Huan Boutista A Eksistí di Bèrdat?

Den Beibel, e relatonan di Evangelio ta papia di un hòmber ku tabata yama Huan Boutista. Huan Boutista tabata prediká na Hudea tokante e Reino di Dios. Tin historiadó ku ta di akuerdo ku loke Beibel ta bisa tokante e hòmber ei? Pensa riba lo siguiente:

• Beibel ta bisa: “Huan Boutista a kuminsá prediká den desierto na Hudea. E tabata bisa e hendenan: ‘Arepentí, pasobra e Reino di shelu ta serka.’” (Mateo 3:1, 2) Tin fuente no-religioso ku por konfirmá e palabranan ei? Sí.

  Flavio Hosefo, un historiadó di promé siglo, a skirbi tokante un hòmber ku yama “Huan, konosí tambe komo Boutista.” Hosefo a bisa ku e hòmber ei tabata animá e hudiunan “pa trata otro na un manera hustu,” pa mustra “rèspèt profundo pa Dios” i pa nan “bini p’e batisá nan.”—Historia Antiguo di e Hudiunan (na ingles), Buki XVIII.

• Beibel ta konta ku Huan a skual Heródes Antipas, kende tabata goberná Galilea i Perea. Heródes a pretendé ku e tabata hudiu i ku e tabata obedesé Lei di Moises. Huan a bisa Heródes ku e no tabatin mag di kasa ku Herodías, esposa di su ruman hòmber. (Marko 6:18) Otro fuente históriko fuera di Beibel tambe ta menshoná e detaye ei.

  Historiadó Hosefo a bisa ku Heródes Antipas a “namorá di Herodías” i ku e “tabatin e tribilidat di pidié pa kasa kuné.” Herodías a aseptá pa kasa kuné. Herodías a bai laga su kasá p’e kasa ku Heródes Antipas.

• Beibel ta bisa ku “hende di Herúsalèm, tur hende di Hudea i hende di henter e área rònt di riu Yordan tabata bini serka [Huan], i e tabata batisá nan den riu Yordan.”—Mateo 3:5, 6.

  Hosefo ta konfirmá e detaye ei tambe. El a skirbi ku “grupo grandi di hende” tabata bai wak Huan i ku e hendenan “tabata bira sumamente eksitá ora nan tende loke e ta papia.”

Pues, ta bisto ku Hosefo, un historiadó di promé siglo, a konsiderá Huan Boutista un persona ku di bèrdat a eksistí. Nos tambe por ta konvensí di esei.