Kaha Di Pregunta

◼ Ki prinsipionan di Beibel ta aplikabel pa loke ta uso di telefòn selular durante reunion kristian i den sirbishi?

“Tin un Tempu Stipulá pa Tur Kos.” (Ekl. 3:1): Telefòn selular ta hasi posibel pa hende papia ku otro òf manda mensahe na kasi tur momento. Sinembargo, tin okashonnan ku kristiannan no ke pa nan telefòn distraé nan. Por ehèmpel, na nos reunionnan nos ta adorá Yehova, risibí instrukshon spiritual i disfrutá di un interkambio di estímulo. (Deu. 31:12; Sal. 22:22; Rom. 1:11, 12) Pues, tin posibilidat ku nos por paga nos telefòn ora nos yega Salòn i chèk nos mensahenan despues ku nos sali for di reunion? Si nos tin ku laga nos telefòn sendí pa un kaso di emergensia, nos mester hasi sigur ku e no ta stroba otro hende.

“Hasi Tur Kos pa Kousa di e Bon Notisia.” (1 Kor. 9:23): Tin biaha tin motibunan bálido pa usa telefòn selular den sirbishi. Por ehèmpel, e ruman ku ta dirigí e grupo por us’é pa yama wak kon ta bai ku e publikadónan ku ta predikando na otro parti di e teritorio. Tin publikadó ku ta usa nan telefòn pa yama un rebishita òf un studiante promé ku nan bai serka dje, spesialmente si e ta biba un poko leu. Si nos tin un telefòn huntu ku nos, nos tin ku sòru pa e no stroba nos ora nos ta kòmbersá ku e doño di kas. (2 Kor. 6:3) Ora nos tin ku warda riba otro publikadó, en bes di yama òf manda mensahe pa un amigu, no ta mihó pa nos konsentrá riba nos sirbishi i keda pendiente di esnan ku ta traha huntu ku nos?

Tene Konsiderashon ku Otronan. (1 Kor. 10:24; Flp. 2:4): Nos no ke neglishá e importansia di yega na tempu pa e reunion di sirbishi di vèlt pensando ku tòg nos por yama òf manda un mensahe pa un ruman pa haña sa na unda e grupo ta predikando. Si nos yega lat pa e reunion, hopi biaha mester reorganisá e grupo. Klaru, por tin sirkunstansianan fuera di nos kontrol ku por pone nos kai lat. Pero, si nos tin kustumber di yega na tempu, nos ta mustra konsiderashon pa Yehova su areglo, e ruman ku ta dirigí e grupo i otro publikadónan.