“Laga Boso Palabranan Ta Semper . . . Sasoná ku Salu”
1 “Laga boso palabranan ta semper ku grasia, sasoná ku salu, pa boso por sa kon boso mester kontestá kada persona.” (Kol. 4:6) Sasoná nos palabranan ku salu ta nifiká skohe nos palabranan bon i papia di tal manera ku nos komentarionan lo ta agradabel pa tende. Esaki ta masha importante ora nos ta den sirbishi.
2 Hesus Su Ehèmpel: Miéntras ku Hesus tabata sosegá banda di un pos, el a tuma e inisiativa pa papia ku un señora samaritano ku a bin saka awa na e pos. Vários biaha durante e kòmbersashon, e señora a menshoná puntonan ku a reflehá e enemistat ku tabatin entre e hudiunan i e samaritanonan. Tambe el a ekspresá su kreensia ku samaritanonan ta desendiente di Jakòb, maske e hudiunan tabata konvensí ku e samaritanonan no a bin di e hudiunan. En bes di kontradisí e señora, Hesus a mantené e kòmbersashon agradabel. Komo resultado, el a logra duna un testimonio ku a benefisiá tantu e señora komo e otro hendenan di e stat.—Juan 4:7-15, 39.
3 Segun ku nos ta prediká nos mester tene na mente kiko ta nos meta, esta, pa “trese notisianan alegre di kosnan bon.” (Rom. 10:15) Nos ke kompartí un pensamentu bíbliko ku ta atraé i edifiká e doño di kas. Nos no ke dun’é e impreshon ku nos ta ataká su kreensianan personal. Si e ekspresá un punto di bista robes, nos no tin nodi diskutí kuné. Tin algu ku el a bisa ku nos por bai di akuerdo kuné òf usa komo base pa elogi’é sinseramente? Podisé nos por introdusí un teksto bíbliko bisando: “Bo a yega di pensa riba e siguiente posibilidat?”
4 Pero kiko si e doño di kas ta papia di un manera brutu òf ta parse ku ta diskutí e ke diskutí? Nos mester sigui mustra ku nos ta kariñoso i suave ku echo i palabra. (2 Tim. 2:24, 25) Si e persona no ta interesá den e mensahe di Reino, ta mihó nos terminá e bishita na un bon manera.—Mat. 7:6; 10:11-14.
5 Bon Resultado: Ora un ruman muhé a purba duna testimonio na su bisiña, e señora a interumpié rabiá i a zundr’é. Di un manera bondadoso, nos ruman a bis’é: “Ta duel mi ku bo ta sinti asina. Pasa un bon dia.” Dos siman despues, e señora a bati na e ruman su porta. El a pidié despensa i a ekspresá ku e ta dispuesto pa skucha loke e ruman muhé kier a bis’é. Hopi bes nos por logra bon resultado si nos kontestá hende ku bon manera!—Pro. 15:1; 25:15.
6 Nos mester purba sasoná nos palabranan ku salu ora nos ta deklará e bon nobo. Asta si e doño di kas no ke skucha mes, kisas e ta mas dispuesto pa skucha e siguiente biaha ku Testigunan di Yehova yama na su porta.
[Study Questions]
1. Kiko ta nifiká ‘sasoná nos palabranan ku salu’?
2. Kon bin Hesus por a duna testimonio na un señora samaritano?
3. Kon nos por sigui Hesus su ehèmpel ora nos ta den sirbishi?
4. Kiko nos mester hasi si e doño di kas ta papia di un manera brutu?
5. Kon un ruman muhé a logra bon resultado ora el a kontestá ku bon manera?
6. Pakiko ta importante pa nos palabranan ta sasoná ku salu ora nos ta prediká?