Speransa​—Ta Hasi un Diferensia den Bida?

DANIEL tabatin apénas 10 aña, pero ya kaba e tabatin un aña ta lucha kontra kanser. Su dòkternan i sernan kerí a pèrdè speransa, pero Daniel nò. E tabatin sigur ku lo e krese bira grandi i e kier a usa su bida pa investigá kanser i haña un kura p’e. Yen di speransa, e tabata warda riba bishita di un dòkter ku tabata spesialisá den e tipo di kanser ku e tabatin. Pero ora e dia a yega, dòkter a kanselá su bishita pasobra tabatin mal wer. Esei a kibra Daniel, i pa promé biaha, el a keda tur desanimá. Un par di dia despues, el a muri.

Un profeshonal médiko, ku tabata studia e efekto ku speransa i desesperashon tin riba hende su salú, a konta e relato di Daniel. Kisas bo tambe a yega di tende di algun kaso similar. Por ehèmpel, un persona di edat ta serka di muri, pero e tin masha gana pa e dia yega pa un evento importante, manera un bishita di un ser kerí òf selebrashon di un fecha spesial. Ma asina ku e momento tan sperá pasa, e persona ta fayesé djis despues. Ta kiko a ten’é na bida? Speransa por tin un influensia asina grandi, manera algun hende ta kere?

Un kantidat kresiente di investigadó médiko ta bisa ku optimismo, speransa i otro emoshon positivo di bèrdat tin un gran influensia riba bida i salú di hende. Pero no ta tur investigadó ta di akuerdo ku esei. Tin di nan ta rechasá e deklarashonnan ei i ta konsiderá nan komo mito òf idea popular ku no tin niun base sientífiko. Nan ta preferá di pensa ku malesa físiko tin kousa físiko so.

Klaru ku no ta awor hende tin duda tokante e importansia di speransa. Míles di aña pasá, ora nan a pidi e filósofo griego Aristóteles pa duna un definishon di speransa, el a kontestá: “Speransa ta ora un hende ta soña lantá.” I mas resien, Benjamin Franklin, un personahe polítiko merikano, a komentá sarkástikamente: “E persona ku ta biba di speransa lo muri di hamber.”

Pues, kiko ta e bèrdat tokante speransa? E ta semper djis un ilushon, un manera di buska konsuelo den fantasia? Òf tin motibu bálido pa konsiderá speransa komo algu mas ku un ilushon, sí, komo algu ku nos tur tin mester di dje pa nos ta salú i felis, algu ku tin fundeshi firme i ta trese berdadero benefisio?