Kon pa Mehorá Nos Sirbishi: Yuda Studiantenan di Beibel Desaroyá Bon Kustumber di Studia

Dikon Esaki Ta Importante: Pa studiantenan di Beibel por progresá i alkansá madures den sentido spiritual, nan tin ku bai mas aleu ku djis alimentá nan mente i kurason ku e siñansanan básiko di Beibel. (Heb. 5:12–6:1) Studia ta enserá, entre otro, konektá informashon nobo ku loke nos sa kaba i pensa kon pa pon’é na práktika. Esei ta eksigí esfuerso. (Pro. 2:1-6) Ademas, studiantenan tin ku siña kon nan mes por buska kontesta pa preguntanan basá riba Beibel den nos publikashonnan. E esfuerso ku nan ta hasi pa praktiká loke nan ta siña lo prepará nan pa enfrentá prueba den futuro.—Luk. 6:47, 48.

Kon pa Hasié:

Enfatisá kon importante ta pa pidi Yehova su guia kada bes ku nos ta bai studia.—Huan 14:26; 1 Kor. 2:10.
Animá bo studiante for di kuminsamentu pa prepará di antemano pa su estudio di Beibel. Mustr’é den bo buki òf foyeto kon abo a marka solamente e palabra- òf frasenan klave i siñ’é pa hasi meskos.
Pidi e studiante pa kontestá e preguntanan ku su mes palabranan. Pa e estudio no bira laf, no djis hasi pregunta i lag’é lesa e kontesta den su buki.
Animá e studiante pa lesa Beibel tur dia. Mustr’é e programa di lesamentu di Beibel ku tin riba jw.org i dun’é un idea kon e por hasi esaki na un manera práktiko. Pa desaroyá e bon kustumber di lesa Beibel tur dia, mester hasi hopi esfuerso, pero e esfuerso ei ta bale la pena.—Sal. 1:2, 3.
Mustr’é kon pa usa Watchtower Library riba CD-ROM òf BIBLIOTEKA ONLINE Watchtower pa buska kontesta pa preguntanan basá riba Beibel. Yud’é rekonosé abreviashon di e publikashonnan ku mas nos ta usa na reunion.

Purba di Hasi Esaki Durante e Luna Akí:

Na final di un suptítulo òf kapítulo, pidi bo studiante p’e splika bo ku poko palabra loke el a kaba di siña. Si bo no tin un studiante, praktiká kon pa splika ku poko palabra loke bo ta lesa den Beibel òf un paragraf di E Toren di Vigilansia. Esei lo yuda bo komprondé loke bo ta lesa.