Un Pueblo Cu A Siña Stima

AMOR ta cariño basá riba admiracion, bondad of interes comun. Amor ta un enlace caluroso. E no ta egoista, e ta leal i ta mustra un interes bondadoso den e bienestar di otronan. Amor ta e antítesis mes di odio. Un persona motivá pa odio ta totalmente dominá pa su mes pasion; un hende motivá pa amor ta pensa riba otronan.

Amor of odio—cua di dos ta dominá bo bida? Esaki ta mas cu solamente un pregunta teorético, pasobra bo futuro eterno ta dependé dje contesta. Tin miyones di hende cu, maske nan ta bibando den un mundu cu ta siña odia, ta siñando pa stima. Nan ta haci esaki dor di bisti un personalidad nobo. Nan no ta djis papia tocante amor; nan ta haciendo hopi esfuerso pa practik’é.

Si bo a yega di asistí na un reunion di Testigonan di Jehova, kisas bo a keda impresioná cu loke bo a mira. Sin importá e nacionalidad, Testigonan di Jehova ta uní den adoracion. Nan ta forma un hermandad berdaderamente internacional. Por observá esaki den nan congregacionnan local i na nan congresonan, pero kisas ningun caminda mihó cu den loke nan ta yama famianan di Betel. Esakinan ta gruponan di boluntario cu ta biba i traha huntu, como famia, pa producí i distribuí literatura bíblico. Den cada pais, algun di nan ta supervisá e trabou cu Testigonan di Jehova ta haci einan. Esaki no ta un tarea fácil, ya cu, pa 1997, esei ta enbolbé mas cu 82.000 congregacion den 233 pais. Pa yena e necesidad aki, mas cu 16.000 persona ta sirbi den e famianan di Betel rond mundu, incluyendo n’e sede mundial i na vários facilidad di sucursal mas chikitu den 103 pais.

Mayoria famia di Betel ta consistí den su mayor parti di ciudadanonan dje pais den cua e sucursal en particular ta situá. Pero no exclusivamente. Algun famia di Betel ta consistí di Testigonan di vários orígen nacional, étnico of racial, como tambe di diferente antecedente religioso, promé cu nan a bira Testigo. Por ehempel, den e famia di Betel di casi 1.200 persona na Selters, Alemania, tin un 30 nacionalidad representá. Kico ta yuda nan biba, traha i adorá huntu den pas i unidad, den un ambiente liber di odio? Nan ta siguiendo e conseho bíblico na Colosensenan 3:14, cu ta bisa:

“Bisti Boso cu Amor”

Ningun hende ta nace cu paña bistí, ni ningun hende ta haña paña na su curpa djis dor di papia di dje. Pa bisti paña bo mester tuma decisionnan definitivo i despues haci esfuerso pa hiba nan a cabo. Mescos tambe, ningun hende ta nace bistí cu amor. No ta suficiente pa solamente papia di dje. Esfuerso ta necesario.

Paña ta sirbi vários propósito. E ta protehá e curpa, e ta tapa partinan di dje cu ta mahos of imperfecto, i te na cierto grado ta revelá e personalidad di un hende. Amor ta casi mescos. E ta sirbi como un proteccion, pasobra amor pa principionan hustu i pa bon asociacion ta motivá bo pa evitá asociacion of lugánan cu por ta peligroso. E ta sirbi pa protehá relacionnan personal, cu mester ta di gran balor pa nos. Ta mas probabel cu esun cu ta stima lo haña amor en buelta, i ta mas probabel cu esun cu ta keda sin causa daño na otronan, lo keda sin haña daño e mes.

Tambe amor ta tapa e partinan mas mahos di nos personalidad, cu lo por molestiá otronan. No ta asina cu nos ta mas incliná na pasa por haltu di faltanan menor den hende cu ta amoroso, cu nos ta pa cu individuonan cu ta orguyoso, arogante, egocéntrico i cu falta amor?

Hende cu ta bisti nan mes cu amor ta revelá e bunitesa di un personalidad manera di Cristo. Miéntras cu bunitesa físico ta solamente superficial, bunitesa spiritual ta enbolbé e persona completo. Probablemente bo conocé hende cu bo ta haña bunita, no pa motibu di nan aparencia físico, sino pa motibu di nan personalidad berdaderamente caluroso. Na otro un banda, mayoria di nos a yega di topa cu hende muher bunita of hende homber nechi cu a perde delaster un rasgo di encanto den nos bista asina cu nan berdadero personalidad a sali na cla. Ta ki placentero pa ta rond di hende cu a bisti nan mes cu amor!

Reemplasando Odio cu Amor

Cu ta posibel pa reemplasá odio cu amor a ser ilustrá dor di un encuesta cu a ser hací na 1994 bou di 145.958 Testigo di Jehova na Alemania.

Di un manera of otro, bebementu di mas, abusu di droga, crímen, wega di placa i actonan antisocial of violento, ta formanan di egoismo, cu fácilmente por fomentá odio. Pero 38,7 porciento di esnan encuestá a bisa cu, pa por a yega n’e normanan haltu di Bijbel cu e Testigonan ta respaldá, nan mester a vence un of mas dje problemanan aki. Amor pa Dios i pa su normanan hustu di conducta ta loke a motivá nan pa haci esei. Amorosamente Testigonan di Jehova a duna yudansa, hopi bes riba un base personal. Durante e último cincu añanan (1992-1996), 1.616.894 hende den 233 pais a ser yudá pa haci cambio, venciendo odio cu un amor cu ta triunfá riba tur cos.

Testigonan di Jehova a logra establecé relacionnan matrimonial stabil dor di practicá un amor inegoista. Den algun pais un di cada dos of tres matrimonio ta caba den divorcio. Pero e encuesta mencioná anteriormente a indicá cu actualmente 4,9 porciento so di Testigonan ta divorciá of separá for di nan casá. Sin embargo, no mester lubidá cu un gran parti di esakinan a divorciá promé cu nan a bira Testigo di Jehova.

Siendo cu e Dios di amor ta un Magnífico Instructor cu ta siña esnan cu ta stim’é su camindanan, Testigonan di Jehova ta pone nan amor p’e promé cu tur otro cos of hende. Distinto for di otro hende, cu por ta “stimadó di placer mas bien cu stimadó di Dios,” Testigonan di Jehova ta pone Dios promé. (2 Timoteo 3:4) Contrario n’e camindanan dje mundu sin principionan aki, na Alemania e Testigo promedio ta dedicá 17,5 ora tur siman na actividadnan religioso. Ta obvio cu e Testigonan tin inclinacion spiritual. Esei ta loke ta haci nan felis. Jesus a bisa: “Felis ta esnan cu ta conciente di nan necesidad spiritual, ya cu e reino di shelu ta pertenecé na nan.”—Mateo 5:3.

Segun e escritor di Salmo 118, e berdadero sirbidó di Dios no tin nodi tin miedu di hende. “Jehova ta na mi banda; lo mi no tin miedu. Kico hende terenal por hací mi?” (Versículo 6) Confiansa total den Dios ta libra un hende dje causanan di odio i miedu di otro hende.

Un cristian, sabiendo cu Dios ta ‘tarda pa rabia i ta abundante den bondad amoroso i apego na e berdad,’ lo haci esfuerso pa eliminá rabia for di su bida, ya cu e por ta un causa mas pa odio. Dor di desaroyá e frutanan di Dios su spiritu, incluyendo suavedad i dominio propio, lo e ser yudá pa logra esaki.—Salmo 86:15; Galationan 5:22, 23.

Un berdadero cristian ta humilde i no ta pensa mas di su mes cu ta necesario. (Romanonan 12:3) E ta cultivá amor den su trato cu otronan. Na contraste cu odio, amor “no ta bira provocá. E no ta tene cuenta dje daño.”—1 Corintionan 13:5.

Sí, miedu, rabia of un sintimentu di ta ser perhudicá por pone hende odia. Pero dor cu amor ta eliminá e base pa odio, e ta triunfá riba dje. Sí, amor ta e forsa mas poderoso den e universo, pasobra “Dios ta amor.”—1 Juan 4:8.

Pronto Odio Lo Disparcé pa Semper

Ya cu egoismo i odio no ta parti di Jehova Dios su personalidad, nan no por permanecé pa semper. No tin otro manera: nan mester ser kitá. Nan mester ser reemplasá pa amor, cu lo dura pa eternidad. Si un mundu sin odio, i yen di amor, ta e clase di mundu cu bo ta anhelá p’e, laga Testigonan di Jehova splicá bo for di Bijbel cua ta e rekisitonan pa biba pa mir’é.

Sí, cada un di nos lo haci bon di puntra: ‘Cua cualidad ta dominá mi bida, amor of odio?’ Esaki ta mas cu djis un pregunta teorético. E curason cu ta bati pa e adversario di Dios, un dios di odio, lo no bati pa hopi tempu. E curason cu ta bati pa Jehova, e Dios di amor, lo bati pa semper!—1 Juan 2:15-17.

[Plachi na página 10]

Asta awe hende por bisti nan mes cu amor