Dos Manera Nobo pa Prediká den Área Públiko
1. Ki ehèmpel e kristiannan di promé siglo a pone pa nos?
1 E kristiannan di promé siglo no a prediká solamente di kas pa kas. Nan a prediká na lugánan públiko tambe. (Echo. 20:20) Por ehèmpel, nan a bai na e tèmpel kaminda nan tabata sa ku nan lo a haña hopi hende. (Echo. 5:42) Ora apòstel Pablo tabata na Aténas, el a prediká tur dia na e hendenan riba plasa. (Echo. 17:17) Awendia, sirbishi di kas pa kas ta keda e manera prinsipal ku nos ta plama e bon notisia. Sinembargo, nos ta prediká tambe na lugá di parker, den negoshi, parke, kaya drùk i na kualke otro lugá kaminda ku nos por haña hende pa papia kuné. Aunke tur publikadó ta haña animashon pa prediká na lugánan públiko kaminda ta posibel, hopi di nos lo tin e oportunidat di usa dos manera nobo i emoshonante pa prediká den área públiko.
2. For di novèmber 2011, nos rumannan a kuminsá purba ku kua manera nobo pa prediká den área públiko?
2 Un Manera Spesial pa Prediká den Área Públiko den Statnan Grandi: Manera e Anuario 2013 na spañó ta bisa na página 16 i 17, for di novèmber 2011, nos rumannan a purba ku un manera nobo pa prediká den e áreanan públiko di New York. Nan a pone algun mesa i stènt ku bunita posternan i literatura den diferente idioma na lugánan stratégiko di e stat kaminda tin hopi hende ta trafiká na pia. Tur dia, míles di hende ta pasa na e lugánan ei, inkluso esnan ku ta biba den edifisionan bon protehá i esnan ku hopi biaha ta difísil pa haña na kas. E resultado tabata impreshonante. Den un luna, e rumannan a distribuí 3.797 revista i 7.986 buki. Hopi di esnan ku a pasa na e mesanan a pidi pa un estudio di Beibel. E meta prinsipal tabata pa kuminsá estudio di Beibel. P’esei, asina ku e rumannan a haña un adrès, nan tabata pas’é mesora pa e kongregashonnan korespondiente pa nan por rebishitá e persona interesá.
3. Kon lo bai ekspandé e manera nobo akí di prediká den áreanan públiko?
3 En bista di e bon resultado ku e manera nobo akí tabatin, a disidí pa kuminsá kuné na otro statnan grandi, rònt mundu. Kada sukursal ta disidí den kua stat na e paisnan ku ta kai bou di nan lo por usa e manera nobo akí di prediká. Por lo general, lo skohe statnan ku tin stashon grandi di transporte públiko, hopi ofisina òf apartamento kaminda tur dia míles di hende ta trafiká na pia. E sukursalnan lo tuma kontakto ku e kongregashonnan ku lo partisipá den e manera nobo akí di prediká i lo duna nan mas instrukshon. Por lo general, lo usa pionero spesial i regular pa e trabou akí, aunke den algun lugá pioneronan ousiliar tambe lo por partisipá.
4. Kon e rumannan ta prediká na e manera spesial akí den statnan grandi?
4 Kon pa Prediká na e Manera Akí: Por lo general, e pioneronan ku ta prediká na e manera spesial akí den statnan grandi ta warda te ora un hende bini na e mesa òf stènt di literatura. Ora e persona yega serka, e pionero ta anim’é pa skohe kualke publikashon ku e ta haña interesante. Ademas, e pionero ta kla pa usa Beibel pa kontestá kualke pregunta ku e persona por tin. Si e persona skohe algun literatura, e pionero no ta menshoná e areglo di donashon. Pero si e persona mes puntra kon nos obra ta ser finansiá, e ora ei e pionero ta splik’é ku e por manda su donashon na e adrès ku tin den e literatura. Si ta posibel, e pionero por puntr’é: “Bo ta deseá pa un persona bishitá bo na kas?” Òf, “Bo tabata sa ku ademas di nos publikashonnan, nos ta ofresé estudio di Beibel grátis tambe?”
5. Kon e manera di prediká akí a duna un pareha goso i satisfakshon?
5 E manera nobo akí ta duna goso i satisfakshon. Un pareha kasá a skirbi: “Tur dia ora nos ta pará na e mesa i ta mira míles di hende kana pasa, nos ta realisá kuantu esfuerso ta ser hasí pa alkansá hende rònt mundu. Sí, e echo ku nos ta mira asina tantu hende i ta komprondé kuantu interes Yehova tin den kada un di nan ta fortalesé nos determinashon pa mantené e trabou di prediká na promé lugá den nos bida. Nos ta imaginá nos mes ku Yehova ta analisá kurason di e personanan ku ta kana pasa e mesa pa wak ken ta esnan digno. Nunka promé nos a sinti ku nos ta traha asina estrecho ku e angelnan.”
6. (a) Kua manera nobo pa prediká den área públiko hopi kongregashon ta organisando, i dikon esaki no ta meskos ku e manera spesial pa prediká den áreanan públiko den statnan grandi? (b) Kon kongregashonnan por kooperá ku otro ora di prediká den área públiko?
6 E Trabou di Prediká den Área Públiko Ku Kada Kongregashon Por Organisá: Fuera di e manera spesial pa prediká den área públiko den statnan grandi, tin un manera nobo mas di prediká na lugánan públiko ku hopi kuerpo di ansiano ta organisá pa nan teritorio. E manera nobo akí ta enserá ku publikadónan ta usa mesa òf stènt portátil pa pone literatura na lugánan den teritorio di nan kongregashon kaminda tin hopi hende ta pasa. Esaki no ta meskos ku e manera spesial pa prediká den áreanan públiko den statnan grandi kaminda rumannan di diferente kongregashon ta prediká den e mesun áreanan drùk di e statnan ku sukursal skohe. (Wak e kuadro “Bon Kooperashon Ta Nesesario.”)
7. Si e ansianonan determiná ku ta práktiko pa prediká di e manera akí na lugánan públiko den nan teritorio, kon nan lo por organisá esei?
7 E ansianonan lo analisá i determiná si den nan teritorio tin lugánan kaminda hopi hende ta trafiká na pia i si ta práktiko pa prediká na e lugánan ei. Por ehèmpel, rumannan lo por pone mesa òf stèntnan portátil di literatura na lugánan, manera stashon di bùs, parke, kaya ku ta drùk, sentro komersial, kèmpus, aeropuerto òf lugánan kaminda ta tene aktividatnan anual. Lo ta bon pa pone e mesa semper na e mesun lugá, e mesun dianan i ora. Eksperensia ta mustra ku ta mihó pa pone un mesa na un sentro komersial ku kaminda tin un negoshi grandi so ya ku e hendenan ku ta bishitá e negoshi ei normalmente ta konsentrá solamente riba loke nan a bin hasi na e negoshi. Riba asera kaminda hopi hende ta pasa kisas ta mihó pa usa un stènt chikitu di literatura. Ansianonan lo por download for di nos website algun fail spesial ku ta kontené algun idea kon pa traha e stèntnan pa pone e revistanan E Toren di Vigilansia i ¡Despertad! i e buki Beibel Ta Siña. E failnan akí ta ser usá spesialmente pa e manera akí di prediká. E publikadónan ku ta partisipá den e forma di predikashon akí tin ku sigui e mesun método di e manera spesial pa prediká den área públiko den statnan grandi. Ademas, nan tin ku sigui e instrukshonnan ku nan ta risibí di e superintendente di sirbishi. Si nan topa un persona ku mustra interes pero ku no ta biba den nan teritorio, mesora nan mester yena e formulario Por Fabor Atendé (S-43) i entreg’é n’e sekretario.
8. Asta si den bo kongregashon no tin areglo spesífiko pa prediká na lugánan públiko, kon bo por partisipá tòg den e forma di sirbishi akí?
8 Abo Tambe Por Prediká na Lugánan Públiko: Tin kongregashon ku no tin ningun lugá den nan teritorio kaminda hopi hende ta trafiká na pia i p’esei nan lo no usa mesa òf stènt di literatura pa prediká. Sinembargo, asta den e kongregashonnan ei ta bon pa animá publikadónan pa prediká na lugánan públiko. Por ehèmpel, tin área di negoshi, sentro komersial chikitu, pakus òf tienda ku sa ta drùk den boso teritorio? Tin parke òf plasa kaminda hende sa reuní? Sa tin aktividatnan públiko den boso teritorio? Si ta asina, abo tambe por prediká den e áreanan ei.
9. Dikon nos mester hasi esfuerso pa prediká na hende na unda ku nan ta?
9 Ta Yehova su boluntat pa “tur sorto di hende ser salbá i yega na un konosementu eksakto di e bèrdat.” (1 Tim. 2:4) Ta p’esei nos tin ku hasi nos máksimo esfuerso pa hiba e mensahe di Reino na mas tantu hende posibel promé ku e fin yega. (Mat. 24:14) Den hopi teritorio ta difísil pa haña hende na kas. Kisas ta na lugánan públiko so nos por haña un chèns di papia ku nan. Esei lo por ta e úniko oportunidat pa algun di nan skucha e bon notisia. P’esei, laga nos prediká na hende na unda ku nan ta i asina kumpli ku nos sirbishi kabalmente.—2 Tim. 4:5.
[Kuadro na página 5]
Bon Kooperashon Ta Nesesario
Informenan ta indiká ku tin publikadónan di diferente kongregashon ta prediká na e mesun lugánan di parker, parada di bùs, den e mesun kayanan i dilanti di e mesun negoshinan. Ademas, publikadónan di diferente kongregashon ta laga revista den e mesun lòbinan, salanan di espera òf labanderianan i ta prediká den e mesun negoshinan. Aunke e publikadónan no ta prediká na e mesun ora, esaki por fada e komersiantenan i e hendenan den e barionan ei. P’esei, ora di prediká den área públiko, ta mihó pa kada kongregashon hasi esei den nan mes teritorio.
Si tin publikadó ku ke prediká den un área públiko den teritorio di un otro kongregashon, nan mester papia ku nan superintendente di sirbishi. E superintendente di sirbishi, na su turno, lo por tuma kontakto ku e superintendente di sirbishi di e otro kongregashon pa haña pèrmit. Kaminda tin kongregashon di diferente idioma ta prediká den e mesun teritorio, e superintendentenan di sirbishi mester komuniká ku otro pa evitá situashonnan ku por pone e hendenan den e teritorio rabia ku nos innesesariamente. Si tin bon kooperashon, tur kos lo por tuma lugá “desentemente i na un manera ordená.”—1 Kor. 14:40.