Testigonan di Jehova na Rusia

E Punto di Bista di un Teólogo

NA Roma, lidernan dje comunidad hudiu dje promé siglo a comentá tocante cristianismo: “Pa loke ta e secta aki, ta conocí pa nos cu tur caminda hende ta papia contra dje.” Kico e lidernan ei a haci? Nan a bai cerca apostel Pablo, cu tabata bou di huisarrest, i a declará: “Ta parce nos bon pa tende for di bo kico ta bo pensamentunan,” locual tabata un acto encomendabel. (Echonan 28:22) Nan a scucha un cristian bon informá, en bes di esnan cu tabata papia contra cristianismo.

Sergei Ivanenko, un teólogo ruso masha respetá, a haci mescos. Maske el a kere hopi dje informenan negativo tocante Testigonan di Jehova cu tabata circulá na Rusia, el a dicidí di yama e sucursal dje Testigonan, situá net pafó di St. Petersburg, pa haña informacion. El a aceptá un invitacion pa haci nan un bishita, haci pregunta i observá e Testigonan personalmente.

Ora Sr. Ivanenko a yega ei na october 1996, e facilidadnan cu ta acomodá e casi 200 miembronan dje personal dje sucursal di Testigonan di Jehova na Rusia tabata casi cla. Pa e siguiente tres dianan, el a haña e oportunidad pa observá e sitio di construccion, come den e comedor, i entrevistá ken cu e tabata kier.

Un artículo cu Sr. Ivanenko a skirbi tocante e Testigonan a ser publicá den e revista ruso popular Moscow News di 16-23 di februari, 1997. E artículo, titulá “Nos Mester Tin Miedu di Testigonan di Jehova?,” a aparecé tambe den e edicion na ingles di Moscow News, di 20-26 di februari. Ya cu hopi lector di Spierta! ta sumamente interesá den e actividad di Testigonan di Jehova na Rusia, nos ta reproducí aki, cu permiso, mayor parti dje artículo mencioná. Sr. Ivanenko a cuminsá cu e siguiente experencia, cu tabata skirbí cu letter diki:

“‘Sectarionan, sali for di Rusia!’ Asina e poster cu miembronan dje partido di Zhirinovsky, LDPR, tabata waya a bisa. Nan tabata manifestando pafó di un reunion di Testigonan di Jehova. ‘Kico bo no ta gusta dje organisacion aki?’ mi a puntra un dje manifestantenan. El a duná mi un ehemplar dje korant Megapolis-Express cu a hiba e título ‘Epidemia Religioso di Sífilis na Kamchatka.’ E korant a bisa cu pa por yega na cen p’e organisacion, Testigonan di Jehova tabata traha como chulo i tabata manehando círculonan di prostitucion, plamando malesa venérico entre e marineronan. ‘Abo tambe ta un dje víctimanan?’ mi a puntr’é cu duele. ‘Bo ta kere e cos aki?’ ‘Esei no ta importá,’ tabata e contesta. ‘E cos principal ta cu e secta mericano aki ta ruinando e spiritualidad i cultura di Rusia, i nos mester stop e.’”

E artículo cu Sr. Ivanenko a skirbi, a sigui despues dje acreditacion: “Di Sergei Ivanenko, teólogo, graduando den filosofia.”

“Onestidad manera esaki ta raro en berdad, maske ta cierto cu hopi ruso no ta gusta Testigonan di Jehova mashá. Djis mencioná e organisacion aki so ta desencadená un seri di comentario tocante su fanatismo lamentabel, su orígen mericano, tocante e fe ciegu cu su miembronan comun tin den e lidernan dje organisacion, i e creencia cu e fin di mundu ta ei mes tras di porta. Cerca hopi hende Testigonan di Jehova ta producí un miedu mesclá cu curiosidad.

Kico e Religion aki Ta, i Nos Mester Tin Miedu di Dje?

Pa por a averiguá esei pa mi mes, mi a bishitá e pueblito di Solnechnoye, den e distrito di Kururtnoye, St. Petersburg, caminda e centro administrativo dje Testigonan di Jehova ruso ta localisá.

***

[Esaki ta] na e sitio caminda un tempu tabatin un campamentu di vakansi. Pa 1992 e edificio [original] tabata den un estado hopi deplorabel, i en bes di mucha tabatin bagamundu i un cantidad di djaca. Aparentemente, tabata e condicion di deterioro aki dje área cu a yuda e Testigonan di Jehova haña e tereno di shete hectar pa usa pa tempu indefiní. Nan a renobá e structuranan bieu i a cuminsá construí edificionan nobo tambe, incluyendo un edificio administrativo di cuater piso, un [Salon di Reino] cu capacidad pa 500 hende, i un comedor. Tambe Testigonan di Jehova ta plantando yerba nobo (cu nan a manda busca specialmente for di Finlandia) i vários sorto di palu raro. Nan ta spera cu pa zomer binidero e trabou lo ta cla. E trabou principal dje centro administrativo ta organisá e actividad di predicá i distribuí literatura n’e congregacionnan local di Testigonan di Jehova. Siendo cu Solnechnoye no tin su propio facilidadnan di imprenta, e literatura na ruso ta ser imprimí na Alemania. Despues e ta bai pa St. Petersburg, for di unda e ta ser distribuí na e regionnan. Rond di 190 hende ta traha na e centro. Nan ta traha como boluntario i maske nan no ta ricibí salario, nan ta haña tur e necesidadnan básico, manera lugá di biba, cuminda i paña.

E trabou dje centro ta bou dje guia di un comité di 18 anciano. Desde 1992 Vasily Kalin ta e coordinadó dje centro administrativo. El a nace na Ivano-Frankovsk. Na 1951, na edad di cuater aña, e i su mayornan a ser exiliá pa Siberia (na 1949 i 1951 autoridadnan a persiguí rond di 5.000 famia dor cu nan tabata Testigonan di Jehova). El a bautisá na 1965 i a biba den e region di Irkutsk. El a traha como forman na un planta di procesamentu di palu.

Ademas dje boluntarionan n’e centro administrativo, tin tambe 200 trahadó di construccion boluntario for di Rusia, Finlandia, Suecia i Norwega bibando na Solnechnoye: Mayoria di nan a tuma liber for di nan trabou seglar. Tambe tin hopi Testigo di Jehova for di Ucrania, Moldova, Alemania, Merca, Finlandia, Polonia i otro paisnan. (Testigonan di Jehova no tin prehuicio racial. Apesar dje echo cu georgiano, abkaziano, azerbaijano i armenionan ta biba lado a lado n’e centro, den cuater aña no tabatin ni un solo conflicto.)

E mayor parti dje material i ekipo di construccion a ser suministrá dor di paisnan scandinavo, i hopi cos a ser obsekiá dor di compañeronan creyente. Nan a mustrá mi un buldozer cu un Testigo di Jehova sueco a trece Solnechnoye na 1993. Tur e tempu cu e tabata ei, el a traha riba dje, i promé cu el a bai cas bek el a regal’é na su rumannan den fe. E trahadónan di construccion ta keda den pensionnan i cabañanan confortabel. Nan dia ta bai mas of ménos asina aki: 7:00 a.m.—desayuno i oracion; nan ta traha di 8:00 a.m. te 5:00 p.m., cu un ora pa almuerso. Diasabra nan ta traha te merdia, i diadomingo ta un dia di descanso.

Nan ta come bon i semper tin fruta riba menú. E religion no ta warda ningun yunamentu i no ta pone absolutamente ningun restriccion dietético estricto. Despues di trabou, hopi di nan ta bai sauna i despues ta dal un cerbes i ta sinta scucha música. No tin buraché entre Testigonan di Jehova, pero no ta prohibí tampoco pa bebe alcohol. Creyentenan mag bebe cantidadnan moderá di biña, coñac, vodka, etcétera. Sin embargo, Testigonan di Jehova no ta huma.

***

Tres biaha pa siman tin les di Bijbel, i e gran mayoria cu ta asistí ta hóbennan. Sin embargo, no ta straño pa haña esnan cu ya tabata Testigonan di Jehova pa 30-40 aña. Casi tur esnan mas bieu tabata den prizon, camponan di trabou forsá i den exilio. Despues cu e periodo di represion a terminá, hopi dokter, abogado, ingeniero, maestro, comerciante i studiante a uni na e fila di Testigonan di Jehova.

E congregacionnan ta trata di mantené un ambiente di igualdad entre nan miembronan. Por ehempel, asta e coordinadó dje centro administrativo ta laba tayó atardi ora ta su beurt. Testigonan di Jehova ta cumindá otro den un manera informal i lo agregá tambe ‘ruman’ ora di yama un hende na su nomber.

Ora un Testigo di Jehova violá siñansa bíblico i nenga di repentí, e ta ser sometí na e forma mas severo di castigu: e ta ser expulsá. E persona por sigui bishitá reunionnan, pero su compañeronan creyente no ta cumind’é mas. Un medida ménos severo lo ta un reprendimentu.

***

Mi a pasa hopi tempu ta observá Testigonan di Jehova, tratando na haña sa ta kico a atraé asina tantu diferente hende na e organisacion religioso aki. Cu tur e diferencianan den nan personalidad, nivel di educacion i preferencianan personal, [Testigonan di Jehova no ta participá den adoracion huntu cu] religionnan cu ta comprometé cu e mundu pecaminoso. Nan ta sinti nan incómodo den lugánan caminda [hende] mester kere ciegamente den autoridad, caminda tin lugá pa loke ta místico, caminda hende ta ser dividí den e hirarkia i masanan obediente.

Nan creencia firme di biba di acuerdo cu e Bijbel ta distinguí Testigonan di Jehova for di otronan. Nan ta purba basa cada cos cu nan haci riba un of otro principio bíblico, of dor di cita un pasashi for dje Testament Bieu of Nobo. Testigonan di Jehova ta kere cu Bijbel ta absolutamente e único cu ta contené e contestanan pa tur pregunta. Pa Testigonan di Jehova, Bijbel ta e constitucion, e código civil i e expresion supremo dje berdad.

P’e motibu aki, Testigonan di Jehova ta conocí rond mundu pa ta hende cu ta cumpli cu ley di un manera impecabel, i specialmente pa nan actitud conciensudo pa cu pagamentu di belasting. Regularmente e oficina di inspeccion di belasting ta controlá nan i tur biaha ta keda asombrá cu no tin absolutamente ningun violacion. Naturalmente, mescos cu hopi otro, Testigonan di Jehova tambe lo por busca un motibu pa no paga belasting, pero Bijbel ta bisa cu mester ta onrado ora di paga belasting, i pa Testigonan di Jehova esei ta e último palabra.

Sin embargo, e echo cu nan ta nenga di comprometé nan principionan bíblico hopi bes ta e fuente di algun klèsh serio entre Testigonan di Jehova i gobiernu. Nan posicion absolutamente apolítico ta un punto principal di conflicto, i ta ser manifestá den nan nengamentu di sirbi den ehército.

Testigonan di Jehova ta interpretá Jesus su palabranan cu su disipelnan i su reino no ta parti dje mundu aki como literal. P’e motibu aki nan ta nenga di participá den política i guera, sin importá na unda i pa ki motibu e ta ser bringá. Pa motibu cu Testigonan di Jehova a nenga di grita ‘Heil Hitler’ i sirbi den e ehército di Hitler, hopi miles di creyente a ser mandá camponan di concentracion, i miles a muri. Cada Testigo di Jehova aleman cu a perde su bida dor di a nenga di tuma parti den e agresion contra Union Soviético, ta ser considerá dor di rusonan como un persona cu a cometé un acto moral haltu. Sin embargo, n’e mes momento, poco ruso ta incliná na sinti compasion pa e Testigonan di Jehova [ruso] cu a ser ehecutá dor di a nenga di carga arma i tuma parti den Guera Mundial II, of cu a ser condená dor di a nenga di sirbi den e ehército durante tempu di pas. Pero den ámbos caso, Testigonan di Jehova a actua di acuerdo cu nan creencianan religioso i no segun conviccionnan político.

No muchu tempu pasá, un problema similar a surgi na Hapon, caminda algun studiante cu tabata Testigo di Jehova a nenga di studia artenan marcial i a core e rísico di ser expulsá for di universidad. Na 1996 e Corte Supremo di Hapon a pasa un decision cu a apoyá e derecho dje studiantenan aki i a permití nan tuma vaknan alternativo.

***

Ta kico di e Testigonan di Jehova ta asombrá pensadónan moderno? Mas cu tur cos ta nan predicacion persistente cu e fin dje mundu ta tras di porta (nan ta haci trabou di misionero riba caya i di cas-pa-cas). Ultimamente ancianonan a consehá predicadónan pa no pone asina tantu énfasis riba e ‘fin di mundu’ i e futuro tristu cu lo bini riba pecadónan, sino mas bien pa nan splica scuchadónan cu Jehova ta ofreciendo nan e oportunidad pa haña ‘bida eterno den paradijs riba tera.’

Un otro causa di iritacion ta cu Testigonan di Jehova tin un actitud negativo pa cu contacto interreligioso, i cu nan ta rechasá unionnan ecuménico. Nan ta kere cu e mundu cristian a traicioná Dios i e Bijbel, i cu tur otro religion ta un eror desastroso. Testigonan di Jehova ta compará e religionnan aki cu e ‘muher di mala bida di Babilonia,’ i ta afirmá cu nan lo tin e mésun destino. Un edicion recien di ‘Spierta!’ ta declará cu e fin ta cerca pa vários religion, i cu e único religion cu lo permanecé ta esun cu Testigonan di Jehova ta predicá.

Por cierto, Testigonan di Jehova ta reconocé cu cada persona tin e derecho di libertad di concenshi.

***

Ya caba un cantidad di pais a expresá nan preocupacion di cu si e siñansanan di Testigonan di Jehova ta un menasa pa e sociedad. E Corte Supremo dje estado di Connecticut, Merca (1979) i di New South Wales, Australia (1972), e Corte Provincial di British Columbia, Cánada (1986) i otro cortenan a declará cu no tin evidencia cu Testigonan di Jehova ta un menasa social, of cu nan ta un menasa pa hende su salú of estado emocional. E Corte Europeo di Derechonan Humano (1993) a defendé e derecho di Testigonan di Jehova pa tin libertad di religion, locual tabata limitá den Grecia i Austria. Awe Testigonan di Jehova ta ser persiguí den 25 pais . . .

Debí na nan debocion na berdad bíblico i e echo cu nan ta dispuesto pa defendé nan creencianan asina inegoistamente, Testigonan di Jehova por ta considerá como un ehempel pa nan conciudadanonan. Pero e pregunta ta lanta: Nos sociedad ta prepará pa duna garantianan constitucional di libertad di concenshi na organisacionnan cu ta afirmá cu nan ta aplicá Bijbel den tur aspecto di bida den un manera asina radical i sin comprometé?”

Den e último frase aki, Sr. Ivanenko a lanta un pregunta importante. Den e promé siglo, apostel Pablo, kende Cristo a scoge directamente pa sirbi como su representante, a sufri inhustamente di “cadenanan di prizon.” P’esei, Pablo a skirbi compañeronan creyente tocante su esfuersonan pa ‘defendé i establecé e bon nobo legalmente.’—Filipensenan 1:7; Echonan 9:3-16.

Awe Testigonan di Jehova ta invitá tur hende pa examiná nan actividadnan djacerca, mescos cu Sr. Ivanenko a haci. Nos tin e confiansa cu si hende haci esei, nan lo ripará cu e informenan negativo tocante e Testigonan no ta berdad, mescos cu informenan asina tocante e cristiannan di promé tampoco no tabata berdad. Di un manera sobresaliente, e Testigonan ta obedecé e “mandamentu nobo” cu Jesus a duna su disipelnan: “Boso stima un e otro; mescos cu ami a stima boso.”—Juan 13:34, 35.

[Kuadro na página 23]

Archivo di MN

(E siguiente informacion sacá for dje archivonan di Moscow News a ser imprimí banda dje artículo aki di Sergei Ivanenko.)

“E Testigonan di Jehova ruso ta parti di un organisacion cristian mundial cu ta funcioná den 233 pais i cu tin 5,4 miyon miembro. Testigonan di Jehova ta sigui e guia spiritual dje Cuerpo Gobernante situá na Brooklyn, New York. E organisacion actual di Testigonan di Jehova a sali for di un grupo di studio di Bijbel, formá na 1870 dor di Charles Taze Russell na Pittsburgh, Pennsylvania. Na 1887 e organisacion a bini Rusia. Un dje promé Testigonan di Jehova ruso, Semyon Kozlitsky, a ser mandá den exilio for di Moscow pa Siberia na 1891. E organisacion a sigui existí apesar di persecucion, i na 1956 tabatin 17.000 Testigo di Jehova na Union Soviético. Ta te na mart 1991 Testigonan di Jehova a haña reconocimentu na Rusia, despues cu a pasa e ley ‘Riba Libertad di Religion.’ Awe tin mas cu 500 grupo i rond di 70.000 miembro activo na Rusia. E organisacion ta distribuí ehemplarnan dje ‘Toren di Vigilancia’ (publicá den 125 idioma, circulacion 20 miyon) i ‘Spierta!’ (na 81 idioma, circulacion 18 miyon).”

[Plachi na página 23]

Parti dje compleho di sucursal na Rusia

[Plachi na página 24]

E Salon di Reino caminda e famia di sucursal na Rusia ta reuní pa studio di Bijbel

[Plachi na página 25]

Famianan Testigo ta studia i ta gosa di recreo huntu

[Plachi na página 26]

Nan ta compartí conocimentu di Bijbel cu otronan