Kambionan Ku Yu Ta Trese den un Matrimonio

Nasementu di un yu por ta emoshonante i na mes momento un responsabilidat di peso pa un pareha. Ora boso bira tata i mama, boso lo por keda sorprendí ku gran parti di boso tempu i energia ta bai na e bebi. Falta di soño i kambionan emoshonal por pone preshon riba boso matrimonio. P’esei, tantu abo komo bo kasá tin ku hasi ahuste pa boso por kuida e bebi i na mes momento kuida boso matrimonio. Kon Beibel por yuda boso trata ku e retonan akí?

1 KOMPRONDÉ KU YEGADA DI UN BEBI TA KAMBIA BOSO BIDA

LOKE BEIBEL TA BISA: “Amor tin pasenshi i ta bondadoso.” E “no ta buska su mes interes, [ni] e no ta rabia lihé.” (1 Korintionan 13:4, 5) Ora bo kaba di haña yu, ta natural ku bo atenshon ta bai pa bo bebi. Pero esei por pone bo esposo kuminsá sintié bandoná; p’esei, kòrda ku e tambe tin mester di bo atenshon. Tene pasenshi i trat’é ku bondat pa e sinti ku bo tin mester di dje i ku e tambe ta hunga un ròl den kuido di boso yu.

“Esposonan, sigui biba ku boso esposanan segun konosementu.” (1 Pedro 3:7) Komo esposo, bo mester komprondé ku bo kasá tin ku usa mayor parti di su energia pa kuida e bebi. I kisas debí na e responsabilidat nobo akí, e tin strès, e ta kansá òf asta deprimí. Ratu ratu e por asta rabia ku bo. Pero keda kalmu, pasobra “esun ku no ta rabia lihé ta mihó ku e poderoso.” (Proverbionan 16:32) Komprondé p’e i dun’é e sosten ku e tin mester.—Proverbionan 14:29.

LOKE BO POR HASI:

• Tata: Yuda bo kasá kuida e bebi, anochi tambe. Kita tempu for di otro aktividat pa bo por pasa mas tempu ku bo kasá i boso bebi

• Mama: Ora bo kasá ofresé pa yuda bo ku e bebi, aseptá su yudansa. Si e no hasi algu perfektamente, no kritik’é; mustr’é bondadosamente kon tin ku hasié

2 FORTALESÉ BOSO RELASHON

LOKE BEIBEL TA BISA: “Nan lo bira ún karni.” (Génesis 2:24) Pues, apesar ku boso tin un miembro nobo den famia, keda kòrda ku ainda abo ku bo kasá ta “ún karni.” Hasi tur boso esfuerso pa boso relashon por keda fuerte.

Esposa, keda kontentu ku e yudansa i sosten di bo kasá. Bo palabranan di gratitut por trese “kuramentu.” (Proverbionan 12:18) Esposo, bisa bo kasá kuantu bo ta stim’é i balor’é. Elogi’é pa e manera ku e ta kuida boso famia.—Proverbionan 31:10, 28.

“Laga kada hende sigui buska, no su mes benefisio, sino esun di e otro persona.” (1 Korintionan 10:24) Semper hasi loke ta mihó pa bo kasá. Komo pareha, tuma tempu pa kòmbersá ku otro, pa elogiá otro i pa skucha otro. I pa loke ta relashon seksual, no sea egoista. Tene kuenta ku nesesidat di bo kasá. Beibel ta bisa: “No nenga di kumpli ku e deber ei pa ku otro” a ménos ku ta “ku konsentimentu di otro.” (1 Korintionan 7:3-5) Pues, papia frankamente ku otro riba e tópiko akí. Pasenshi i konsiderashon pa otro lo hasi boso relashon mas fuerte.

LOKE BO POR HASI:

• Kòrda traha tempu pa boso dos so ta huntu

• Hasi kos chikitu ku ta laga bo kasá sinti ku bo ta stim’é; por ehèmpel, bo por dun’é un regalo chikitu òf manda un mensahe p’e

3 SIÑA BOSO BEBI

LOKE BEIBEL TA BISA: “For di chikitu bo konosé e skrituranan santu ku por hasi bo sabí pa salbashon.” (2 Timoteo 3:15) Plania kon boso ta bai siña boso bebi. Su kapasidat di siña ta impreshonante, asta promé ku e nase. For di den barika e por rekonosé boso stèm i reakshoná riba boso emoshonnan. Lesa p’e for di ora e ta bebi. Maske kisas e no ta komprondé loke boso ta lesa, esei por pone ku ora e bira grandi e lo gusta lesa.

Nunka boso bebi no ta muchu chikitu pa boso papia kuné tokante Dios. Lag’é skucha boso hasi orashon na Yehova. (Deuteronomio 11:19) Asta ora boso ta hunga kuné, papia kuné tokante e kosnan ku Dios a traha. (Salmo 78:3, 4) Segun ku e ta krese, lo e sinti e amor ku boso tin pa Yehova i e tambe lo siña stima Yehova.

LOKE BOSO POR HASI:

• Pidi Yehova spesífikamente pa e duna boso sabiduria pa siña boso bebi

• Ripití palabra- i ideanan klave di manera ku boso bebi por kuminsá siña nan for di chikitu