Repaso di Skol di Ministerio Teokrátiko
Lo konsiderá e siguiente preguntanan na e Skol di Ministerio Teokrátiko durante e siman di 25 di febrüari 2008. E superintendente di skol lo kondusí un repaso di 30 minüt basá riba e informashon ku a ser tratá den asignashonnan di e simannan di 7 di yanüari te ku 25 di febrüari 2008. [Nota: Kaminda no tin referensia despues di e pregunta, lo bo tin ku hasi bo propio investigashon pa haña e kontestanan.—Mira e buki Skol di Ministerio, pág. 36-7.]
KUALIDAT DI PAPIA
1. Kiko nos mester hasi pa yuda nos oyentenan kapta e sentido di tekstonan bíbliko, i dikon nos mester hasi esei? [be-PA pág. 228 §2-3] Nos mester tuma tempu pa splika e tekstonan bíbliko ku nos ta lesa i mustra kon nan ta apliká. Ora nos hasi esei nos ta ‘duna nifikashon’ na e teksto. (Neh. 8:8, 12) Splikando kon e tekstonan bíbliko ta apliká, nos ta yuda nos oyentenan mira kon e informashon mester influensia nan bida.
2. Dikon ta importante pa nos presentashon ta instruktivo pa nos ouditorio, i kon nos por logra esaki? [be-PA pág. 230 §3-5, kuadro] Si nos limitá nos mes na konta hende kos ku nan sa kaba, probablemente nan lo no presta atenshon. Nos meta ta pa stimulá pensamentu di nos ouditorio i laga nan sinti ku nan a siña algu ku ta bale la pena. Nos por logra esei ora nos tene kuenta ku loke nos ouditorio sa kaba di e tema i adaptá e ritmo di nos presentashon: mas lihé pa puntonan bon konosí i mas slow pa puntonan nobo.
3. Ora nos hasi investigashon, kon esei por yuda nos hasi nos diskursonan mas instruktivo? [be-PA pág. 231 §1-3] Investigashon lo yuda nos bin ku detayenan interesante en bes di papia riba kosnan general. Kisas nos por topa ku un dato históriko poko konosí òf un deklarashon ku a sali resientemente den notisia ku lo ilustrá e punto ku nos kier trata.
4. Kiko nos tin ku hasi pa nos ouditorio por siña algu for di tekstonan ku nan konosé bon? [be-PA pág. 231 §4-5] Nos mester tuma tempu pa splika palabra- òf ekspreshonnan spesífiko di e versíkulo ku nos ta tratando. Isolá ekspreshonnan ku ta relashoná ku e tema. Por ehèmpel, si nos ta tratando Mikeas 6:8 [NW], nos lo por splika kiko hustisia òf modestia ta. Òf nos lo por ilustrá kiko ke men “stima bondat amoroso.”
5. Dikon ta importante pa rasoná riba e tekstonan ku nos lesa? [be-PA pág. 232 §3-4] Ora nos rasoná riba e Skritura, nos ta yuda hende lesa e Palabra di Dios ku mas atenshon i komprondé detayenan ku nan por a pasa por haltu. (Mat. 22:41-45) Nos por logra esei dor di hala atenshon na e konteksto di un versíkulo, e sirkunstansianan bou di kua el a wòrdu skirbi i e identidat di e persona ku ta papia òf di esun ku ta skucha.
PARTI NUM. 1
6. Kiko ta indiká ku a skirbi e buki di Mateo prinsipalmente ku e hudiunan na mente? [si-S pág. 176 §6-7] Loke ta indiká ku a skirbi e buki di Mateo prinsipalmente ku e hudiunan na mente ta su genealogia, ku ta mustra ku Hesus ta un desendiente legítimo di Abraham. Loke tambe ta indiká esei ta e echo ku e buki ta referí hopi bes na e Skritura Hebreo, ku ta señalá na e binidero Mesias. Ademas, tin evidensia ku ta indiká ku Mateo originalmente a skirbi su Evangelio na hebreo.
7. Kon nos por prepará nos kurason pa risibí instrukshon divino for di plataforma? (2 Kró. 20:33) [be-PA pág. 13 §4–pág. 14 §4] Un manera importante pa prepará nos kurason pa risibí instrukshon for di Yehova ta dor di pidié den orashon pa un aktitut gradisidu. (Sal. 27:4; 95:2) Tambe nos por pidié pa duna nos trankilidat di mente i kurason pa nos por kita kualke ‘preokupashon’ ku por stroba nos di konsentrá. (Sal. 94:19) Si nos fiha bista riba e oradó i siguié den nos Beibel ora e ta lesa teksto, esei lo por yuda nos konsentrá.
8. Kiko mayornan por hasi pa siña nan yunan haña “sabiduria ku ta hiba na salbashon”? (2 Tim. 3:15) [be-PA pág. 16 §3-4] Mayornan mester hasi tur nan esfuerso pa bini ku nan yunan na e reunionnan, asambleanan i kongresonan kristian. Na kas, mayornan por pone nan yunan chikí sinta ketu durante sierto oranan fiho pa wak e plachinan den nos publikashonnan kristian. Por duna yunan nan ehemplar personal di publikashonnan ku ta ser studiá na nos reunionnan. Ku tempu, mayornan por yuda nan yunan chikí prepará komentario breve.
9. Kon e Evangelio di Mateo ta resaltá kumplimentu di profesia bíbliko? [si-S pág. 181 §32] Den e Evangelio di Mateo tin hopi sita for di e Skritura Hebreo i e ta mustra kon e profesianan ei a kumpli. Por ehèmpel, Mateo 13:14 i 15 ta sita e profesia di Isaias 6:9 i 10; Mateo 21:42 ta referí na kumplimentu di e profesia di Salmo 118:22 i 23; i Mateo 26:31 i 56 ta hala atenshon na e kumplimentu di e profesia di Zakarias 13:7. Kumplimentu di e profesianan ei ku Mateo a registrá ta duna nos bon motibu pa kere ku Hesus ta e Mesias i tambe pa kere den loke Hesus mes a profetisa.
10. E Evangelio di Mateo ta deskribí Hesus komo e Mesias i Rei primintí; kon e Evangelio di Marko ta deskribié? [si-S pág. 182 §7-8] E Evangelio di Marko ta deskribí Hesus komo e Yu di Dios ku ta hasi milager i komo Salbadó. E ta referí na por lo ménos 19 milager. Marko a enfatisá Hesus su aktividatnan mas bien ku su siñansanan. E Evangelio di Marko no a konsiderá e Lei di Moisés ni e genealogia di Hesus ekstensamente, pero sí e ta splika kustumbernan hudiu. Esei ta indiká ku Marko a skirbi prinsipalmente pa e benefisio di e romanonan.
LESAMENTU SEMANAL DI BEIBEL
11. Ekspresá rabia ta mas serio ku warda renkor? (Mat. 5:21, 22, BPK) [w08-PA 1/1 “E Palabra di Yehova Ta Bibu—Puntonan Sobresaliente di e Buki di Mateo”] Hesus a bisa ku keda ‘rabiá ku bo ruman’ ta mes serio ku kometé asesinato. Sin embargo, e situashon ta bira mas serio ora e persona ei ta usa palabranan di despresio pa ekspresá su rabia. I pa motibu di esei, e persona aki ta keda responsabel dilanti un korte mas haltu ku e korte di hustisia lokal.
12. Kon kristiannan por mantené un ‘wowo simpel’? (Mat. 6:22, 23, NW) [w06-PA 1/10 pág. 29] Un wowo simpel ta sinsero, ku motivashon puru i liber di golosidat i ambishon egoista. E echo ku nos tin un wowo simpel no ke men ku nos mester biba den pobresa ekstremo òf neglishá di atendé nos responsabilidatnan kristian. Al kontrario, e ta nifiká demostrá “sano huisio” segun ku nos ta pone sirbimentu di Yehova na promé lugá. (2 Tim. 1:7)
13. Kiko Hesus kier a trese padilanti ora el a puntra su disipelnan: “Boso a komprondé tur e kosnan aki?” (Mat. 13:51, 52) [w08-PA 1/1 “E Palabra di Yehova Ta Bibu—Puntonan Sobresaliente di e Buki di Mateo”] Hesus tabata enfatisá e importansia di komprondé e bèrdatnan tokante e Reino. Unabes nos komprondé e bèrdatnan tokante e Reino, nos tin e responsabilidat di siña otro hende i kompartí e tesoronan aki ku nan.
14. Dikon hopi bes Hesus a taha esnan ku el a kura “pa no laga sa ken e ta”? (Mat. 12:16) [w87-S 15/5 pág. 9; cl-PA pág. 93-4] Hesus a usa su poder na un manera responsabel. Nunka el a realisá obranan poderoso pa impreshoná otro hende. (Mat. 4:5-7; Luk. 23:8, 9) E no tabata kier pa hende saka konklushon tokante dje a base di informenan sensashonalista.
15. Kiko Hesus kier a duna di komprondé enkuanto e “midí” ku un hende ta “midi kuné”? (Mar. 4:24, 25) [w80-S 1/11 pág. 12; gt-PA kap. 43] Si nos duna Hesus un “midí” chikí di interes i atenshon, nos no por spera di haña mashá bèk for di dje. Pero si nos dun’é tur nos atenshon, e ora ei lo e duna nos mas informashon i komprondementu ku nos a spera. Di e manera ei nos lo amplia nos konosementu i lo ta den un mihó posishon pa yuda otro hende haña komprondementu.