Bo Tabata Sa?
Dikon den Rei David su ehérsito tabatin hende ku no tabata israelita?
TA BÈRDAT ku den David su ehérsito tabatin guerero estranhero. Por ehèmpel, Zélek tabata amonita, Urías tabata desendiente di Hèt i Itma tabata di Móab.a (1 Kró. 11:39, 41, 46) Ademas, tabatin “e keretitanan,” “e peletitanan” i tambe “e hendenan di Gat.” (2 Sám. 15:18) E hendenan di Gat tabata filisteo, anto parse ku e keretitanan i e peletitanan tambe tabata famia yegá di e filisteonan.—Hos. 13:2, 3; 1 Sám. 6:17, 18; Eze. 25:16.
Dikon David a permití estranhero forma parti di su ehérsito? Pasobra e tabatin sigur ku nan lo ta leal na dje i, mas importante ainda, na Yehova. Por ehèmpel, wak loke The New Interpreter’s Dictionary of the Bible ta bisa tokante e keretitanan i e peletitanan: “Durante e momentonan mas difísil di David su reinado, nan a keda leal na dje.” Kon nan a mustra nan lealtat? Wèl, ora ku “tur e hòmbernan di Israel a bandoná David pa sigui Seba,” un hòmber masha problemátiko, e keretitanan i e peletitanan sí a keda ku David i a yud’é stòp e rebelion di Seba. (2 Sám. 20:1, 2, 7) Na un otro okashon, Adonías, un di Rei su yunan, a purba di poderá di e trono. Sinembargo, Yehova a skohe Sálomon pa ta e siguiente rei i p’esei e keretitanan i e peletitanan lealmente a yuda David pa hasi Sálomon rei.—1 Rei. 1:24-27, 38, 39.
Itai di Gat tabata un otro estranhero ku a keda leal na David. Ora ku David su yu Ábsalòn a purba di laga e hendenan di Israel hasié rei na lugá di David, Itai i su 600 guereronan a keda leal na David. Komo ku Itai tabata un estranhero, David a sali bis’é ku e no tin nodi di bringa p’e. Pero Itai a bis’é: “Mi ta hura den nòmber di Yehova, e Dios bibu, i pa bida di mi señor Rei ku unda ku mi señor Rei bai, einan lo mi ta, sea ku esei ta nifiká bida òf morto pa Rei su sirbidó.”—2 Sám. 15:6, 18-21.
Itai tabata leal na David, esun ku Yehova a skohe komo rei
Aunke ku e keretitanan, e peletitanan i e hendenan di Gat tabata estranhero, nan a rekonosé ku Yehova ta e úniko Dios berdadero i ku ta David ta esun ku Yehova a skohe. David lo mester tabata hopi kontentu di tin hendenan leal asina na su banda.
a Na Deuteronomio 23:3-6, Dios su lei a bisa ku niun amonita ni moabita no tabatin mag di forma parti di e kongregashon di Israel. Ta parse ku esaki tabata ke men ku komo nashon nan no por a forma parti di Israel i disfrutá di tur derecho di un israelita. Pero, individualmente un moabita òf un amonita por a anda ku i biba entre e israelitanan si el a aseptá adorashon puru. Wak Perspicacia para comprender las Escrituras, Tomo 1, pág. 117.