E Punto di Bista Bíblico

Cristiannan Mester Odia Homosexualnan?

NA 1969 nan a inventá un palabra na ingles cu a describí un miedu irazonabel of un repugnancia pa cu homosexualnan. E palabra ta “homofobia.” Hopi idioma no tin un palabra specífico asina, pero pa miles di aña, hende den hopi nacion i lenga a desplegá un disgustu pa cu homosexualnan.

Pero último tempu hende a promové homosexualidad na tur parti como djis un forma alternativo di expresion sexual. Recientemente historiadó Jerry Z. Muller a skirbi cu “mas i mas [nan ta] exigí reconocimentu público i respet pa homosexualidad como tal.” El a splica cu homosexualnan “cada bes mas ta uniendo huntu pa proclamá nan práctica como cos di elogiá, i pa exigí pa otronan haci mescos.” Por mira esaki foral den paisnan di Occidente. Sin embargo, den mayoria parti di mundu, asta den paisnan asina yamá liberal, ainda tin hopi hende cu ta condená i menospreciá homosexualidad.

Hopi bes homosexualnan i esnan cu ta ser sospechá di ta homosexual ta bira e blanco di cherche, molester i violencia. Asta lidernan religioso a manifestá un odio asina. Algun asta a cuminsá loke por parce di ta nan propio guera privá contra homosexualnan. Tuma por ehempel e comentarionan di un obispu dje Iglesia Griego Ortodox cu recientemente a ser transmití via radio nacional di Grecia. El a declará: “Dios lo kima homosexualnan pa semper den e pos cu candela di fiernu. E gritunan cu ta sali for di nan boca sushi lo resoná pa tur eternidad. Nan curpa perverso lo experenciá tormento insoportabel.” Acaso esaki ta berdad? Kico Dios ta pensa di homosexualnan?

Dios Su Punto di Bista

Bijbel no ta hala atencion special na homosexualnan como un grupo cu cristiannan mester evitá of odia. Ademas, Bijbel no ta siña cu Dios lo castigá homosexualnan—ni ningun otro di su criaturanan—dor di kima nan den un fiernu di candela pa semper.—Compará cu Romanonan 6:23.

Sin embargo, e Scritura ta splica sí cua ta e normanan moral di nos Creador, cuanan hopi bes ta bai contrario na e actitudnan moral djawendia. Actonan homosexual, sex heterosexual entre hende cu no ta casá i acto sexual cu bestia, tur ta ser condená den Bijbel. (Exodo 22:19; Efesionan 5:3-5) Dios a destruí Sódoma i Gomora pa motibu di prácticanan sexual asina.—Génesis 13:13; 18:20; 19:4, 5, 24, 25.

Relacioná cu actonan homosexual, e Palabra di Dios ta bisa masha cla: “Ta un akto masha repugnante.” (Levítico 18:22; Sosiedat Antiano di Beibel) E Ley cu Dios a duna Israel a stipulá: “Ora un homber drumi cu un hende homber mescos cu e ta drumi cu un muher, nan tur dos a haci algu detestabel. Sin falta mester mata nan.” (Levítico 20:13) E mésun castigu tabata prescribí pa esnan cu a cometé incesto, adulterio i actonan sexual cu bestia.—Levítico 20:10-12, 14-17.

Bou di inspiracion apostel Pablo a describí actonan homosexual como expresion di “apetit sexual bergonsoso” i como “contrario cu naturalesa.” E ta skirbi: “Pa e motibu ei Dios a entregá nan na apetit sexual bergonsoso, pasobra tantu nan hende muher a cambia e uso natural di nan mes na loke ta contrario cu naturalesa; i di igual manera asta e hombernan a bandoná uso natural di hende muher i a bira violentamente cendí den nan deseo sexual un pa otro, homber cu homber, obrando loke ta obseno i ricibiendo den nan mes e recompensa completo, cu tabata debí na nan pa nan eror. I mescos cu nan no a aprobá di tene Dios den conocimentu exacto, Dios a entregá nan na un estado mental desaprobá, pa nan haci cosnan cu no ta pas.”—Romanonan 1:26-28.

E Scritura no ta duna ningun hustificacion, ni concesion ni no ta papia vago: prácticanan homosexual, adulterio, fornicacion, tur ta repugnante den bista di Dios. P’esei, cristiannan berdadero no ta suavisá e posicion dje Bijbel pa cu “apetit sexual bergonsoso” djis pa bira mas popular of mas aceptabel den e cultura moderno. Ni tampoco nan no ta bai di acuerdo cu ningun movementu cu ta dedicá nan mes na promové homosexualidad como un estilo di bida normal.

“Odia Loke Ta Malu”

Bijbel ta amonestá: “O stimadónan di Jehova, odia loke ta malu.” (Salmo 97:10) P’esei, ta ser verwagt di cristiannan pa nan odia tur práctica cu ta violá e leynan di Jehova. Algun hende lo por asta tin sintimentunan mas fuerte di repugnancia of disgustu pa cu homosexualidad cu pa cu otro tipo di inmoralidad, ya cu nan ta mira homosexualidad como un perversion sexual innatural. Pero cristiannan mester odia e individuonan cu ta practicá cosnan asina?

E salmista ta tira lus riba e asuntu aki na Salmo 139:21, 22: “Mi no ta odia esnan cu ta odiá bo intensamente, O Jehova, i mi no ta sinti asco pa esnan cu ta lanta contra bo? Cu un odio completo mi ta odia nan. Nan a bira berdadero enemigu pa mi.” Nos lealtad na Jehova i na su principionan mester generá den nos un disgustu contra esnan cu ta rebelá deliberadamente contra Jehova i cu ta tuma un posicion como enemigunan di Dios. Satanas i e demoñonan ta entre esnan cu ta enemigunan sigur di Dios. Probablemente algun hende tambe ta cai den e categoria aki. Sin embargo, por ta hopi difícil pa un cristian identificá hende asina na nan aparencia externo. Nos no por lesa curason. (Jeremías 17:9, 10) Lo ta robes pa asumí cu un hende ta un enemigu ireformabel di Dios, pa motibu cu e ta practicá loke ta malu. Den hopi caso esnan cu ta haci malu simplemente no conocé e normanan di Dios.

P’esei, en general, cristiannan no ta lihé pa odia nan próhimo. Asta si nan ta odia cierto estilonan di bida intensamente, nan no ta busca manera di heridá otronan, ni nan no ta carga rencor of malicia contra nan. Mas bien, Bijbel ta consehá cristiannan pa “sea pacífico cu tur hende.”—Romanonan 12:9, 17-19.

“Dios No Ta Parcial”

Jehova lo pordoná e persona cu ta berdaderamente repentí, sin importá ki inmoralidad e hende ei por tabata cometiendo. No tin evidencia cu Jehova ta mira un forma di inmoralidad como mas pió cu un otro. “Dios no ta parcial.” (Echonan 10:34, 35) Tuma por ehempel e caso dje congregacion di promé siglo na Corinto. Apostel Pablo a skirbi nan: “Ni fornicadó, ni idólatra, ni adúltero, ni homber wardá pa propósito innatural, ni homber cu ta drumi cu homber, ni ladron, ni haragan, ni buraché, ni zundradó, ni estafadó lo heredá e reino di Dios.” Despues Pablo a admití cu algun hende cu un tempu tabata fornicadó, adúltero, homosexual i ladron a ser aceptá den e congregacion cristian na Corinto. El a splica: “I tog esei ta loke algun di boso tabata. Pero boso a ser labá limpi, pero boso a ser santificá, pero boso a ser declará hustu den e nomber di nos Señor Jesucristo i cu e spiritu di nos Dios.”—1 Corintionan 6:9-11.

Naturalmente, Jehova no ta tolerá pa ningun hende sigui persistí den violá su normanan moral perfecto. Definitivamente e ta odia ora hende ta menospreciá su principionan obstinadamente. Sin embargo, e ta laga e oportunidad habrí pa hende reconciliá cuné. (Salmo 86:5; Isaías 55:7) Na armonia cu esaki, cristiannan no ta haci homosexualnan, ni ningun otro hende, e blanco di rencor, bofon of molester. Cristiannan berdadero ta mira nan próhimo como potencial disipelnan di Cristo i ta trata nan den un manera respetuoso i cu dignidad. Bijbel ta bisa: “Esaki ta excelente i aceptabel den bista di nos Salbador, Dios, kende su boluntad ta pa tur clase di hende ser salbá i yega na un conocimentu exacto dje berdad.”—1 Timoteo 2:3, 4.

Cristiannan Ta Aceptá cu Gustu Esnan Repentí

Bes tras bes, Bijbel ta declará cu Dios ta pordoná. E ta describié como “un Dios di actonan di pordon, yen di gracia i misericordioso, cu ta tarda pa rabia i ta abundante den bondad amoroso.” (Nehemías 9:17; Ezekiel 33:11; 2 Pedro 3:9) Tambe Bijbel ta compar’é cu e tata den Jesus su comparacion tocante e yu perdí cu a malgastá su herencia dor di libertinahe den un pais distante. E tata tabata spera cu brasa habrí pa aceptá su yu bek ora por fin el a bolbe na su sano huicio, a repentí i a bolbe bek n’e cas di su famia.—Lucas 15:11-24.

Sí, un hende cu ta haci malu por cambia. E Scritura ta reconocé esaki dor di animá hende pa kita e personalidad bieu i bisti esun nobo i pa ‘ser hací nobo den e forsa cu ta impulsá e mente.’ (Efesionan 4:22-24) Esnan cu ta practicá loke ta malu, incluyendo homosexualnan, por haci cambionan radical den nan forma di pensa i actua, i hopi di nan tabatin éxito berdad den haci e transformacion aki.a Jesus mes a predicá na hende asina, i ora nan a mustra repentimentu, nan a bira aceptabel p’e.—Mateo 21:31, 32.

Cristiannan ta aceptá cu gustu hende repentí cu diferente antecedente. Despues di a laga prácticanan inmoral atras, sea cual sea nan tabata, tur por disfrutá di e pleno beneficio di Dios su pordon, pasobra “Jehova ta bon pa cu tur, i su misericordia ta riba tur su obranan.”—Salmo 145:9.

Cristiannan ta cla pa ofrecé e apoyo spiritual necesario, asta na esnan cu ainda ta luchando cu inclinacionnan homosexual. Esaki ta na armonia cu e manera cu Dios mes ta mustra amor, pasobra Bijbel ta bisa: “Dios ta recomendá su mes amor na nos den e echo cu, miéntras nos tabata pecadó ainda, Cristo a muri pa nos.”—Romanonan 5:8.

[Nota]

[Komentario na página 29]

Cristiannan no ta suavisá e punto di bista di Bijbel tocante homosexualidad

[Plachi Rekonosementu na página 28]

Punch