Repaso di Skol di Ministerio Teokrátiko
Lo konsiderá e siguiente preguntanan na e Skol di Ministerio Teokrátiko durante e siman di 28 di aprel 2008. E superintendente di skol lo kondusí un repaso di 30 minüt basá riba e informashon ku a ser tratá den asignashonnan di e simannan di 3 di mart te ku 28 di aprel 2008.
KUALIDAT DI PAPIA
1. Dikon ta importante pa basa nos partinan riba e informashon asigná, i kon nos por logra esaki? [3 di mart, be-PA pág. 234 §1–pág. 235 §1] Ora nos basa nos partinan riba e informashon asigná nos ta mustra rèspèt pa e “kuminda na su debido tempu” ku nos ta haña mediante “e esklabo fiel i prudente.” (Mat. 24:45) Pa hasi bon uso di e informashon asigná, nos tin ku analisá e informashon kuidadosamente i tambe e tekstonan bíbliko ku e tin. Despues nos mester skohe dos òf tres punto prinsipal ku nos ouditorio lo saka mas probecho for di dje i trata na desaroyá i splika e puntonan ei bon.
2. Dikon pregunta ta asina balioso ora nos ta siña hende? [10 di mart, be-PA pág. 236 §1-5] Pregunta ta stimulá un interkambio di idea. Pregunta ta pone hende pensa i ekspresá nan punto di bista. Esaki por habri kaminda pa nos splika nan e bèrdat bíbliko. (Echo. 8:30, 31)
3. Kon pregunta por yuda nos oyentenan rasoná riba un tema? [24 di mart, be-PA pág. 237 §3–pág. 238 §1] Imitando Yehova, nos por usa pregunta pa yuda hende mira e lógika di e bèrdatnan ku nos ta presentá. (Mal. 1:2-10) Por ehèmpel, ora nos ta kondusí un estudio di Beibel, nos lo por hasi preguntanan manera: Ki relashon tin entre loke nos ta papiando aki ku loke nos a kaba di studia? Dikon e ta importante? Ki efekto e mester tin riba nos bida? Preguntanan asina ta yuda nos studiantenan usa nan “mente.” (Heb. 5:14)
4. Ora nos ta siña hende, dikon ta importante pa hasi pregunta pa laga e persona ekspresá loke realmente e ta opiná? (Pro. 20:5; Mat. 16:13-16; Juan 11:26) [31 di mart, be-PA pág. 238 §3-5] Ora hende ta kontestá pregunta, kisas nan lo kontestá loke nan ta pensa ku nos kier tende. Pero pa nos yuda hende mas mihó, nos mester purba diserní kiko realmente nan ta pensa. Nos por logra esei dor di hasi e tipo di preguntanan ku Hesus a hasi na Mateo 16:13-16 i Juan 11:26.
5. Kon efektivo komparashon ta ora nos ta siña hende? (Gén. 22:17; Jer. 13:11) [21 di aprel, be-PA pág. 240 §1-3] Ku djis un par di palabra, nos por krea imágennan mental bibu ku ta kapta atenshon i stimulá pensamentu i konmové sintimentu. Beibel tin hopi komparashon. Por ehèmpel, un persona ku ta lesa e Palabra di Dios regularmente ta “manera un palu, plantá kantu di koridanan di awa,” i e malbado ta “manera un leon” ku ta lur na skondí pa gara su víktima. (Sal. 1:3; 10:9) Tin bes, ta bon pa duna un splikashon kòrtiku pa reforsá e balor di un komparashon.
PARTI NUM. 1
6. Kua ta algun prinsipio ku e buki di Marko ta enfatisá ku por yuda nos haña bida bou di e Reino di Dios? [10 di mart, si-S pág. 186 §32] E Evangelio di Marko ta enfatisá ku un hende mester tin un spiritu di sakrifisio propio, e mester tuma medida drástiko si ta nesesario pa no pone otro hende trompeká i e mester ta humilde i dispuesto pa siña manera un mucha. (Mar. 8:35; 9:43-48; 10:13-15) Tambe e buki ta hala atenshon na e echo ku lo ta difísil pa esnan riku “drenta e reino di Dios.” (Mar. 10:23-25) I ku ta hopi mas mihó pa warda e dos mandamentunan di mas grandi ku hasi hopi sakrifisio. (Mar. 12:28-34)
7. Kon spiritu santu ta yuda sirbidónan di Dios djawe? (Juan 14:25, 26, BPK) [24 di mart, be-PA pág. 19 §2-3] Spiritu santu no ta pone den nos mente kos ku nunka nos no a siña, pero sí e ta yuda nos kòrda kosnan importante ku nos a yega di studia.
8. Kiko ta e benefisio di mas grandi ku ta bini di lesamentu? [31 di mart, be-PA pág. 21 §3] Lesamentu por yuda nos “deskubrí e konosementu di Dios.” (Pro. 2:5) Nos kresementu spiritual ta dependé pa un gran parti di nos lesamentu di e Beibel. Lesamentu ta hunga un ròl den hopi faseta di nos sirbishi na Dios. Nos ta lesa Beibel i publikashonnan basá riba Beibel na nos reunionnan di kongregashon i den sirbishi di vèlt.
9. Kiko studia ta enserá? [14 di apr., be-PA pág. 27 §3–pág. 28 §1] E ta mas ku lesa aribariba. E ta enserá eksaminá un tema kuidadosamente pa basta ratu. E ta inkluí analisá loke nos ta lesa i wak ta kiko ta e motibunan tras di sierto deklarashon. Ademas, e ta inkluí meditá riba e nifikashon di loke nos ta lesa, kiko e ta bisa nos di Yehova i su propósito, i kon e por yuda nos distinguí entre bon i malu, i tambe kon nos por apliká loke nos ta siña i us’é pa yuda otro hende.
10. Kon e Evangelio di Lukas ta oumentá nos konfiansa ku e Skritura Hebreo ta inspirá pa Dios? [21 di apr., si-S pág. 192 §30-1] E Evangelio di Lukas ta duna hopi ehèmpel di kumplimentu eksakto di e Skritura Hebreo, manera nos por mira ora nos kompará Lukas 4:17-19 ku Isaias 61:1 i 2, i tambe Lukas 18:32 i 33 ku Salmo 22:7; Isaias 50:6; 53:5-7 i Jonas 1:17. E palabranan di Hesus registrá na Lukas 24:44 i 45 ta konfirmá ku e Skritura Hebreo ta inspirá pa Dios.
LESAMENTU SEMANAL DI BEIBEL
11. Dikon Hesus a korigí un sierto hòmber pasobra el a yam’é “Bon Maestro”? (Mar. 10:17, 18) [3 di mart, w08-PA 1/2 “E Palabra di Yehova Ta Bibu—Puntonan Sobresaliente di e Buki di Marko”] Dor di nenga di aseptá e título aki ku a dun’é gloria, Hesus a dirigí e gloria na Yehova i a indiká ku e Dios berdadero ta e fuente di tur kos bon. Ademas, Hesus a hala atenshon na e bèrdat fundamental, esta, ku ta solamente Yehova Dios, e Kreadó di tur kos, tin e derecho di pone norma pa loke ta bon i malu.
12. Hesus a usa e palu di figu pa ilustrá kiko enkuanto e nashon di Israel? (Mar. 11:12-14, 20, 21) [3 di mart, w03-PA 15/5 pág. 26 §2-3] Komo ku e promé figu ta sali huntu ku e blachinan—i tin biaha asta promé ku e palu saka blachi—e echo ku e palu no tabatin fruta a mustra ku e no tabatin balor. Meskos ku e palu di figu improduktivo pero ku aparensia salú, asina e nashon hudiu tabatin un aparensia eksterior engañoso. Pero e no a pari fruta ku a agradá Dios, i finalmente a rechasá Yehova su propio Yu. Hesus a maldishoná e palu steril ei, i e siguiente dia, e disipelnan a ripará ku ya kaba el a seka. E palu ei ku a seka a mustra bon kla ku pronto Dios lo a rechasá e hudiunan komo su pueblo skohí.
13. Kiko e palabranan ku angel Gabriel a usa a indiká ora el a bisa ku Maria lo ‘konsebí den su matris’ debí ku e spiritu santu di Dios lo bin riba dje i e poder di Dios lo kubrié ku su sombra? (Luk. 1:30, 31, 34, 35) [17 di mart, w08-PA 1/3 “E Palabra di Yehova Ta Bibu—Puntonan Sobresaliente di e Buki di Lukas”; it-2-S pág. 83 §3] Ya ku un konsepshon realmente a tuma lugá, Yehova mester a perkurá pa fertilisá un eisèl òf óvulo den Maria su matris ora el a transferí e bida di su Yu primogénito for di e region di spiritu pa tera. (Gal. 4:4) Di e manera ei so e yu ku lo a nase por a keda ku e mesun identidat ku e tabatin den shelu komo e Palabra, i ta asina so lo e por tabata Maria su mes yu i konsekuentemente un berdadero desendiente di Maria su antepasadonan Abraham, Isaak, Jakòb, Huda, i Rei David i un heredero legítimo di e promesanan divino hasí na nan. (Gén. 22:15-18; 26:24; 28:10-14; 49:10; 2 Sam. 7:8, 11-16; Luk. 3:23-34)
14. Realmente Hesus su disipelnan tabata ‘hasi loke Lei no a permití pa hasi riba dia di sabat’? (Luk. 6:1, 2) [24 di mart, gt-PA kap. 31] Nò, nan no a kibra Yehova su lei di sabat. E fariseonan a bisa ku piki grano i fregamentu di dje den man pa nan kome tabata kosechamentu i separashon di grano for di bagas. Pero nan interpretashon estrikto di loke ta bira trabou a hasi e sabat un karga pisá, miéntras ku e propósito dje dia di sabat tabata p’e ser un dia di goso i di edifikashon spiritual. P’esei, Hesus a desmentí nan usando ehèmpel bíbliko pa mustra ku e propósito di Yehova Dios nunka tabata pa un aplikashon demasiado estrikto asina pa Su lei di sabat. (Mat. 12:3-5)
15. Ki lès nos por siña for di e konseho ku Hesus a duna Marta? (Luk. 10:40-42, NW) [7 di apr., w99-PA 1/9 pág. 31] Nos tur mester “skohe e bon porshon” dor di pone e énfasis primario riba kosnan spiritual. Dor di hasi sigur dje kosnan mas importante, nos lo tin Yehova su aprobashon i bendishon. (Fil. 1:9-11)