Mustra Koutela den Sirbishi
1. Dikon nos mester ta kouteloso den sirbishi?
1 “Manera karné meimei di lobo,” asina Dios su sirbidónan ta prediká “meimei di un generashon trosí i pèrvèrso.” (Mat. 10:16; Flp. 2:15) Tur dia nos ta tende informenan alarmante di manifestashon sivil, multitut violento i sekuestronan kruel ku ta proba ku hende malbado ta bayendo “di malu pa pió.” (2 Tim. 3:13) P’esei, ki prinsipio bíbliko por yuda nos mira e importansia pa ta “kouteloso” den sirbishi?—Mat. 10:16.
2. Ki sirkunstansianan por pone ku nos tin ku sali for di un teritorio i bai traha un otro kaminda?
2 Sea Prudente: Proverbionan 22:3 ta enfatisá ku ta sabí pa “skonde” pa kalamidat. P’esei nos mester ta alerta. Un bario ku normalmente ta trankil por kambia diripiente. Kisas miéntras nos ta prediká, nos ta nota diripiente kantidat di outo di polis òf hende aglomerá riba kaya. Òf kisas un doño di kas bondadoso ta spièrta nos di un situashon tenso ku ta reina. En bes di keda bira bira pa hasi ko’i kaweta, lo ta mas sabí pa sali mesora for di e teritorio i bai traha den un otro teritorio.—Huan 8:59; 1 Tes. 4:11.
3. Kon nos por apliká e prinsipio na Eklesiástes 4:9 pa ku nos sirbishi?
3 Evitá di Traha Bo So: Eklesiástes 4:9 ta bisa: “Dos ta mihó ku un.” Kisas bo a kustumbrá di traha trankil bo so den teritorio, pero lo ta sabí pa hasi esei ainda? Kisas den algun área ta safe pa traha bo so pero den otro área kisas no ta asina sabí pa un ruman muhé òf un hóben traha di kas pa kas su so; spesialmente ora bira sukuritu. Eksperensia a mustra ku un kompañero atento ta indispensabel. (Ekl. 4:10, 12) Keda pendiente di kada publikadó ku tin den boso grupo. Avisá un hende dje grupo ora bo ta bai sali for di teritorio i hasié un kustumber.
4. Kon nos por kontribuí na e siguridat di tur nos rumannan?
4 Ansianonan ta ‘vigilá nos alma’ i ta responsabel pa perkurá guia ku ta kuadra ku situashon di kada teritorio. (Heb. 13:17) Si nos ta humilde i ta kooperá plenamente ku nan, nos por ta sigur ku Yehova lo bendishoná nos esfuersonan. (Mik. 6:8; 1 Kor. 10:12) Pues laga tur sirbidó di Dios sigui duna un bon testimonio den e teritorionan, pero semper ku koutela.