Nos Tin Shen Aña Ta Anunsiá e Reino!
1. Ki animashon e pueblo di Yehova a haña kasi shen aña pasá?
1 Kasi shen aña pasá Ruman Rutherford a deklará na e pueblo di Yehova: “Tende! E Rei ta reina! Boso ta su agentenan di publisidat. P’esei, anunsiá, anunsiá, anunsiá e Rei i su reino.” E palabranan ei a animá nan pa anunsiá e mensahe di e Reino rònt mundu. I esaki ta loke nos a hasi! Meskos ku e promé kristiannan, nos ta prediká e bon notisia di e Reino “na henter e kreashon bou di shelu.” (Kol. 1:23) Kon nos a hasi esei durante e siglo pasá? Kon nos por sigui anunsiá e Reino awor ku e ta serka di hasi 100 aña?
2. Kon nos literatura ta anunsiá e Reino di Dios?
2 Reflekshonando Riba Pasado: Pa dékadanan, nos literatura a anunsiá e Reino di Dios. For di 1939 nos revista prinsipal tin e título: E Toren di Vigilansia Anunsiando e Reino di Yehova Dios. Regularmente e revista akí tin artíkulonan ku ta papia tokante e Reino i kiko lo e logra. ¡Despertad! tambe ta enfatisá ku e Reino di Dios ta e úniko speransa pa humanidat. No ta nada straño anto ku e dos revistanan akí ta esnan mas tradusí i distribuí rònt mundu.—Rev. 14:6.
3. Ki métodonan nos a usa pa anunsiá e Reino, i kon nos ta hasié awor?
3 E pueblo di Yehova ta usando diferente método pa anunsiá e Reino. Ántes nos tabata usa outo ku ekipo di zonido, programanan na radio i tokadisko portátil. E métodonan ei a yuda nos alkansá hopi hende ku e bon notisia, aunke no tabatin hopi predikadó di Reino. (Sal. 19:4) Pa un par di aña kaba nos ta usando jw.org pa anunsiá e Reino na miónes di hende, asta na esnan ku ta biba na paisnan kaminda nos trabou ta restringí.
4. Ki maneranan spesial pa prediká e pueblo di Yehova a bini kuné?
4 E pueblo di Yehova a bini tambe ku maneranan spesial pa anunsiá e mensahe di Reino. Pa duna mas empuhe na nos trabou di prediká, desde 1996 nos a bin ta hasi esfuerso pa prediká den negoshi, parke públiko i na lugá di parker. Poko tempu ei, nos a kuminsá ku un manera spesial pa prediká den área públiko den statnan grandi rònt mundu. Fuera di esei, hopi kongregashon ta usa mesa i stènt di literatura pa prediká na lugánan públiko den nan mes teritorio. Klaru ku e trabou di kas pa kas ta keda nos método prinsipal di prediká e Reino.—Echo. 20:20.
5. Ki oportunidatnan hopi di nos lo tin den e aña di sirbishi nobo?
5 Pensando Riba Futuro: Na komienso di e aña di sirbishi nobo na sèptèmber hopi ruman lo kuminsá traha pionero regular. Abo lo ta un di nan? Òf lo bo por traha pionero ousiliar de bes en kuando? Sea ku bo por traha pionero òf nò, Yehova sigur lo bendishoná bo pa kualke sakrifisio ku bo ta hasi pa partisipá plenamente den e obra di anunsiá e Reino.—Mal. 3:10.
6. Dikon òktober 2014 lo ta un luna spesial?
6 Na òktober 2014 ta kumpli nèt 100 aña ku e Reino a keda establesí. P’esei den e luna ei, e edishon pa públiko di E Toren di Vigilansia lo pone èkstra atenshon na e Reino di Dios. Laga nos hasi tur nos esfuerso pa mas tantu hende posibel haña un ehemplar di e edishon akí den nan man. Ku mira riba esei, laga kada un di nos sigui “deklará e bon notisia tokante e Reino di Dios” na tur hende ku ke skucha.—Echo. 8:12.