Un Dia Spesial pa Ofresé Estudio di Beibel
1 Entrante yanüari, kada kongregashon lo skohe un fin di siman pa luna, kisas e promé siman, pa ofresé estudio di Beibel. Por programá sea djasabra òf djadumingu pa esaki; ta dependé kiko ta mas mihó. Si e doño di kas no aseptá un estudio di Beibel riba e dia ei, tòg e publikadó por ofresé e buki Beibel Ta Siña òf e revistanan nobo. Tur ansiano i sirbidó ministerial tin ku hasi nan máksimo esfuerso pa partisipá den e aktividat akí i yuda publikadónan kuminsá estudio di Beibel.
2 E Komité di Sirbishi di Kongregashon lo determiná riba kua fin di siman lo pone e dia pa ofresé estudio di Beibel. Tempu-tempu mester rekordá e publikadónan tokante esaki pa asina nan por prepará i hasi èkstra esfuerso pa ofresé estudio di Beibel di kas pa kas i ora nan ta rebishitá hende ku a mustra interes.
3 Kon pa Prepará: Nos por haña sugerensia kon pa kuminsá estudio di Beibel den e suplemento di Nos Ministerio di Reino di yanüari 2006 i na página 11 di e buki Rasonamentu na spañó (òf e foyeto chikí Con pa Cuminsá i Continuá Consideracionnan Bíblico, página 6). Algun publikadó kisas lo ke usa un tratado, por ehèmpel Bo Ke Haña Sa e Bèrdat? Ademas, na página 3 di Nos Ministerio di Reino di ougùstùs 2007 tin sugerensia kon pa kuminsá estudio di Beibel ku hende ku a aseptá revista. Ansianonan i sirbidónan ministerial lo haña asignashon pa kondusí un reunion breve pa sirbishi di vèlt di 10 pa 15 minüt. E por konsiderá ún òf dos sugerensia práktiko pa kuminsá estudio di Beibel òf tene demostrashon di esaki.
4 Ta klaru ku no ta tur hende lo aseptá un estudio di Beibel òf sigui ku e estudio pa hopi tempu. Pero nos no mester laga esei stroba nos di ofresé estudio, pasobra ta Yehova ta atraé hende semehante di karné na su organisashon. (Juan 6:44) Nos responsabilidat no ta solamente pa sembra simia di e bèrdat sino tambe pa kultivá i muha esnan ku a haña rais, i esei ta inkluí studia Beibel ku hende ku ke siña tokante Yehova. Ora nos ta hasi esei, nos ta disfrutá di e privilegio di ta kolaboradónan di Dios.—1 Kor. 3:9.