Plania pa Futuro i Aktua na un Manera Sabí

E ilustrashon tokante e yu pèrdí ku Hesus a kaba di konta mester a laga e kobradónan di belasting, e eskribanan i e fariseonan komprondé ku Dios ta kla pa pordoná pekadónan ku arepentí. (Lukas 15:1-7, 11) Despues, Hesus a dirigí su mes na su disipelnan. El a konta nan un ilustrashon tokante un hòmber riku ku a haña sa ku su mayordomo no tabata hasi su trabou bon.

E hòmber a tende ku e mayordomo tabata malgastá su biennan. P’esei, el a bisa ku lo el a kita e mayordomo for di trabou. E mayordomo a bisa den su mes: “Awor ku mi doño ta bai kita mi for di mi trabou di mayordomo, kiko mi mester hasi? Mi no ta sufisiente fuerte pa koba buraku, i mi tin bèrgwensa di pidi limosna.” Pensando riba su futuro, el a bisa den su mes: “Ahan! Mi sa kaba kiko mi ta bai hasi, ya ora mi pèrdè mi trabou komo mayordomo, hende lo risibí mi den nan kas.” Mesora el a manda yama e hendenan ku tabata debe su doño i a puntra kada un: “Kuantu bo debe mi doño?”—Lukas 16:3-5.

E promé a kontest’é: “Shen midí grandi di zeta di oleifi.” Esei tabata mas o ménos 580 galòn, òf 2.200 liter, di zeta. Kisas e persona akí tabatin un plantashon grandi di oleifi òf kisas e tabata un komersiante ku tabata bende zeta. E mayordomo a bis’é: “Tuma bo papel di debe bèk i kai sinta i skirbi lihé 50 [290 galòn].”—Lukas 16:6.

E mayordomo a puntra un otro persona ku tabata debe e doño: “Awor abo, kuantu bo debe?” Su kontesta tabata: “Shen midí grandi di trigu.” Esei tabata un 17.000 kilo di trigu. E mayordomo a bis’é: “Tuma bo papel di debe bèk i skirbi 80.” Pues, el a baha e hòmber su debe ku 20 porshento.—Lukas 16:7.

E mayordomo tabatin outoridat pa baha debe di e personanan akí pasobra ainda e tabata na enkargo di e asuntunan finansiero di su doño. I bahando debe di e personanan akí, el a sera amistat ku nan di manera ku nan lo por a yud’é despues ku e pèrdè su trabou.

Dado momento, e doño a haña sa kiko a pasa. Loke e mayordomo a hasi a nifiká pèrdida pa e doño; apesar di esei, e doño a keda impreshoná i a elogiá e mayordomo pasobra el a “aktua na un manera sabí” maske e tabata “inhustu.” Hesus a sigui bisa: “Hende di e mundu akí, den nan trato ku hende di nan mes generashon, ta aktua mas sabí ku hende ku ta den e lus.”—Lukas 16:8.

Hesus no a hustifiká loke e mayordomo a hasi ni a animá hende pa hasi negoshi desonesto. Kiko tabata su punto anto? El a urgi su disipelnan pa “sera amistat pa medio di rikesa inhustu” di manera ku e amigunan ku nan haña por risibí nan den e lugánan di biba ku ta eterno ora e rikesa ei kaba. (Lukas 16:9) Sí, tin un lès ku nos por siña for di esaki: Nos mester plania pa futuro i aktua na un manera sabí. Sirbidónan di Dios, esta, “hende ku ta den e lus,” mester usa nan rekursonan material na un manera sabí, ku futuro eterno na mente.

Ta Yehova Dios i su Yu so por risibí un persona den e Reino selestial òf den Paradeis riba tera. P’esei, nos mester hasi esfuerso diligente pa nos tin un bon amistat ku nan. Un manera ku nos por hasi esei ta di usa nos rekursonan material pa apoyá interesnan di Reino. Di e manera ei, nos futuro eterno por ta bon sigurá ora oro, plata òf otro kos material no por yuda nos ku nada.

Hesus a mustra ku personanan ku ta usa nan kosnan material bon lo ta fiel tambe ora di kuida kosnan di muchu mas importansia. El a bisa: “Si boso no demostrá ku boso ta fiel en konekshon ku rikesa inhustu, ken lo konfia boso ku loke ta berdadero rikesa [por ehèmpel, interesnan di Reino]?”—Lukas 16:11.

Pues, Hesus a mustra su disipelnan bon kla ku hopi ta ser sperá di nan si nan ke ser risibí “den e lugánan di biba ku ta eterno.” Un hende no por ta un berdadero sirbidó di Dios i na mes momento un esklabo di rikesa inhustu. P’esei, Hesus a konkluí, bisando: “Ningun kriá no por ta esklabo di dos doño, pasobra sea lo e odia esun i stima e otro, òf lo e pega na esun i despresiá e otro. Boso no por ta esklabo di Dios i di Rikesa.”—Lukas 16:9, 13.