ku Hesus a siña nan, el a manda nan bai prediká. Anto Yehova a duna nan poder pa saka demoño i pa kura hende malu.

Hesus tabata konfia e 12 apòstelnan i e tabata yama nan su amigunan. E fariseonan tabata pensa ku e apòstelnan tabata hende bobo i ku nan no tabata sa nada. Pero, Hesus a siña nan bon kon pa hasi e trabou. Nan tabata huntu ku Hesus durante e tempu mas importante di Hesus su bida. Por ehèmpel, nan tabata ku Hesus promé ku Hesus a muri i despues ku Hesus a lanta for di morto. Mayoria di e 12 apòstelnan tabata di Galilea, meskos ku Hesus. I algun di su apòstelnan tabata kasá.

E apòstelnan tabata hende imperfekto i nan tabata hasi fout. Tin biaha, nan tabata papia sin pensa i tuma mal desishon. Tin ora, nan no tabatin pasenshi. Nan tabata asta diskutí tokante ken tabata e persona di mas importante. Pero nan tabata bon hende ku tabata stima Yehova. Despues ku Hesus a bai bèk shelu, ta e apòstelnan lo a forma e kongregashon kristian i gui’é.