Testigunan di Yehova Ta Kontra Bakunashon?

Nò. Testigunan di Yehova no ta kontra bakunashon. Pa nos e desishon pa bakuná ta un desishon personal ku kada kristian mester tuma. Hopi Testigu di Yehova ta skohe pa bakuná.

Nos ke bon kuido médiko, i nos ta balorá tur avanse sientífiko den e área di medisina ku ta redusí e posibilidat di haña malesa grave. Nos ta gradisidu pa e trabou duru di e profeshonalnan den sektor médiko, spesialmente den tempu di krísis.

Testigunan di Yehova ta kooperá ku e funshonarionan di salubridat públiko. Por ehèmpel, for di ora ku e pandemia di COVID-19 a kuminsá, Testigunan di Yehova a sigui publiká rekordatorio den sientos di idioma riba e website akí. E rekordatorionan ei ta animá hende pa obedesé e medidanan di siguridat lokal ku ta inkluí e importansia di mantené distansia físiko, sigui regla tokante aglomerashon, karentena, laba man, usa tapa boka òf kualke otro medida ku gobièrnu a rekomendá òf implementá.—Romanonan 13:1, 2.

Pa vários dékada, e publikashonnan di Testigunan di Yehova a enfatisá e siguiente prinsipionan:

• Tratamentu médiko ta un desishon personal.—Galationan 6:5.

  “[E revista akí] no ta bisa ku un tipo di remedi òf terapia ta mihó ku otro, i e no ta ofresé konseho médiko. Su meta ta simplemente pa presentá e echonan i laga kada lektor tuma su mes desishon.”—¡Despertad! di 8 di febrüari 1987.

  “E desishon pa abo i bo yunan bakuná ta un desishon personal.”—¡Despertad! di 8 di desèmber 1965.

• Nos ta buska tratamentu médiko pasobra nos ta balorá bida.—Echonan 17:28.

  “Testigunan di Yehova ta bai serka profeshonal médiko pa asina nan por haña yudansa pa nan problemanan di salú. Nan ta stima bida, i nan ke hasi tur loke ta rasonabel i di akuerdo ku Beibel pa prolongá nan bida.”—La Atalaya di 1 di mei 1976.

  “Testigunan di Yehova no tin ningun problema pa aseptá tratamentu médiko. Nan ke tin bon salú, i nan ke biba largu. De echo, meskos ku Lukas, un kristian di promé siglo, algun Testigu di Yehova tambe ta dòkter. . . . Testigunan di Yehova ta masha gradisidu pa e trabou duru di hende ku ta duna kuido médiko. Nan ta gradisidu tambe ora hende den kuido médiko ta yuda nan sinti mihó.”—La Atalaya di 1 di febrüari 2011.