Repaso di Skol di Ministerio Teokrátiko
Lo konsiderá e siguiente preguntanan na e Skol di Ministerio Teokrátiko durante e siman di 25 di ougùstùs 2008. E superintendente di skol lo kondusí un repaso di 30 minüt basá riba e informashon ku a ser tratá den asignashonnan di e simannan di 7 di yüli te ku 25 di ougùstùs 2008.
KUALIDAT DI PAPIA
1. Kon nos por demostrá ku nos ta rasonabel ora nos ta kompartí e bèrdat ku otro hende? (Fil. 4:5) [7 di yüli, be-PA pág. 251 §3] Nos mester tene kuenta ku e background, sirkunstansia i sintimentu di esnan ku nos ta papia kuné i ta dispuesto na sede ora e situashon ta hustifiká esei. Si nos ta trata nos próhimo asina, esei por yuda nan bira mas reseptivo ora nos ta rasoná ku nan for di e Skritura.
2. Kon Pablo su ehèmpel ora el a papia ku e griegonan na Areópago ta yuda nos ora di prediká na hende ku no ta rekonosé Beibel komo un outoridat? (Echo. 17:22, 23) [14 di yüli, be-PA pág. 252 §1-2] Ora Pablo a prediká na e griegonan na Areópago, e no a kuminsá ku un sita for di e Skritura. Mas bien, el a kuminsá ku kosnan ku nan tabata sa i a aseptá, i el a usa esakinan pa pone nan reflekshoná riba e Kreador i Su propósitonan. Ya ku mayoria di hende ta anhelá mihó kondishonnan, nos por mustra interes den loke ta preokupá nan i kaba mustra nan e solushon ku Beibel ta duna.
3. Maske nos ta konvensí ku e persona ku nos ta papiando kuné ta robes, kon nos por demostrá ku nos ta rasonabel den e manera ku nos ta trat’é? [21 di yüli, be-PA pág. 253 §1-2] Tin biaha, ta mihó pa djis gradisí e persona pa e echo ku el a ekspresá su opinion i konsentrá riba e aspektonan ku lo logra mihó resultado. Nos mester kòrda ku nos tarea ta pa duna “un testimonio,” no pa obligá otro hende pa kere loke nos ta kere. (Mat. 24:14) Ta nan mes mester skohe loke nan ke kere, i nos no ta nenga nan e derecho ei.
4. Segun ku nos ta purba konvensé hende, kiko nos mester tene na mente? [4 di oug., be-PA pág. 255 §3, kuadro] Hende lo no kere ni aktua riba loke nos ta bisa a ménos ku nan ta konvensí ku esei ta bèrdat. Nos argumentonan ta sólido ora nan ta basá riba e Palabra di e Kreador di shelu i tera. E publikashonnan di e esklabo fiel i prudente ta di gran yudansa pa nos ora nos tin ku duna prueba bíbliko di nos kreensianan.
5. Kon nos por usa disernimentu ora nos ta hasi esfuerso pa yega na kurason di un oyente? (Pro. 20:5) [25 di oug., be-PA pág. 258 §1-5] Un persona ku disernimentu ta interesá pa sa ta kiko a influensiá e pensamentu i sintimentu di su oyente. Loke tambe por yuda nos ta ora nos siña opservá bon. Ora nos ta trata un tópiko, nos mester wak si e kara òf tono di bos di e persona ku ta skucha ta kambia.
PARTI NUM. 1
6. Kiko un ruman muhé ku tin un marko di sirkunstansia mester tene kuenta kuné? [7 di yüli, be-PA pág. 44 §5-6] Ta bon pa un ruman muhé ku tin ku usa un marko di sirkunstansia tene kuenta ku tema di su parti, e persona ku ken lo e papia i e punto di konseho ku e mester traha riba dje.
7. Kiko ruman hòmbernan mester trata di logra ora nan ta presentá puntonan sobresaliente di Beibel? (Neh. 8:8) [14 di yüli, be-PA pág. 47 §2-3] E meta di puntonan sobresaliente di Beibel ta pa splika e Palabra di Dios, pa duna e nifikashon i yuda e hendenan komprond’é. Ruman hòmbernan mester enfatisá e importansia ku e informashon tin pa nos awe. Komo preparashon, ruman hòmbernan mester wak kiko ta e nesesidatnan di e kongregashon huntu ku orashon i apliká prinsipionan bíbliko di e kapítulonan asigná na e nesesidatnan di e kongregashon.
8. Kiko un ruman hòmber mester tene kuenta kuné ora e haña un asignashon di Reunion di Sirbishi ku tin demostrashon òf entrevista aden? [21 di yüli, be-PA pág. 49 §5] Ya ku demostrashon ta un ehèmpel pa e kongregashon sigui, mester prepar’é bon. Ruman hòmbernan enkargá ku partinan ku tin demostrashon òf entrevista mester purba train esakinan ku e partisipantenan promé ku e dia di reunion.
9. Kon e buki di Echonan ta enfatisá e manera ku mester duna testimonio i te na ki grado? (Echo. 20:20, 21; 28:23) [28 di yüli, si-S pág. 204 §35] Pablo a pone un ehèmpel den esei ora ku e “no a laga di deklará” ni di “siña . . . públikamente i di kas pa kas.” Den henter e buki di Echonan e tema ‘duna testimonio [“kabalmente,” NW ]’ a ser enfatisá.
10. Kon un oradó por sòru pa su diskurso ta basá riba Beibel? (Echo. 17:2, 3) [11 di oug., be-PA pág. 52 §6–pág. 53 §2] Un ruman hòmber ku haña asignashon pa duna un diskurso públiko no mester djis pensa kon pa splika deklarashonnan ku tin den su boskeho. Mas bien, e mester diserní kon e Skritura ta apoyá e deklarashonnan ei. E mester tuma tempu pa lesa, splika, ilustrá i apliká e tekstonan ku e disidí di usa en bes di konsentrá únikamente riba e boskeho.
LESAMENTU SEMANAL DI BEIBEL
11. Dikon e wardadó di prezu di Filipos kier a “mata su kurpa”? (Echo. 16:25-27) [7 di yüli, w90-S 15/5 pág. 25, kuadro] Un temblor a habri e portanan di prizòn i lòs e kadenanan di e prizoneronan. Bou di lei romano, si un prizonero a hui for di prizòn, e wardadó di prezu lo a haña e kastigu di e prizonero ei. E wardadó di prezu aparentemente a preferá di kometé suisidio i no wòrdu torturá i matá, loke probablemente tabata e kastigu ku tabata spera algun di e prizoneronan.
12. Kon Aristarko i Gayo a reakshoná ora nan a haña nan ku persekushon? (Echo. 19:29; 20:4, 5) [14 di yüli, w08-PA 1/2 pág. 18 §16-17] Ora un multitut a lastra Aristarko i Gayo hiba den e teatro na Efeso, probablemente Aristarko i Gayo a pensa ku nan lo muri. No tin ningun indikashon ku Aristarko i Gayo a pèrdè kurashi. Algun luna despues nan tur dos a kompañá Pablo durante su di tres biahe ku el a hasi komo misionero apesar di sirkunstansianan peligroso.
13. Kiko a nifiká ku Saulo tabata “skòp kontra e puntanan di heru”? (Echo. 26:14) [28 di yüli, w03-PA 1/10 pág. 32] E ekspreshon “skòp kontra e puntanan di heru” ta deskribí e akshon di un bestia ku ta hasi su mes daño ora e ta resistí e hinkánan di e bara ku tabatin un punta di metal skèrpi pa gui’é òf fòrs’é pa move. Dor di maltratá e kristiannan Saulo tabata hasi daño solamente na su mes, ya ku en realidat e tabata bringando kontra Dios. Saulo a tuma Hesus su palabranan na serio, a kambia su proseder i a bira e apòstel kristian tan stimá, Pablo. Na Eklesiastés 12:11, konseho divino ta ser kompará ku punta di heru pasobra e por motivá i guia nos korektamente basta nos permitié.
14. Kon ‘piká a probechá di e oportunidat’ ku e Lei a duna? (Rom. 7:8, 11) [11 di oug., w08-PA 1/6 “E Palabra di Yehova Ta Bibu—Puntonan Sobresaliente di e Buki di Romanonan”] E Lei a yuda hende komprondé tur loke piká ta enserá. I esei a hasi nan mas konsiente ku nan ta pekadó. Konsekuentemente, nan a realisá ku tin mas manera den kua nan tabata peka, i mas hende a rekonosé awor ku nan ta pekadó.
15. Kon nos ta “montoná karbon sendí” riba kabes di un enemigu? (Rom. 12:20) [18 di oug., w08-PA 1/6 “E Palabra di Yehova Ta Bibu—Puntonan Sobresaliente di e Buki di Romanonan”] Den tempu bíbliko, ora nan tabata hinka piedra ku a kontené metal den un fòrnu, nan tabata pone un kapa di karbon bou di e piedranan i tambe riba nan. E karbon ariba a oumentá e kayente i asina a yuda ku e metal tabata dirti i separá for di e impuresanan. Den e mesun manera, nos ta pone karbon kayente riba kabes di un enemigu dor di mustra bondat na dje pa smèlt e parti duru di su kurason i saka na kla su bon kualidatnan.