Pregunta di Lektor

Na ki momento nos lo stòp di prediká?

Hesus a bisa: “E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.” (Mat. 24:14) E palabra griego ku a usa pa e palabra “fin” na e versíkulo akí i na versíkulo 6 i 13 ta teʹlos, kual ta referí na e fin di Satanas su mundu na Armagedon. (Rev. 16:​14, 16) Pues, nos lo sigui prediká durante tribulashon grandi te nèt promé ku Armagedon kuminsá. Esaki ta un kambio den nos komprondementu.

Nos tabata pensa ku nos lo stòp di prediká e bon notisia ora Babilonia e Grandi ser destruí i tribulashon grandi kuminsá. (Rev. 17:​3, 5, 15, 16) Nos tabata kere ku manera tribulashon grandi kuminsá, Yehova lo no duna niun hende mas e chèns pa aseptá e bon notisia. (Isa. 61:2) Nos a pensa tambe ku e úniko hendenan ku lo sobrebibí e tribulashon grandi ta esnan ku ta sirbiendo Yehova fielmente promé ku e tribulashon grandi kuminsá. Nos a kompará nan ku e hudiunan ku a sobrebibí destrukshon di Herúsalèm na 607 P.K. Promé ku e destrukshon di Herúsalèm, e hudiunan ei a ser marká pa sobrebibí pasobra nan tabata adorá Yehova i odia maldat. (Eze. 5:11; 9:4) Pero e komparashon ei no ta kuadra ku loke Hesus a bisa na Mateo 24:​14, ku ta indiká ku kisas hende tin e oportunidat di aseptá e bon notisia ainda asta nèt promé ku e fin di Satanas su mundu na Armagedon.

E komprondementu nobo akí di Mateo 24:14 ta kambia tambe nos komprondementu di Revelashon 16:​21, ku ta papia tokante un tormenta di hagel. Analisando e dos tekstonan akí mas djaserka, nos a mira ku nan tin konekshon ku otro. Kon asina? Nos por mira esei pasobra tur dos ta mustra kon hende ta reakshoná na e mensahe di Reino. Pablo a splika ku pa “esnan riba kaminda pa haña salbashon” e mensahe lo ta bon notisia, “un holó dushi di bida.” Pero pa Dios su enemigunan e mensahe ei lo ta mal notisia, “un holó di morto.” (2 Kor. 2:​15, 16) Nan ta odia e mensahe pasobra e ta saka na kla ku nan mundu malbado ta goberná pa Satanas i a punto di ser destruí.—Huan 7:7; 1 Huan 2:17; 5:19.

Ripará tambe ku e tormenta di hagel ku Revelashon 16:21 ta papia di dje lo ta “masha destruktivo.” Esaki ke men ku durante tribulashon grandi kisas e trabou di prediká lo bira mas direkto i lo pone ku e mensahe di Reino lo yega na mas tantu hende. Debí na esei, mas tantu hende lo konosé Yehova. (Eze. 39:7) E chèns t’ei ku despues ku Babilonia e Grandi ser destruí, algun hende lo haña ku nos mensahe ta manera un holó dushi i lo sinti nan atraí na dje. Kisas nan ta kòrda òf ta haña sa ku pa años Testigunan di Yehova a bisa ku tur religion falsu lo wòrdu destruí. Anto nan lo realisá ku ta esei nan a mira ku nan mes wowo.

Algu paresido a pasa na Egipto despues di e dies plaganan. Despues ku Yehova a “husga i kastigá tur e diosnan di Egipto,” “un multitut grandi di tur sorto di hende” a uni ku e pueblo di Yehova. (Éks. 12:​12, 37, 38) Kisas e hendenan ei ku no tabata israelita a skohe pa uni ku e pueblo di Yehova ora nan a mira e dies plaganan ku Moises a papia di dje kumpli.

Kualke hende ku skohe pa Yehova despues di e destrukshon di Babilonia e Grandi lo tin e oportunidat di apoyá Kristu su rumannan ku t’ei ainda riba tera i lo ser husgá komo karné. (Mat. 25:​34-36, 40) Pero, na momento ku restu di e ungínan bai shelu, ku lo ta djis promé ku Armagedon, lo no tin oportunidat mas pa ser husgá komo karné.

E komprondementu nobo akí ta resaltá Yehova su gran amor i miserikòrdia. Sí, “e no ta deseá pa ningun hende ser destruí, ma e ta deseá pa tur haña chèns di arepentí.”—2 Ped. 3:9.