Yuda Studiante di Beibel Bira Publikadó di e Bon Nobo di Reino
1 Sin duda, e asignashon ku Hesus a duna su disipelnan na Mateo 28:19 i 20 tabata di largu alkanse. Kristu su disipelnan a haña instrukshon pa hasi mas disipel ku, na nan turno, lo a sigui ku e trabou di hasi disipel. Di e manera ei lo a pone un fundeshi pa e proklamashon final di e bon nobo di e Reino di Dios rònt mundu durante e tempu spesial di fin den kua nos ta bibando awor.—Mat. 24:14.
2 Nos studiantenan di Beibel por ta nos yunan òf otro hende ku ta dispuesto pa studia Beibel. Di kurason nos kier yuda kada un di e studiantenan aki pa aseptá nan responsabilidat di yuda otro hende bira disipel di Hesukristu.—Luk. 6:40.
3 Prepará Nan pa Duna Testimonio: Animá bo studiantenan pa kompartí loke nan ta siña ku otro hende. Konta nan bunita eksperensianan di sirbishi di vèlt. Siña bo yunan for di chikitu pa ta efektivo den sirbishi segun nan kapasidat. (Sal. 148:12, 13) Mustra bo apresio pa e ministerio ku echo i palabra.—1 Tim. 1:12.
4 Yehova ta usa solamente hende ku ta aseptá su normanan hustu i ta biba na armonia ku nan. Naturalmente, publikadónan nobo no sa mes tantu ku ministernan di Reino ku ta eksperensiá, dediká i batisá. Di otro banda e publikadónan nobo mester kere den e siñansanan básiko di Beibel, i mester por splika esakinan na otro hende. (Wak e buki Organisá, pág. 79-82.) Nan mester a separá nan mes kompletamente di ‘Babilonia e Grandi,’ i di tur loke ku tin di haber ku polítika. Ademas nan mester asistí regularmente na reunionnan di kongregashon.—Rev. 18:2, 4; Juan 17:16; Heb. 10:24, 25.
5 Asina ku bo ripara ku un di bo studiantenan di Beibel ta kualifiká pa bira un publikadó no-batisá, pone e superintendente presidente na haltura di esei. E lo perkurá pa dos ansiano reuní ku bo i e studiante di Beibel pa mira si e ta kualifiká komo un publikadó no-batisá di e bon nobo di Reino den asosiashon ku e kongregashon. Anto lo bo tin e privilegio pa sigui yuda bo studiante di Beibel ora boso sali huntu den sirbishi di vèlt.