Un Vidio Nobo pa Kuminsá Estudio di Beibel

Riba jw.org tin un vidio titulá Dikon Analisá Loke Beibel Ta Bisa? ku ta alkansando un gran kantidat di hende. Su meta ta pa animá hende interesá aseptá un kurso di Beibel grátis. Pa haña akseso na e vidio akí, bai na final di e página inisial i skohe “Pidi un Kurso di Beibel” òf skèn e kódigo QR (quick response) ku tin parti patras di nos tratadonan nobo. Laga nos wak algun manera ku nos por usa e vidio akí.

• Ora di hasi rebishita, bo por puntra e persona: “Mi por mustra bo un vidio kòrtiku ku ta splika kon Beibel por kontestá e preguntanan ku bo tin tokante bida?” Si e bai di akuerdo, mustr’é e vidio riba bo aparato móbil òf riba su kòmpiuter.

• Si nos laga un di e tratadonan nobo ora nos ta prediká informalmente òf na lugánan públiko, probechá mustra e persona e kódigo QR i anim’é pa skèn esaki ku su aparato móbil. Den hopi idioma e kódigo QR ta hiba bo dirèkt na e vidio riba nos website di manera ku bo por wak e vidio kaminda bo ta riba bo aparato móbil.

• Konta bo koleganan di trabou, kompañeronan di skol, famia- i konosínan tokante e vidio. I bisa nan ku bo tin gana di mustra nan e vidio. Òf manda e link di e vidio pa nan i animá nan pa wak é.

Nos lo por kuminsá mas estudio di Beibel si nos usa e provishon nobo akí. Di e forma ei, nos por yuda tur hende ku ta “dispuesto pa aseptá e bèrdat ku ta hiba na bida eterno” buska e kaminda di Dios.—Echo. 13:48.